Search form

Numbers 26

Naaqumallrata Aipaa

1Cangerliim tut'ellran kinguani Atanrem qanrutak Moses-aankuk Eleazar-aaq-llu, Aaron-aam agayulirtem qetunraa, 2“Naaqiciki tamalkuita Israel-aam yui yuinarnek allrakungelrianek ayagluki, ilakuralriatgun naaqluki anguyaucugngalriit tamalkuita.” 3-4Moses-aankuk-llu agayulirta-llu Eleazar-aaq niillutek quyurcetakek angutet tuaten pitarilriit. Quyurtut-llu carr'ilqaini Moab-am Jericho-mi Jordan-aam caniani. Ukut waniwa Israelite-at anellret Egypt-aamek:

5Reuben-aamek naumavilget Israel-aam irniarin ciuqlikacagiitnek: ukut yuit, Hanoch-aam, Palu-m, 6Hezron-aam, Carmi-m-llu. 7Ukut waten amllertaluteng, yuinaak malruk pingayunek cipluku tiissitsaat, tiissitsaam avga, yuinaat-wa qula atauciq qulnek cipluku (43,730) angutet. 8Kinguvri-wa Palu-m, Eliab-aaq 9qetunrai-llu Nemuel-aaq, Dathan-aaq, Abiram-aaq-llu. Ukuk imkuuguk Dathan-aankuk Abiram-aaq-llu cucukumallrek yugnek. Nauwa inglulillrukekek Moses-aankuk Aaron-aaq-llu ilaullutek-llu Korah-m maligtestainun Ataneq inglulillratni. 10Nunam quliulluki igellrui taukut, tuqullgutkellruluku Korah ilai-llu kenrem ekualuki yuinaat qula malruk qulnek cipluku (250) angutet, yugnun aarcirtuutngurrluteng. 11Korah-m tau͡gaam qetunrai tuani tuqullruvkenateng.

12Simeon-aamek naumavilget: Ukut yukait Nemuel-aam, Jamin-am, Jachin-aam, 13Zerah-m Shaul-am-llu. 14Ukut ilakellriit amllertaluteng yuinaq malrugnek cipluku tiissitsaat, yuinaat-wa qulen (22,200) angutet.

15Gad-amek naumavilget: Ukut yuit Zephon-aam, Haggi-m Shuni-m, 16Ozni-m, Eri-m, 17Arod-aam, Areli-m-llu. 18Ukut ilakellriit amllertaluteng yuinaak malruk tiissitsaat, tiissitsaam-wa avga (40,500) angutet.

19-21Judah-mek naumavilget: Ukut yuit, Shelah-m, Perez-am, Zerah-m, Hezron-aam, Hamul-aam. Malruk Judah-m qetunraak Er-ankuk Onan-aaq-llu tuqullruuk Canaan-aami. 22Ukut ilakellriit amllertaluteng yuinaat pingayun akimiaq ataucimek cipluku tiissitsaat, tiissitsaam-wa avga (76,500) angutet.

23Issachar-amek naumavilget: Ukut yuit, Tola-m, Puah-m, 24Jashub-aam, Shimron-aam-llu. 25Ukut ilakellriit amllertaluteng, yuinaat pingayun cetamanek cipluku tiissitsaat, yuinaat-wa akimiaren (64,300) angutet.

26Zedbulon-aamek naumavilget: Ukut yuit, Sered-aam, Elon-aam, Jahleel-am-llu. 27Ukut ilakellriit amllertaluteng, yuinaat pingayun tiissitsaat, tiissitsaam-wa avga (60,500) angutet.

28Joseph-aamek nauvilget, irniak malruulutek, Manasseh-nkuk Ephraim-aaq-llu.

29Manasseh-mek naumavilget: Machir-aq qetunraa Manasseh-m Gilead-aam atakellrua. Ukut-llu waniwa kangirqaqameng naumavilguut Gilead-aamek: 30Ukut yuit, Lezer-aam, Helek-aam, 31Asriel-aam, Shechem-aam, 32Shemidah-m Hepher-aam-llu. 33Zelophehad-aq Hepher-aam qetunraa angutnek irniaritellruuq arnanek tau͡gaam; aterluteng Mahlah, Noah, Hoglah, Milchah, Tirzah-wa. 34Ukut ilakelriit amllertaluteng yuinaak malruk qula malrugnek cipluku tiissitsaat, tiissitsaam avga yuinaat-wa qulen (52,700) angutet.

35Ephraim-aamek naumavilget: Ukut yuit, Shuthelah-m, Becher-aam Tahan-am-llu. 36Eran-am kinguvri kangirqaqameng Shuthelah-mek naumavingqertut. 37Ukut ilakellriit amllertaluteng yuinaq qula malrugnek cipluku tiissitsaat, tiissitsaam-wa avga (32,500) angutet. Ukut ilakellriit kinguvalriaruut Joseph-aamek.

38Benjamin-aamek naumavilget: Ukut yuit, Bela-m Ashbel-aam Ahiram-aam, 39Shephupham-aam, Hupham-aam-llu. 40Ard-amek Naaman-aamek-llu naumavilget kangirqaqameng Bela-mek naumavingqertut. 41Ukut ilakellriit amllertaut yuinaak malruk tallimanek cipluku tiissitsaat, tiissitsaam avga, yuinaat-wa talliman (45,600) angutet.

42Dan-amek naumavilget: Shuham-aam yui 43amllertaluteng yuinaat pingayun cetamanek cipluku tiissitsaat, yuinaat-wa yuinaat (64,400) angutet.

44Asher-aamek naumavilget: Ukut yuit, Imnah-m, Ishvi-m Beriah-m-llu. 45Yuk'enka Heber-aam Malchiel-am-llu kangirqaqameng Beriah-mek naumavingqertut. 46Asher-aaq-llu paningqellruuq Serah-mek aterluni. 47Ukut ilakellriit amllertaluteng yuinaak malruk qula pingayunek tiissitsaanek, yuinaat-wa yuinaat (53,400) angutet.

48Naphtali-mek naumavilget: Ukut yuit, Jahzeel-am, Guni-m, 49Jezer-aam Shillem-aam-llu. 50Ukut ilakellriit amllertaluteng yuinaak malruk tallimanek cipluku tiissitsaat yuinaat-wa yuinaat (45,400) angutet.

51Israel-aam yuin angutait quyurmeng amllertaluteng tiissitsaam avga yuinaat talliman ataucimek cipluku tiissitsaat, tiissitsaam avga yuinaat qula atauciq qulnek cipluku (601,730).

52Atanrem qanrutaa Moses-aaq, 53“Av'ggu nuna naumavillgutkelrianun yugyagtaciat cuqekluku. 54-56Nuna avegniarci nall'arcetaarluci, yugyanrulriit amllenruluki piaqluki yugkilnguut-llu ikgellruluki.”

57Levi-amek naumavilget yungqertut ukut yuitnek: Gershon-aam, Kohath-am, Merari-m-llu. 58Ukut kinguvrit ilangqertut ukut yuitnek: Libni-m, Hebron-aam, Mahli-m, Mushi-m, Korah-m-llu. Kohath-aq atakluku Amram-aam, 59Levi-am panianek Jochebed-aamek nulialgem, tauna yuurtellruluni Egypt-aami. Amram-aamek uingqerrluni irniangellruuq qetunrangluni Aaron-aankugnek Moses-aaq-llu, cali-llu paningluni Miriam-aamek. 60Aaron-aaq-llu cetamanek qetunrangqellruluni, Nadab-amek, Abihu-mek, Eleazar-aamek, Ithamar-amek-llu. 61Nadab-ankuk Abihu-llu tuqullruuk kencignailngurmek kenermek kumarcillermegni ciuqerrani Atanrem. 62Tamakut-llu Levite-at naaqumallret angutet ataucimek iralungllermeggnek ayagluteng amllertaluteng yuinaq pingayunek cipluku tiissitsaat (23,000). Allakarmeng igausngaluteng Israel-aam yuinek, camek kinguvalegtarmek cikiumanrilameng Israel-aani.

63Makut maa-i Israel-aam yui Moses-aankuk Eleazar-aaq-llu agayulirta naaqellruakek Moab-am carr'ilqaini Jericho-mi Jordan-aam yaaqsinrilkiini. 64Imkut-llu ciuqlirmi naaqumaqerraallret Sinai-am nuniini ataucirraunge'rmi unguvanrituq. 65Atanrem waten qanrutkellruateng, “Yuilqumi tuquciqut.” Ataucirraunge'rmi-llu unguvanrituq Caleb-aaq tau͡gaam Jephunneh-m qetunraa Joshua-llu cali Nun-am qetunraa.

Yupik Bible

Yupik Bible © 2012 American Bible Society

More Info | Version Index