Search form

Numbers 27

Zelophehad-am Panii

1Caqerluteng iluvartut Zelophehad-am panii Hepher-aam qetunraan, Gilead-aam qetunraan, Machir-am qetunraan, Manasseh-m qetunraan, Joseph-aam qetunraan. Taukut arnat aterluteng: Mahlah, Noah, Hoglah, Milcah, Tirzah-wa. 2Taukut ullagait Moses-aaq, Aaron-aaq yuut-llu tamalkuita ciulirnertuumaita, nangerrluteng-llu ciuqerratnun Pelatekam Agayuuviim amiigan ciuqerrani taukunun qanertut, 3“Wangkuta atavut tuqullruuq yuilqumi angutmek kinguvrunani. Ilagallrunritai Korah-m maligtestai inglulitellratni Atanermun, tau͡gaam tuqullruluni elliin assiilngillni pitekluku. 4Ciin tua-i atamta atra catairuceteqatarceciu Israel-aam yuinek angutmek qetunrailucia pitekluku? Pikarkamten̄ek cikircikut atamta kinguvrin nuniitni.”

5Moses-aam-llu taukut piyullrat Atanermun qanrutekngaku, 6Atanrem Moses-aaq qanrutaa, 7“Zelophehad-am panii elluarrluteng piut; cikirciki pikaitnek atiita tungayain nuniitni. Atiitnek kinguvararkaulleq ellaitnun piksagutelluku. 8Qanrutniaten Israel-aam yui angun tuqukan qetunraunani aklui kinguvarcet'laasqelluki panianun. 9Paniilkan-llu aklui kinguvarcet'laasqelluki atiin anelgutainun angutnun. 10Angutnek-llu anelgutailkan aklui kinguvarcet'laasqelluki atiin anelgutainun angutnun. 11Atii-llu anelgutailkan angutnek aklui kinguvarcetniaci canimellratnun tungayain, taum nakmiin piksagutarkauluku. Israel-aam-llu yuinun man'a picirkiutnguarkauluni, Atanrem alerquutekellruciatun Moses-aamun.”

Joshua cucukumauq Moses-aam Enii Tegusqelluku

12Atanrem qanrutaa Moses-aaq, “Mayurru una ingriq Abarim-aamek at'lek, kangranek tangerrniaran nuna Israel-aam yuinun cikiutekaqa. 13Tangrrumarikuvgu tuquciquten Aaron-aatun anelgutevtun, 14tua-i-wa inglulitellruavet qanllemnun Zin-am yuilqurrani. Israel-aam yuin wangnun qanemyuugallrata nalliini Maribah-mi, qigcignarqellria piniqa nasvagyuumiinaku yugnun.” (Meribah meruuq nunamek ulvelria Kadesh-aami Zin-am yuilqurrani.)

15Moses-aam Ataneq qanrutaa, 16Ataneq Agayun, unguvangqellriit tamarmeng ayagnerata, kaigavikamken apertuisqelluten angutmek yugpet ciuliqagtestekaatnek 17alerquastekaatnek-llu anguyiim nalliini, yut'en ayuqenritnaurtut qusngitun qusngiliurtailngurcetun.”

18Atanrem qanrutaa Moses-aaq, “Joshua Nun-am qetunraa ullagluku unatevnek qamiqurrakun pategluku 19nangercessgu Eleazar-aam agayulirtem yuut-llu ciuqerratnun, qanrulluki-llu elpenun enairtekaqniluku. 20Takarnarqutvet iliinek cikirluku Israel-aam yuin niisnganiaraat. 21Eleazar-aaq agayulirta tegguteku'urluku piniartuq, elliin nallunriryugngiiku wiinga pisqutka aturluku Urim-aaq Thummim-aaq-llu.+ Waten piluni Eleazar-aam picirkiurciqaa Joshua Israel-aam-llu yui tamalkuita callratni tamalkuitni.” 22Moses-aaq-llu tuaten piuq Atanrem alerquuciatun, Joshua nangertelluku Eleazar-aam agayulirtem yuut-llu ciuqerratnun. 23Atanrem-llu alerquuciatun Moses-aam Joshua qamiqurrakun unatminek pategluku aperturaa elliin cimiqerkauniluku.

Yupik Bible

Yupik Bible © 2012 American Bible Society

More Info | Version Index