Search form

Numbers 28

Elliiyarani Elliitet

1Atanrem qanrutaa Moses-aaq, 2“Alerqurki Israel-aam yui qanrulluki elliilaasqelluki neqkanek ilukegcinarqelrianek Agayutmun piyaraitni.

3“Makunek maa-i neqkanek elliilarciquci Atanermun: unuaquaqan elliilarniartuci ekuagiluci malrugnek allrakungelriignek qusngiyagaagnek natlugnerilnguugnek. 4Elliitek'larniaci aipaa unuakumi aipaa-llu atakumi, 5tapirlukek allakakenka malrugnek usperegnek mukaamek uringalriamek malruk saskak imaagnek assilriamek olive-aat uquatnek. 6Una unuaquaqan elliitek'larciqerci Ingrimi Sinai-ami ayagniqaraalleq elliitnguluku ekualuku, tepii narnirqellriaruluni Atanermun. 7Cali-llu wine-amek elliiniartuci tapeqluku ciuqlirmun qusngiyagarmun, kuv'iluci ekuavigmun malruk saskak imaagnek wine-amek. 8Atakuaqan-llu elliitekluku qusngiyagaam aipaa unuakumi pillerci ayuqeliluku taprin-llu ayuqaitnek tapirluku. Ekualuku cali elliitekniarci tepii ilukegcinaqluni Atanermun.

Ernermi Sabbath-aami Elliitekaq

9“Ernermi Sabbath-aami elliilarniartuci malrugnek ataucimek allrakungelriignek qusngiyagaagnek natlugnerilnguugnek, tapirlukek cetamanek uspernek mukaamek urcimalriamek olive-aat uquatnek, wine-amek-llu cali. 10Waten ekualuki elliiguralarciquci ernerni Sabbath-aani avatiini unuaquaqan elliitekuralallerpeci wine-amek tapirluku.

Elliitekaq Iralut Erenrita Ciuqliatni

11“Ekuagiluci elliilaqici Atanermun iralut ayagnillratni: malrugnek ayagyualriignek angucalugnek, ataucimek angucalumek qusngimek, malrunlegnek-llu ataucimek allrakungelrianek angucalunek qusngiyagarnek, tamarmeng natlugnerilngurnek. 12Mukaarkamek-llu elliikuvci elliikici mukaamek olive-aat uquatnek urcimalriamek: angucaluq tapirluku arvinlegnek uspernek mukaamek; angucaluq-llu qusngiq tapirluku cetamanek uspernek; 13qusngiyagaat-llu allakaitgun malrugnek usperegnek pitaarturluki. Makut neqkauluteng elliitnguut tepiit ilukegcinaqluni Atanermun. 14Wine-at-llu tapqucimaarkat amllertaciqut saskat pingayunelgen ataucimun angucalumun; arvinelgen saskat angucalumun qusngimun; saskat-llu cetaman qusngiyagarmun. Una picirkiutnguciquq ekualuku elliitnun iralum erenrin ciuqliatni atuugarkamun allrakum iluani. 15Cali-llu unuaquaqan elliitek'lallerpecen̄un ilakluku wine-amek tapirluku, elliilarniartuci ataucimek angucalumek qusngirngalngurmek assiilnguirutekluku.

Elliitekat Nerevkaritiini Quleciriyarailnguum Kelipam

16“Akimiarunritariit erenrin ciuqliim iralum Atanrem Kituutekaa. 17Akimiaratni-llu erenrin taum nerevkariyarauluni, cali-llu quulecirailngurnek kelipanek neryarauluni ernerni malrunlegni. 18Erenret ciuqliatni caliarkaci peggluki agayuniartuci. 19Elliiluci ekuagarkamek neqkauluku Atanermun: malrugnek angucalugnek ayagyualriignek, ataucimek angucalumek qusngimek, malrunlegnek-llu qusngiyagarnek, tamarmeng natlugnerilngurnek. 20Taperkaitnek-llu cali elliiluci: mukaamek olive-aat uquatnek urrluku, arvinlegnek uspernek angucaluq atauciq tapirluku, cetamanek-llu uspernek angucaluq qusngiq, 21malrugnek-llu usperegnek tapirluki qusngiyagaat allakaita. 22Ataucimek-llu cali angucalumek qusngirngalngurmek elliiluci assiilnguirutkarpecen̄ek. 23Makut elliitekekiciki cipneruluki unuakumi ekuagiluci elliitek'lallerpecen̄un. 24Tuaten pilaucirpecetun elliilarniartuci neqkauluki unuaquaqan ernerni malrunlegni, elliitnguluni neqkauluni tepii ilukegcinaqluni Atanermun. Elliitek'larniarci una cipneruluku unuaquaqan ekualuku elliitek'lallerpecen̄un wine-amek tapirluku. 25Erenret malrunelgatni calivkenaci quyurrluci agayularniartuci.

Elliitekat Quyurciyaram Nerevkaritiini

26“Quyurciyaram erenrin ciuqliatni elliikuvci nutaranek mukaarkanek Atanermun, calivkenaci quyurrluci agayukici. 27Elliiniartuci ekuagiluci tepii narnirqellriamek Atanermun: malrugnek ayagyuagnek angucalugnek, ataucimek qusngimek, malrunlegnek-llu qusngiyagarnek ataucimek allrakungelrianek, tamarmeng natlugnerunateng. 28Tapirluki mukaarkamek elliitmek. Mukaaq urrluku olive-aat uquatnek, arvinlegnek uspernek angucalut tapirluki, cetamanek-llu uspernek angucaluq qusngiq, 29malrugnek-llu usperegnek qusngiyagaat allakaita tapirluki. 30Angucalumek-llu cali qusngirngalngurmek elliiluci assiilnguirutkarpecen̄ek. 31Makut elliitek'larniaci wine-aq-llu cipneruluki unuaquaqan ekualuki cali-llu mukaarkanun elliitevcen̄un.

Yupik Bible

Yupik Bible © 2012 American Bible Society

More Info | Version Index