Search form

Numbers 30

Picirkiutet Akqilrianun

1Moses-aam qanrutai Israel-aam yuin ilakellgutkelriartaita ciuliqagtait, “Waniwa una Atanrem alerquutii. 2Angutem akqekuniu Ataneq camek cikiryugluku, wall'u akqekuniu camek atunritengnaqerkaminek, akqutkellni pinrilngaitaa. Akqiluni qanellni tamalkuan aturarkaugaa.

3“Cali-llu arnaq ayagyualria akqikuni camek Ataneq cikirciqniluku wall'u akqekuniu camek atunritengnaqerkaminek, atami eniini uitainanermini, 4atami niiteng'e'rmiki akqutkellri cangalliunrilkan, akqutkellni piciqliarallni-llu tamalkuita aturciqai. 5Tau͡gaam atiin akqutkellri niilluki inerquqani atuusqevkenaki, canriciiquq atunrilnge'rmiki. Atanrem au͡g'ariciqaa akqutkellrinek atiin tuaten pisqumanrilaku.

6“Uingeksailnguq arnaq akqikuni pitsaqluni wall'u umyuangcarraarpek'nani, wall'u akqikuni camek atunritengnaqerkaminek, akqillermi-llu kinguani uingekuni, 7uimi taum akqutkellni niiteng'e'rmiki canrilkekaki tamalkuita aturarkaugai. 8Tau͡gaam uingan akqutkellri niilluki inerquqani atuusqevkenaki canriciiquq atunrilnge'rmiki. Atanrem-llu au͡g'ariciiqaa.

9“Tau͡gaam aipainrem wall'u avvusngalriim aturarkaugai akqutkellni atunritengnaqerkani-llu tamalkuita.

10“Kassuusngalria-llu arnaq akqikuni wall'u akqikuni camek atunritengnaqerkaminek, 11uimi niiteng'e'rmiki cangalliunrilkan akqutellni aturarkaugai tamalkuita. 12Tau͡gaam uingan akqutellri niilluki inerquqani atuusqevkenaki canriciiquq atunrilnge'rmiki. Atanrem au͡g'ariciqaa uingan tuaten pisqumanrilaku. 13Uingan piyukuni akqutkellra aturceciiqaa, wall'u pisqumanrilkuniu pivkarpek'naku. 14Tau͡gaam niiteng'e'rmiki akqutai inerqunrilkani, akqutkellni tamalkuita aturarkaugai. Akqillra atuusqelluku qanpigainartuq inerqunrilamiu niitellermini taumi ernermi. 15Tau͡gaam niitellermi kinguqviikun akqutellri pinricen̄arteskuniki, elliinun tusngaarkauguq pinricen̄aumallrat.”

16Makut maa-i picirkiutet Atanrem cikiutekellri Moses-aamun; picirkiutnguluteng nulirqutellriignun wall'u panikellriignun tauna pania nasaurluq angutem enemini uitakan.

Yupik Bible

Yupik Bible © 2012 American Bible Society

More Info | Version Index