Search form

Numbers 31

Israel-aat Anguyagait Midianite-at

1Atanrem qanrutaa Moses-aaq, 2“Akinauruski Israel-aam yui Midianite-at ellaitnun pillratnek. Tuaten pimarikuvki tuquciquten.”

3Tua-i Moses-aam yuut qanrutai, “Ilaci angutet upciki anguyagniarait Midianite-at akinaurulluku Ataneq. 4Tamalkuitnek yuullgutkelriartainek Israel-aam yuin ayagceciniartuci tiissitsaaruqa'aqluki angutnek anguyagarkanek.”

5Tua-i cucuklirtut tiissitsaaruqa'aqluki tamalkuitnek yuullgutkelrianek Israel-aam yuin, quyurrluteng amllertaluteng qula malrugnek cipluku tiissitsaat (12,000) angutet upingaluteng anguyallerkameggnun. 6Moses-aam-llu ayagcetai anguyagyarturtelluki Phinehas-aamek Eleazar-aam agayulirtem qetunraanek atanirluki. Tauna-llu ang'aqluni Agayuuviim kencignarqellrianek akluinek, cupu'uryaranek-llu elpengcarissuutekanek. 7Anguyagluki-llu Midianite-at Atanrem alerquuciatun Moses-aaq, tuqulluki angutet tamalkuita, 8tuqutellermegnun-llu tapqulluki ukut Midian-aam atanri talliman tuqutellruit: Evi, Rekem, Zur, Hur, Reba-llu. Cali-llu tuqutellruluku Balaam-aaq Beor-am qetunraa.

9Israel-aam-llu yuin teguit Midian-aarmiut arnait mikelnguut-llu, kuluvautait-llu allat-llu cali katngautait, tukuutait-llu tamalkuita, 10ekualuki-llu nunarpait allat-llu cali uitaviit. 11Tamakut-llu tegulteng tukuutait, tapeqluki yuut ungungssiaraat-llu, 12taitait Moses-aamun Eleazar-aamun-llu, Israel-aam-llu yuinun uitallratni Moab-am carr'ilqaini Jordan-aam akiani Jericho-m nalliini.

Anguyagtet Utertut

13Moses-aam Eleazar-aam-llu yuut-llu ciulirnerita uitavimeggnek anluteng pairrsaagait anguyagtet. 14Moses-aam-llu qenrutai anguyagtet atanrit utertellret anguyaggaarluteng. 15Aptai, “Ciin arnat tamalkuita unguvavkarceciki? 16Nauwa arnat Balaam-aam ayuqucirtuutii maligtellrukiit, Peor-ami-llu Israel-aam yui picurlagtelluki Atanermun. Tamana pitekluku cangerlak tut'ellruuq Atanrem yuinun. 17Taumek waniwa tuquciki tamalkuita tan'gaurluut mikelnguut, cali-llu tuqulluki tamalkuita arnat anguciullret. 18Tau͡gaam elpeci pikarkauluki uitatniaci nasaurluut wall'u allat arnat angutem agtuqsailkai. 19Elpeci-llu tuqucillrulriani yugmek, wall'u agturallrulriani tuqumalriit temaitnek nunat elatiitni uitaniartuci ernerni malrunlegni. Erenret pingayuatni malrunelgatni-llu menuircarniartuci elpecen̄ek arnat-llu cali tegukengalci. 20Menuircarniaci-llu cali aturat tamalkuita, cali-llu menuircarluki tamalkuita piliaqumalriit qecignek, qusngirngalnguut melqurritnek, cali-llu muragnek.”

21Eleazar-aam agayulirtem qanrutai angutet utertellret anguyallermeggnek, “Makut maa-i picirkiutet Atanrem cikiutekellri Moses-aamun. 22-23Tamarmeng makut ekuayuilkai, suulutaaq, qerrirli, punerneq, cavik, qerriryak, wall'u imarkaq, menuircaumaarkaugut kenerkun. Allat tau͡gken tamarmeng menuircaumaarkauluteng merkun menuircautekun. 24Erenret malrunelgatni ervigniaci aturaci; nutaan elpeci menuirutniartuci nunanun-llu ityunariluci.”

Anguyagkun Teguallrita Avgumallrat

25Atanrem qanrutaa Moses-aaq, 26“Elpetek Eleazar-aaq-llu ilalirlutek allanek yuut ciulirneritnek, naaqiciki tamalkuita anguyallermeggni teguaqellrit, ilakluki yuut teguat ungungssiaraat-llu. 27Avveqniaci malruingurrluki, avvlerpeci aipaingit anguyagten̄un pikarkauvkarluki avgit-llu cali yugnun pikarkauvkarluki. 28Tegutniartuci Atanrem pikainek anguyallernun avvlerpecen̄ek ayuqluki yugnek ungungssiarnek-llu (ciulviit, qusngit, qusngirngalnguut) tiissitsaam avganek (500) ataucimek ilangaruqurluci. 29Tuneniaci Eleazar-aamun agayulirtem̄un elliitekluki Atanermun. 30Yugnun-llu pikesqelluki avvlerpecen̄ek tegutniartuci ayuqluki yugnek ungungssiarnek-llu yuinaak malruk qulnek cipluku (50) amllertalrianek ataucimek ilangaruqurluci. Tamakut-llu tunluki Levite-anun Agayuuviim Pelatekam aulukestainun.” 31Moses-aankuk-llu Eleazar-aaq-llu tuaten pillruuk Atanrem alerquuciatun.

32-35Makut maa-i anguyallret tegukengallrit ilakluki tegullermeggnun ellaita piknaluki: tiissitsaam avga, yuinaat-wa pingayunelgen akimiarmek cipluku tiissitsaat (675,000) qusngit qusngirngalnguut-llu, yuinaat pingayun qula malrugnek cipluku tiissitsaat (72,000) kuluviit, yuinaat pingayun ataucimek cipluku tiissitsaat (61,000) ciulviit, yuinaq qula malrugnek cipluku tiissitsaat (32,000) neviarcaraat angutem agtuqsailkai. 36-40Taukut-llu avgit anguyagtet akurtullrit amllertaluteng, yuinaat akimiaq ataucimek cipluku, akimiaq-wa malrugnek cipluku tiissitsaat, tiissitsaam-wa avga (337,500) qusngit qusngirngalnguut-llu, tuaken-llu tegulluteng tiissitsaam avga, yuinaat pingayun akimiarmek cipluku (675) Atanrem pikainek; kuluviit-wa anguyagtet akurtullrit yuinaq akimiarmek cipluku tiissitsaat (36,000), tuaken-llu tegulluteng yuinaat pingayun qula malrugnek cipluku (72) Atanrem pikainek; ciulviit-wa anguyagtet akurtullrit yuinaq qulnek cipluku tiissitsaat, tiissitsaam-wa avga, (30,500), tuaken-llu tegulluteng yuinarnek pingayunek ataucimek cipluku (61) Atanrem pikainek; neviarcaraat-wa anguyagtet akurtullrit angutem agtuqsailkai akimiaq ataucimek cipluku tiissitsaat (16,000), tuaken-llu tegulluteng yuinaq qula malrugnek cipluku (32) Atanrem pikainek. 41Moses-aam makut akiliqurautet Eleazar-aamun tunai elliitnguluki Atanermun, elliin alerquuciatun.

42-46Avgit-llu taukut yugnun cikiutekumallret amllertatkait anguyagten̄un tunumallret: yuinaat akimiaq ataucimek cipluku, akimiaq-llu malrugnek cipluku tiissitsaat, tiissitsaam-wa avga (337,500) qusngit qusngirngalnguut-llu, yuinaq akimiaq ataucimek cipluku tiissitsaat (36,000) kuluviit, yuinaq qulnek cipluku tiissitsaat tiissitsaam-wa avga (30,500) ciulviit, akimiaq ataucimek cipluku tiissitsaat (16,000) neviarcaraat angutem agtuqsailkai. 47Ukunek Moses-aaq tegutellruuq yugnek ungungssiarnek-llu yuinaak malruk qulnek ciptaqan ataucimek ilangaruqurluni, cikiutekluki-llu Levite-anun Pelatekam Agayuuviim aulukestainun Atanrem alerquutii aturluku.

48Anguyagtet-llu atanirturtaita ullagaat Moses-aaq, 49qanrulluku-llu, “Wangkuta naaqellemten̄i anguyallret atanirtuq'ngaput atauciunge'rmi cataitenrituq. 50Taumek waniwa taitaput suulutaat tangnircautet, tallirat, kulutet, aqlitet, uyamiit-llu wangkuta tegulput. Elliitekaput Atanermun unguvamten̄un akiliutekluki, elliinun camun pivkaasqevkenata.” 51Moses-aankuk Eleazar-aaq-llu ciuniurakek tamalkuita tamakut suulutaat tangnircautnguluteng taqumalriit. 52Tapeqluteng-llu tamakut atanerruat elliitekellrit usperluteng yuinaat yuinaat (400) usperet cipluki. 53Atanerruarunrilnguut tau͡gaam tegulteng avaliqluki. 54Moses-aankuk-llu Eleazar-aaq-llu agutakek suulutaat Pelatekamun, Atanermun camun pivkaasqevkenaki Israel-aam yui.

Yupik Bible

Yupik Bible © 2012 American Bible Society

More Info | Version Index