Search form

Numbers 32

Yuullgutkelriit Calaralirnerani Jordan-aam

1Yuullgutkelriartakek Reuben-aankuk Gad-aq-llu ungungssiaraucillruut. Tangllermegni-llu nuniik Jazer-aam Gilead-aam-llu ungungssinun nunakarnillinian, 2ullagakek Moses-aankuk Eleazar-aaq-llu, allat-llu cali yuut ciuliqagtait qanrulluki-llu, 3-4“Man'a nuna Atanrem ikayurluta piksagucetellra — makunek nunatarluni, Ataroth, Dibon, Jazer, Nimrah, Heshbon, Elealeh, Sibmah, Nebo, Beon-aaq-llu — assilliniuq nunaksunaqluni ungungssinun, amllerrluteng-llu ungungssiuteput. 5Canganarqenrilkan elpecen̄i cikiisqumayaaqukut mat'umek nunamek piksagutnaluku. Jordan-aaq qerarpek'naku maancugyaaqukut.”

6Moses-aam kiugai, “Ilaci-qaa anguyakata maani uitanaluci piuci? 7Ciin nalirrugcetaarceciki ilaci Jordan-aam qerallerkaanek nunamun Atanrem cikiutekellranun ellaitnun? 8Ciuliaci tuaten pillruut ayagcetlemni Kadesh Barnea-mek nuna paqtelluku. 9Ayallruut Eschol-am kuignayua tekilluku nuna tamaani tangaaluku. Tau͡gaam utercameng ilateng nalirrugcetaarait itlerkaatnek nunamun Atanrem ellaitnun cikiutekellranun. 10Ataneq tuani ernermi eq'uqercami akqillruuq qanerluni, 11‘Ukut yuut Egypt-aamek anellret allrakungelriit yuinarmek ayagnirluteng tangerrngaitaat nuna akqutkelqa cikiutekciqniluku Abraham-aamun, Isaac-aamun, Jacob-aamun-llu, tua-i-wa tamalkirrluteng maligtaqunrilatnga. 12Tamarmeng iterngaitut Caleb-aaq tau͡gaam Jephunneh-am Kenezzite-am qetunraa, Joshua-llu Nun-am qetunraa, tamarmek elluarrlua niisngallruagnga.’ 13Atanrem-llu qenqerrucamiki ayagavkallrui yuilqumi yuinaagni malrugni allrakuni imkut ellminun assiilngillret tuquluteng nangnatkaatnun. 14Waniwa elpeci ciuliarpecetun ayuqluci assiilngurtulriaruuci, arcaqanranek qenrutesqelluki Atanermun Israel-aam yui. 15Elpeci Reuben-aam Gad-am-llu yuini maligcuumiilkuvcen̄i ukut cali yuut uniciiqai maavet yuilqumun, piunriqata-llu piunrillrat elpecen̄un tusngaarkauluni.”

16Taukut ullagluku Moses-aaq qanrutaat, “Wangkuta katngauteput casguliciqaput nunaliluta-llu asvairqumalrianek irniamta uitavigkaitnek. 17Nutaan wangkuta ayagyugngariciqukut ilaput ciuliqaggluki anguyagyarturluta nunakaatnun tekiutnatkamten̄un. Ilaput tau͡gaam maantaurniartut nunat asvairqumalriit iluatni alingniurpek'nateng mat'um nunam yuinek. 18Wangkuta-llu nunamten̄un uterrngaitukut Israel-aam yuin nunakarteng piksagutnatkaatnun. 19Wangkuta ilalirluki pikamten̄ek pingaitukut Jordan-aam akiani, ak'a maa-i pikangamta Jordan-aam calaralirnerani.”

20Moses-aam qanrutai, “Ilumun tuaten piarkaukuvci waniwa Atanrem tangvallrani anguyagyartullerkarci upyuciu. 21Tamarpeci-llu caskulegni qerarciqerci Jordan-aaq, Atanrem-llu pisqutii maliggluku curugciqaci inglukesteput elliin cirlakillerkaanun, 22nuna-llu pikliutellerkaanun. Nutaan elpeci uterrniartuci pisqumalria elpecen̄un Atanermun ilavcen̄un-llu Israel-aam yuinun pimariavciu. Man'a-llu nuna calaralirnerani Jordan-aam Atanrem tangvallrani pikciqerci. 23Tau͡gaam akqutkellerci atunrilkuvciu aarcirturamci tamana assiilngiutekciqerci Atanermun. Assiilngillerci-llu pitekluku anucimirqecetaarumanrilngaituci. 24Tua-i nunalikiciki irniaci, qusngiuteci-llu casguliluki; tau͡gaam akqutkellerci pinricaqunaciu!”

25Gad-am yui Reuben-aam-llu yui qanertut Moses-aamun, “Alerquucirpetun tuaten piciqukut. 26Nuliaput irniaput-llu katngauteput-llu maani Gilead-aam nunaini uitaciqut. 27Wangkuta tau͡gaam anguyagarkaulriani qerarciqukut anguyagyarturluki Ataneq ataneqluku, qanellren aturluku.”

28Tua-i Moses-aam makunek alerqurai Eleazar-aaq, Joshua-llu allat-llu ciuliqagtait Israel-aam yuin: 29“Gad-ankuk Reuben-aaq-llu yuk'enka qeraqatgu Jordan-aaq anguyagyuumaluteng Atanrem alerquutiini, ikayuqluki-llu elpeci nuna piksaguskuvciu, Gilead-aamek nunakaatnek cikiqiciki. 30Tau͡gaam Jordan-aaq qeranrilkatgu anguyagyarturluteng nunakaatnek cikiqiciki Canaan-aami.”

31Gad-ankuk Reuben-aaq-llu yuk'ek qanertut, “Wangkuta Atanrem alerquuciatun piciqukut. 32Pisqellra maliggluku qerarciqukut anguyagyarturluta Canaan-aamun, piku'urniarput nunautvut calaralirnerani Jordan-aam.”

33Moses-aam-llu pikitai Gad-am yui, Reuben-aam yui, Manasseh-m-llu yuin avgit, tamalkuan nunautellranek King Sihon-aam Amorite-am King Og-am-llu Bashan-aarmium, nunautekenka-llu avatiigni nuna nunarrartuumaan. 34Gad-am yuin nautenqigtait ukut asvairqumalriit nunat, Dibon, Ataroth, Aroer, 35Atroth Shophan, Jazer, Joghehah, 36Beth Nimrah, Beth Haran-aaq-llu. 37Reuben-aam-llu yuin napartenqiggluki Heshbon, Elealeh, Kiriathaim, 38Nebo, Baal Meon (uum atra cimiumauq), Sibmah-llu. Nunat nautenqigtelteng nutaranek acirturluki pillruit.

39Manasseh-m-llu qetunraan Machir-aam yun'i-llu anguyagluku Gilead-aaq piksagutellrua, Amorite-at tamaantellret tamaaken anlluki. 40Moses-aam-llu cikiutekluku Gilead-aaq Machir-aam yuinun taukumiungurrluteng-llu. 41Jair-am-llu qetunraan Manasseh-m curugluki tegullrui nunacuaraat ilait acirluki-llu “Nunacuarai Jair-am.” 42Nobah-m-llu cali anguyagluku tegullrua Kenath-aaq nunarrartuuman, acinqiggluku-llu Nobah-mek, elliin at'minek.

Yupik Bible

Yupik Bible © 2012 American Bible Society

More Info | Version Index