Search form

Numbers 33

Ayallrat Egypt-aamek Moab-amun

1Makut maa-i Israel-aam yuin ilakelriartaqluteng arulairvik'lallrita atrit Egypt-aamek ayallermeggni ciuliqagterluteng Moses-aankugnek Aaron-aamek-llu. 2Atanrem alerquutai aturluki Moses-aam igauqurallrui arulairviklermeng atrit.

3Israel-aam yui ayallruut Egypt-aamek iralut ciuqliat ernengqertelluku akimiarmek, Kituutem atuqerraallermeng unuaquani. Atanrem cayailkuciumaluki unitellruat nunarpak Rameses-aaq tangvagterluteng Egypt-aarmiunek. 4Ayallruameng Egypt-aarmiut tungmagcinginanratni angutnek yung'eqarraarutmeggnek Atanrem tuquvkallrinek. Tuaten pillermikun Atanrem nasvallrua pininrucini Egypt-aarmiut agayutaitni.

5Israel-aam yui Rameses-aamek ayiimeng Sukkoth-amun arulaillruut. 6Sukkoth-amek-llu ayiimeng Etham-aamun arulairluteng yuilqum engeliini uitalriamun. 7Etham-aamek-llu ayiimeng uterrluteng ayagtut Pi Hahiroth-aamun calaralirnerani Baal Zephon-aam, arulairluteng-llu yaaqsigpek'naku Migdol-aaq. 8Pi Hahiroth-aamek ayiimeng imarpik Red Sea-q qeraraat Shur-am yuilqurtaanun; ernerni pingayuni ayaumarraarluteng arulairtut Marah-mun. 9Marah-mek ayiimeng Elim-aamun ayallruut, tuani-llu qula malrugnek mermek nunamek ulvelriartangqellinian yuinarnek-llu pingayunek qulnek cipluku (70) napatarluni tuavet arulairtut.

10Elim-aamek ayiimeng arulairtut imarpiim Red Sea-m canianun. 11Tuaken-llu ayiimeng arulairluteng Sin-am yuilqurranun. 12Sin-am-llu yuilqurranek ayiimeng arulairluteng Dophkah-mun. 13Dophkah-mek-llu ayiimeng Alush-amun arulairluteng. 14Alush-amek-llu ayiimeng Rephidim-aamun mer'ilngurmun arulairluteng.

15-37Rephidim-amek ayallermeggni ingrimun Hor-amun arulairaqluteng pilallruut makunun: Sinai-am yuilqurranun, Kibroth Hattaavah-mun, Hazeroth-amun, Rithmah-mun, Rimmon Perez-aamun, Libnah-mun, Rissah-mun, Kehelathah-mun, Mount Shepher-aamun, Haradah-mun, Makheloth-amun, Tahath-amun, Terah-mun, Mithkah-mun, Hashmonah-mun, Moseroth-amun, Bene Jaaken-aamun, Hor Haggidgad-aamun, Jotbathah-mun, Abronah-mun, Eziongeber-aamun Zin-am yuilqurtaanun (tauna Kadesh-auguq), ingrimun-llu Mount Hor-amun Edom-aarmiut nuniita engeliini.

38Aaron-aam-llu agayulirtem mayuraa Ingriq Hor-aq Atanrem pisqen͞gani. Tuani-llu tuquluni, allrakut yuinaak malruurteqerlukek Israel-aam yuin Egypt-aamek anellrata kinguani, tallimiit iralut ataucimek ernengellrani. 39Yuinaat arvinelgen pingayunek cipluku (123) allrakungluni Aaron-aaq tuqullruuq tuani.

40Canaan-aam ungalalirnerani uitalriim Arad-aam angayuqran niitai agiirrniluki Israel-aam yui.

41-49Ingrimek Hor-amek ayallermeggni Israel-aam yui Moab-am carr'ilqainun arulairaqluteng makunun pilallruut: Zalmonah-mun, Punon-aamun, Oboth-aamun, Abarim-aam-llu imenrinun Moab-am nuniini, Dibon Gad-amun, Almon Diblathaim-aamun, Abarim-aam ingriinun ingrim Nebo-m yaaqsinrilkiini, Moab-am-llu carr'ilqainun kuigani Jordan-aam Jericho-m akiani, akuliigni Beth Jeshimoth-am Kuignayuum-llu Acacia-m.

Ayuqucirtuutait Qerarpailgatgu Jordan-aaq

50Atanrem-llu qanrutaa Moses-aaq tuani Moab-am carr'ilqaini Jordan-aami Jericho-m akiani, 51alerqurluku makunek Israel-aam yuin pillerkaitnek: “Qanruski Israel-aam yui, Jordan-aaq qeraquvciu Canaan-aamun, 52ayagceskiciki nunam tamatum yui. Navgurluki-llu tamalkuita teggalqut caviit-llu agayutait agayularviit-llu. 53Nuna piksagulluku uitaviksagutniarci, wiinga cikiutekellruamku piksagutesqelluku. 54Nall'arcetaarutetgun nuna avegniarci naumallgutkelrianun, yugyalriit naumallgutekluteng angelrianek cikiraqluki, yugkilnguut-llu angenrilngurmek. 55Tau͡gaam antenrilkuvceteng tamatum yui, tamakut unegtellret arenqianarqelarciqut 'verutetun iivcen̄i wall'u qerruarutetun qaivcen̄i, ingluliurluci-llu callugciqaiceci. 56Antenrilkuvciki wiinga piunrirciqamci tamakut piunrirnaluki pillrucimtun.”

Yupik Bible

Yupik Bible © 2012 American Bible Society

More Info | Version Index