Search form

Numbers 34

Nunam Engelai

1Atanrem Moses-aaq qanrutaa 2waten alerquusqelluki Israel-aam yui: “Itquvci Canaan-aamun wiinga cikiuteklemnun elpecen̄un waten engelkiuqiciu. 3Ungalalirnera nunautevci engelii ayagnirniarci Zin-am yuilqurranek ayagtelluku-llu Edom-aarmiut nuniita engeliikun. Calaralirnera-llu ayagnirluku Dead Sea-am iquanek ungalalirnermek. 4Tuaken-llu ungalatmun caqirrluni Akrabbim-aam tungiinun, Zin-akun-llu ayagluni iquklilluni Kadesh Barnea-mun. Tuaken-llu ayagluni Hazar Addar-amun Azmon-aaq tekilluku, 5tuaken-llu kuignayuum tungiinun caqirrluni Egypt-aam nuniin engeliinun, iquklilluni imarpigmun Mediterranean-aamun.

6“Imarpik Mediterranean-aaq kanaknalirnerem engelekciqaa.

7“Neglirneq nunautevci engelii imarpigmek Mediterranean-aamek ayagluku piniarci Ingrimun Hor-amun, 8tuaken-llu Hamath Pass-amun cali-llu ayagluni Zedad-amun 9Ziphron-aamun-llu, iquklilluni Hazar Enan-aamun.

10“Calaralirneq-llu engelii Hazar Enan-aamek ayagluni Shepham-amun. 11Tuaken-llu ungalatmun ayagluni Harbel-aamun calaralirnerakun Ain-am, ayagluni-llu cali qeminun calaralirnermi cen̄iini nanvam Galilee-am. 12Tuaken-llu cali ayagluni ungalatmun kuik Jordan-aaq aturluku Dead Sea-mun anellranun.

“Ukut waniwa cetaman engelkeciqai nunautevci.”

13Moses-aam qanrutai Israel-aam yui, “Man'a maa-i nuna piksagutarkarci nall'arcetaarutekluku, Atanrem alerquutekellra cikiutekesqelluku qulngunrita'arnun avek-wa yuullgutkelrianun. 14Yuullgutkelriartakek Reuben-aankuk Gad-aq-llu calaralirnermi-llu uitalriit avgit yuin Manasseh-m akurtullruut nunautekameggnek avgumaluni ilakuralriartait cuqekluki 15calaralirnerani Jordan-aam, Jericho-m akiani.”

Ciulirneret Avgistekat Nunamek

16Atarem qanrutaa Moses-aaq, 17“Eleazar-aam agayulirtem Joshua-m-llu Nun-am qetunraan avegciqakek nuna yugnun. 18Ikayurkakegnek piniartuci ilangaruqurluci ataucitaarluki yuullgutkelriit ciulirnerita ilaitnek.” 19Maa-i makut Atanrem cucukellrin angutet atrit:

Kinguvrinek Judah-m, Caleb-aaq Jephunneh-m qetunraa.

20Kinguvrinek Simeon-aam, Shemuel-aaq Ammihud-aam qetunraa.

21Kinguvrinek Benjamin-aam, Elidad-aaq Chislon-aam qetunraa.

22Kinguvrinek Dan-am, Bukki Jogli-m qetunraa.

23Kinguvrinek Manasseh-m, Hanniel-aaq Ephod-aam qetunraa.

24Kinguvrinek Ephraim-aam, Kemuel-aaq Shiphtan-aam qetunraa.

25Kinguvrinek Zebulun-aam, Elizaphan-aaq Parnach-aam qetunraa.

26Kinguvrinek Issachar-am, Paltiel-aaq Azzan-aam qetunraa.

27Kinguvrinek Asher-aam, Ahihud-aaq Shelomi-m qetunraa.

28Kinguvrinek Naphtali-m, Padahel-aaq Ammihud-aam qetunraa.

29Makut maa-i Atanrem nakmikellri Israel-aam yuinun nuna avgesqelluku Canaan-aami.

Yupik Bible

Yupik Bible © 2012 American Bible Society

More Info | Version Index