Search form

Numbers 35

Nunarpiit Levite-anun Allakaumalriit

1Moab-am carr'ilqaini kuigmi Jordan-aami Jericho-m akiani Atanrem qanrutaa Moses-aaq, 2“Alerqurki Israel-aam yui nunameggni akurtuq'ngameggni nunarpiit ilaitnek Levite-at uitavigkaitnek cikiisqelluki, avatait tamakut nunarpiit ungungssiutaitnun uitavigkauluni. 3Nunarpiit makut Levite-at pikciqait uitavikarkauluki. Maraq-llu avataitni kuluvautaita allat-llu ungungssiutaita uitavigkaqluku. 4Tamana-llu maraq cuq'liumaarkauluni nunarpiim qacarneranek tiissitsaam avganek yaaltanek elatmun avataini tamalkuita, 5yaassiigenqelriaruarkauluni maraq, menglai cetaman taktaaqluteng tiissitsaanek yaaltanek, nunarpak qukamenani. 6Cali-llu Levite-at cikirniaci arvinlegnek nunarpagnek qimagvigkanek, yuk pitsaqa'artevkenani ilaminek tuqucikuni tamakut iliitnun qimagarkauluni. Taukunun-llu cali ilakluki yuinaak malruk malrugnek cipluku (42) cali allanek nunarpagnek cikirniaci 7maramek avatetuumaita, tapeqluteng nunarpiit amllertaluteng yuinaak malruk pingayunlegnek cipluku (48). 8Nunarpiit-llu Levite-anun cikiutekait kinguveqellrianun ataarkauluteng yugyagtaciitnun nunautiita-llu angtaciitnun. Yugyalriani nunauterpaulriani-llu amllenruarkauluteng, yugkilngurni-llu nunautait-llu mikellrulriani ikgellruluteng.”

Nunarpiit Qimagvigkaat

9Atanrem qanrutaa Moses-aaq 10qanrutesqelluki Israel-aam yui: “Qeraquvciu kuik Jordan-aaq iterluci-llu Canaan-aamun, 11cucuklirciquci nunarpagnek yuut pitsaqevkenateng tuqucillret qimagvigkaitnek. 12Tuani qimaumalarciquq tuqumalriim tungayainek akinauringnaqellrianek. Tuqucilleq tauna tuqucimaarkaunrilan qanercetaarumavailegmi. 13Cucuklirluci arvinlegnek nunarpagnek, 14pingayunek calaralirnerani Jordan-aam, pingayunek-llu Canaan-aami. 15Taukut arvinelgen nunarpiit qimagviuniartut Israel-aam yuinun, allanernun, wall'u carrarmek wall'u ak'anun uitalrianun. Kina imna pitsaqa'artevkenani tuqucilria qimagyugngaluni taukut iliitnun.

16-18“Tau͡gaam yuk tuqucikan caskulirluni cavigmek wall'u teggalqumek wall'u muragmek, nallunaunani pitsaqluni tuqucilriaruuq. Tauna tuquskiciu. 19Tuqutaullrem taum malleggluku tungelqurran tuqutarkaugaa tauna tuqucilleq tangerquniu.

20“Angutem-llu eq'ukekni tuquskaku callugluku wall'u camek milqerluku 21wall'u tenglugluku, pitsaqluni tuqucilriaruami tuqucimaarkauguq. Tuqutaullrem taum malleggluku tungelqurra pillerkiurumauq tauna tuqucilleq tuqutarkauluku tangerquniu.

22“Tau͡gken cali angutem eq'ukenrilken̄i pitsaqa'artevkenaku tuquciiqaa, iqulluku wall'u camek milqerluku. 23Wall'u murilkevkenani teggalqumek milqaquni, yuk-llu pitsaqa'artevkenaku nall'arciiqaa tuquvkarluku, inglukestekevkenaku-llu. 24Watnalriamek pilriartangqerqan yuut cuqciiqagket tuqucilleq tungelqurra-llu akinaurutestekaa, picirkiuteteng aturluki. 25Yuut-llu anirturarkauluku tauna pitsaqa'artevkenani tuqucilleq tungelqurranun tuqutellran akinaurcetevkenaku, ut'rulluku-llu nunarpagmun qimagvikellranun. Tuani-llu uitaarkauluni taum nalliini agayulirten͞gunrulria tuqunatkaanun. 26Tau͡gken cali tuqucillrem uniskaku nunarpak qimagvikellni 27tuqutaullrem-llu tungelqurran tangerrluku tauna tuquskaku, watnaluni akinaurutmek tuqucilria pinarqelriarunrituq. 28Tua-i-wa angun tauna tuqucilleq uitaurararkauyaaqngan tuani nunarpagmi qimagviklermini agayulirten͞gunrem tuqunatkaanun. Tuqullran tau͡gaam kinguani utercugngariarkauluni kingunerminun. 29Makut picirkiutet atuugarkaugut elpecen̄un kinguverpecen̄un-llu nani uitallerpecen̄i.

30“Yuk yuullgutminek tuqucilria tuqucimaarkauguq atauciunrilngurmek tau͡gaam nallunritestengqerquni. Ataucim yuum nallunritesten͞guluni qanellrakun pinaqniluku tuquciarkaunrituci. 31Pitsaqluni tuqucilleq tuqucimaarkauguq. Akilirluni anagciigataa anucimirqecetaarutkani. 32Angun qimalleq nunarpagmun qimagviulriamun akilirtelluku utertessngaitarci kingunranun agayulirten͞guneq tuquvailgan. 33Tuaten pikuvci menuurceciiqerci nuna uitavigci. Pitsaqluni tuqucilriim menuurtelaraa nuna, taum-llu tuqucillrem tuqucimallran avatiini allamek menuircautekaunani nuna yuum tuqutauvikellra. 34Menuliryaqunaciu nuna uitavigci, wiinga Atanruama, Israel-aam-llu yui uitavikluki.”

Yupik Bible

Yupik Bible © 2012 American Bible Society

More Info | Version Index