Search form

Numbers 36

Paitarkait Arnat Uingellret

1Ciulirnerita ilakuralriit naumavillgutelget Gilead-aamek, qetunraanek Machir-aam tutgariin Manasseh-m Joseph-aam qetunraan, ullagaat Moses-aaq yuut-llu ciuliqagtait. 2Qanrulluki-llu, “Atanrem alerqullruaci nuna avegturaasqelluku Israel-aam yuinun nall'arcetaarutetgun. Cali-llu alerqurluci Zelophehad-am tungayamta nunautii piksagutevkaasqelluku paniinun. 3Tau͡gaam uingekuneng allanek yuullgutkelriartainek Israel-aam yuini, taukut yuullgutkelriit piksagutarkaungamegteggu, nunamek paitarkamten̄ek allurciiqaitkut. 4Jubilee-q-llu Israel-aam yuin angiciyaraat tekiskan, cat kiputelluki tunumallret utercaraatni nakmiin pikestem̄eggnun, nuna taukunun arnanun pikiuteklerci uingita piksagutarkaugaat, nunautvut-llu wangkuta ikgelikanirarkauluni.”

5Tua-i Moses-aam mat'umek Atanrem alerquutiinek Israel-aam yui qanrutai, “Manasseh-m kinguvri piciulriamek qanertut, 6taumek Ataneq qanertuq Zelophehad-aam panii umyuarteng aturluku uingyugnganiluki, tau͡gaam ilakutameng iliitnek piarkauluteng. 7Paitarkait Israel-aam yuin nugtarcimaarkaunritut allanun yuullgutkelrianun; Israel-aam yuin tamarmeng tegumiaqerkaungamegteki ciuliameggnek paitaqelteng. 8Arnat-llu tamarmeng paiciutekluku piutengellret ilakellgutkelriani Israel-aam yuini uingelararkauluteng ilakellgutkelriartami taukut tau͡gaam iliitnek. Waten piluteng ellaita ciuliarita paiciutait ellaitnun kinguvarluteng. 9Taumek yuut paiciutellrit nugtarcimaarkaunritut allanun ilakellgutkelrianun, Israel-aam yuin tamarmeng tegumiaqerkaungamegteki ciuliameggnek paitalteng.”

10-11Zelophehad-aam-llu panii, Mahlah, Tirzah, Hoglah, Milcah, Noah-llu tuaten pillruut Atanrem Moses-aakun alerquutii aturluku, uingluteng tungayameggnek. 12Uingellruut Manasseh-m Joseph-aam qetunraan kinguvrinek nunautiit-llu atiita yuullgutkelriarini uitaluni.

13Makut maa-i picirkiutet Atanrem cikiutekellri Israel-aam yuinun Moses-aakun Moab-am carr'ilqaini kuigmi Jordan-aami Jericho-m akiani.

Yupik Bible

Yupik Bible © 2012 American Bible Society

More Info | Version Index