Search form

Numbers 5

Menuulriit Yuut

1Atanrem qanrutaa Moses-aaq, 2“Alerqurki Israel-aam yui anevkaasqelluki uitaviatnek tamalkuita mamyuilngulget, maqellriamek-llu callanelget, menuurtellret-llu tuqumalriim temii agturluku. 3Uitavigpecen̄ek makut menuulriit anevkarciki, uitavigci menuurcetenritniaraat wiinga uitalaama akunlevcen̄i.” 4Israel-aam yui niilluteng anevkarait tamalkuita mamyuilngulget uitavimeggnek.

Akiliutekai Yuum Ilaminek Picurlak'ngellrem

5Atanrem qanrutaa Moses-aaq, 6“Yuk piciuvkenani Atanermun assiilngiquni ilaminun assinrilngurmek piluni, 7apervikuanarquq assiilngurmek atullerminek akiliriluni-llu pisqumalria akiliutekaq avgan cali ikgellranek ilaluku taumun assiitellriamek pillerminun. 8Tau͡gaam yuk tauna assiitellriamek pillra tuqullrukan tungayaunani-llu canimelngurmek akiliutiin akurturtekaanek, Atanermun tunciqaa agayulirten̄un pikarkauvkarluku. Una-llu akiliun ilatekciqaa, angucalum qusngim atuullrem menuircautekluku taumun picurlallermun. 9Cali-llu elliiyarat avatiitni Israel-aam yuin elliitait Atanermun agayulirtem ciuniurtiita pikarkauluki. 10Elliitet tamakut agayulirtem ciuniurtiin pikarkauluki.”

Nuliameggnek Paqnayulrianun Piarkat

11Atanrem cali qanrutaa Moses-aaq, 12“Qanruski Israel-aam yui: angutem nulirra allaliuqan, 13akusrarutekevkarluni uimi nalluani, elpekumavkenani-llu tangvagtailami angustaunani-llu akusrarutekevkallermini; 14uinga-llu paqnayukuni qungyautekluku-llu nuliani akusrarutekevkalleq; wall'u paqnakekuniu nuliani caruyaksailengraan; 15Taum angutem agayulirtem̄un ullauciiqaa, picirkiun-llu aturluku tuatnalrianun elliitekaminek ang'aqerkauluni, malrugnek usperegnek mukaamek uqirpek'naku, tepkegcarpek'naku-llu, paqnayulriim angutem nuliaminek elliitekngaku, tuaggun nallunrirarkauluku ilumun akusrarutekevkaqsailkan, wall'u akusrarutekevkallrukan.

16“Agayulirtem-llu arnaq tauna iluvauciiqaa Atanrem ciuqerranun; 17agayulirta-llu merr'armek pirraarluni qikukun assigtakun tauna urr'armek Pelatekam Atanrem alailarvian natranek tegulluni avuciqaa qatlinarivkarluku. 18Agayulirtem-llu arnam taum nuyai angiqaarluki elliitellermek mukaamek tegumiirciqaa. Agayulirtem elliin tegumiaqluku imna meq qatlinarqelria aniqlaatmek tap'lek. 19Agayulirtem-llu ukvernarcarivkarciqaa waten qanerluni, ‘Akusrarutekevkaqsailkuvet menuurrluten elpenek uituumallerpeni aniqlaan uuggun merkun elpenun tut'arkaq cateksaqunaku. 20Tau͡gaam akusrarutekevkallrukuvet, 21Atanrem aniqlaatngurceskiliu atren yugpeni, amelgegken-llu eqevkarlukek aqsiigken-llu qerrurtellukek. 22Mer'em uum aqsaqurpenun tuskuni aqsiigken qerrurceskilikek amelgegken-llu eqevkarlukek.’ Arnaq-llu kiuciquq, ‘Aa-ang; tuaten pikili.’

23“Agayulirtem-llu aniqlaan igauqaarluku igallni erurciqaa taumun mermun qatlinarqelriamun. 24Taumek-llu arnaq mercepailegmiu, aipaagni nangtequtekaanek, 25agayulirtem teguciqaa mukaaq elliitngulleq arnam unatainek yagulluku-llu allakarluku Atanermun ekuavigmun-llu elliluku. 26Agayulirta-llu unatmi imaanek tuaken mukaamek tegulluni umyuaqutnguluku elliitekciqaa ekualuku ekuavigmi, nutaan-llu arnaq taumek qatlinarqelriamek mertelluku. 27Mercetellran kinguani, akusrarutekevkallrukan mer'em taum cakneq aqsiigkenek nangteqevkarciqaa, aqsiik qerrurtellukek amelga-llu eqevkarluku. Atra-llu aniqlaateksagulluku yuin. 28Tau͡gken akusrarutekevkaqsailkuni catekngaunaku tauna irniangyugngaarkauluni-llu.

29-30“Una alerquutnguuq angun qungyaqan paqnayugluni nuliaminek akusrarutekevkallruyukluku. Arnaq nangercetarkauluku ekuaviim ciuqerranun, agayulirtem-llu man'a caliaqerkauluku tuani. 31Uinga camek pinarqutaituq, tau͡gaam arnaq pinarqutengqerquni elliin ellminek pikiurallni aturciqaa.”

Yupik Bible

Yupik Bible © 2012 American Bible Society

More Info | Version Index