Search form

Numbers 6

Alerquutait Nazirite-at

1Atanrem qanrutaa Moses-aaq, 2“Israel-aam yui qanruski: angun wall'u arnaq akqikan Naze­ri­te-am akqutiinek alla­karlu­ni Atanrem, 3merngaituq wine-amek wall'u taangamek. Mer'arkaunrituq merkiuramek wine-arkat atsaitnek piliaqumalriamek, nerngaunani-llu wine-arkanek atsanek qecunerra'arluki wall'u kinrumaluki. 4Allakaumallermi taktaciatun wine-arkanek nerngaituq naucetaarkaqengraitki atsat-llu qeltekengraitki.

5“Cali-llu allakaumallermi taktaciatun kepliarngaunaki nuyani ungairngaunani-llu. Allakaumallermi taktaciatun qigcignarqelriaruami nuyani ungani-llu nauvkarciqai.

6“Cali-llu allakaumallermi Atanermun taktaciatun tuqumalriim temii mallegngaitaa. 7Angayuqaqeng'e'rmikek anelgutkeng'e'rmiki-llu tuqukata menuurcessngaituq ellaitnun; Allakaumallni Atanermun qigcikluku nagutekciqaa. 8Allakaumallmi taktaciatun Atanermun qigcignarqelriaruciquq.

9“Allakaumallrem nuyai menuureskata yuum alqunaqerluni tuqulriim canianlami, erenret malrunelgureskata nuyani nangluki asmegciiqai ungairluni-llu; tuaten-llu pikuni menuirutarkauluni. 10Erenret-llu pingayunelgatni taitarkauluni malrugnek yaquleyagaagnek agayulirtem̄un Pelatekam amiiganun. 11Agayulirtem-llu aipaa elliitekciqaa assiilngurmun au͡gautekauluku aipaa-llu ekuagarkauluku, menuircarluku tauna tuqumalriim temiinun mallgutleq. Tuani-llu cali ernermi taum allakanqigtarkauluki nuyani Atanermun. 12Elliin-llu cali allakaumallni Atanermun nutarrluku. Ciuqliq allakaumallra Atanermun piciunrituq menuurtellruami. Elliitekaminek-llu taitarkauluni pinarqutminun ataucimek allrakungelriamek qusngiyagarmek.

13“Yuum-llu allakaumalriim akqutkellni iqukliskuniu, waten piarkauluni: Pelatekam amiiganun agluni 14elliigarkauguq Atanermun pingayunek ungungssiarnek natlugnerilngurnek: ataucimek allrakungelriamek qusngiyagarmek elliitnguarkamek ekualuku, ataucimek-llu arnacalumek qusngiyagarmek assiilnguut au͡gautekaatnun elliitekamek, angucalumek-llu ilakucaramun elliitekamek. 15Elliitni-llu cali ilaluki assigtam imainek quulecirailngurnek kelipanek: mamtulrianek kelipanek taqumaluteng mukaamek uqiumalriamek olive-aam uquanek cali-llu mamkilngurnek cake-aayaarnek olive-aam uquanek qaingitgun minguumalrianek, cali-llu ilaluki pisqumalrianek elliitnek mukaarkanek wine-amek-llu.

16“Makut tamalkuita agayulirtem elliitekciqai, cali-llu elliitekluku assiilnguum au͡gautekaanun elliitekaq, ekualuku-llu cali piarkaq. 17Tuquciiqaa-llu angucaluq qusngiq ilakuyucaramun elliitekluku tapeqluki assigtam imai kelipat, cali-llu elliitekluki mukaarkaq wine-aq-llu. 18Taum-llu allakaumalriim Atanermun Pelatekam amiigani qiurraarluki nuyani elliciqai kenranun ilakuyucimun elliitem. 19Agayulirtem-llu teguluku tusga angucalum qusngim keniumalleq qallarvautelluku, kelipayagarnek-llu cali quulecirailngurnek piluni assigtam imainek, elliciqai taum allakaumallrem Atanermun unatainun, allakaumallran nallunailkutai nuyai qiurraartelluki. 20Cali-llu agayulirtem yagulluki elliitekluki, yagulluki elliiyarakun Atanermun; qigcignarqelriarurtut piksagulluki agayulirtet, tapeqluki qat'gat yagucimallret qugtuqaq-llu elliitngulleq; nutaan taum kinguani tauna allakaumalleq Atanermun wine-amek meryugngariarkauluni.

21“Makut maa-i alerquutekait allakaumalriit Atanermun; tau͡gaam allakaumalria akqillrukuni elliigarkauniluni cipluku elliillerkiurumallrat allakaumalriit, akqutkellni tamalkirrluku piarkaugaa.”

Agayulirtem Atawaqaasqiyaraa

22Atanrem alerquraa Moses-aaq 23qanrutesqelluki Aaron-aaq qetunrai-llu waten atawaqaasqilaasqelluki Israel-aam yuinek:

24Atanrem atawaqaasqelliten qaunqelluten-llu;

25Atanrem kenekliten naklekluten-llu;

26Atanrem kegginaminek qullilirliten uitanqegcivkarluten-llu.

27Ataneq-llu qanertuq, “Wiinga atqa apqatgu atawaqaasqutnguluku Israel-aam yuinun, wiinga atawaqerceciiqanka.”

Yupik Bible

Yupik Bible © 2012 American Bible Society

More Info | Version Index