Search form

Numbers 8

Kenurrat Nekaitnun Ellillrat

1Atanrem qanrutaa Moses-aaq, 2“Qanrusgu Aaron-aaq, Kenurrat ellikuvki manutmun ciqinqerarkaurtelluki pikiki.” 3Aaron-aaq-llu tuaten piuq elliluki kenurrat manutmun ciqinqerarkaurtelluki, Atanrem alerquuciatun Moses-aaq. 4Kenurrarvik-llu tauna taqumauq mulut'uugumalriamek suulutaamek, aciminek ayagluni kangminun Atanrem ayuqucirtuutekellra aturluku.

Menuircaumallrat Naaqicimallrat-llu Levite-at

5Atanrem qanrutaa Moses-aaq, 6“Allakarki Levite-at Israel-aam yuinek menuircarluki-llu 7waten: mermek menuircautmek ciqertarluki qaingitni-llu tamalkuita melqurrit ungairutakun keligluki, aturait-llu ervigtelluki. Tuaten pikuneng menuiruciiqut. 8Taitelluki-llu nulirteyagarmek tapirluku mukaarkanek elliitnek olive-aam uquanek urcimalrianek, cali-llu allamek nulirteyagarmek assiilnguum au͡gautekaanun elliitekamek. 9Yuut quyurcetraarluki Levite-at nangercetniaten Pelatekam Atanrem alailarvigkaan ciuqerranun. 10Yuut-llu unataitnek pategtelluki Levite-at qamiqurritgun, 11nutaan-llu Aaron-aam allakarciqai Levite-at Israelite-anun wangnun elliitekevkarluki, ellaita caliaqniaraat caliaka. 12Cali-llu Levite-at unateteng elliciqait nulirtet qamiqurritnun; elpet-llu atauciq elliitekciqan assiilnguum au͡gautekaanun, aipaa-llu ekuagarkauluku Atanermun, Levite-at assiilnguita au͡gautekaatnek.

13“Levite-at kevgiulriarurceciiqaten Aaron-aamun qetunrainun-llu, elliitnguluki wangnun yagulluku elliiyarakun. 14Waten piluki allakarki Levite-at Israel-aam yuinek, wiinga piksagutnianka. 15Levite-at-llu menuircaumarikuvteng elliitekumariluki-llu yagulluku elliiyarakun, ayagluteng Pelatekamun kevgiuryarturniaraatnga. 16Wiinga piksugluki pillruanka enairulluki Israel-aam yuin yung'eqarraarutaitnun, wiinga kiima piknaluki. 17Tua-i-wa Israel-aam yuin yung'eqarraarutait tamalkuita wiinga piksagutellruamki, yuungraata ungungssiungraata-llu; tuani ernermi tuqurqellemni yung'eqarraarutait Egypt-aarmiut, Israel-aam yuin yung'eqarraarutait allakallruanka wiinga pikarkaurrluki. 18Maa-i-llu wiinga teguanka Levite-at enairulluki yung'eqarraarutaitnun Israel-aam yuin. 19Wiinga-llu cikiutekanka Levite-at Israel-aam yuinek Aaron-aamun qetunrainun-llu, ellaitnun calicit'laasqelluki yuut Pelatekami, cali-llu assiilnguita au͡gautekaatnek pilaasqelluki, cangerlagpiit tut'esqevkenaki Israel-aam yuinun pitsaqevkenani yuut iliita Agayuvik malkaku.”

20Waten pillruit Levite-at Moses-aam Aaron-aam Israel-aam-llu yuin; Atanrem alerquutellra Moses-aamun aturluku Levite-at pitekluki. 21Levite-at-llu menuircartut assiilngurmek ervigluki-llu aturateng; Aaron-aam-llu elliitekai yagulluku elliiyarakun Atanrem ciuqerrani, cali-llu ekuagiluni assiilnguita au͡gautekaatnek. 22Yuut-llu piurallruit tamalkuita Atanrem alerquutekellri Moses-aamun Levite-anun pisqelluki. Tamatum-llu kinguani Levite-at agellruut Pelatekamun kevgiullerkarteng Aaron-aamun qetunrainun-llu caliaqsarturluku. 23Atanrem qanrutaa Moses-aaq, 24“Allrakungellermeggnek yuinaq tallimanek cipluku (25) Levite-at caliyugngalarciqut Pelatekami, 25arulairaqluteng yuinaak malruk qulnek cipluku (50) allrakungaqameng. 26Taum kinguani Agayuvigmi ikayuayugngaciqait, tau͡gaam kiimenateng caliarkauvkenateng. Waten ayuqluki calivkalarciqaten Levite-at.”

Yupik Bible

Yupik Bible © 2012 American Bible Society

More Info | Version Index