Search form

Numbers 9

Aipiriluku Kituutem Atullra

1Cali Ataneq qanellruuq Moses-aamun Sinai-am yuilqurrani allrakum aipaan iraluin ciuqliatni anellrata Egypt-aam nuniinek, qanerluni, 2“Israel-aam yuinun Kituun aturteskiu piyaraani. 3Ernengkan akimiarunrita'armek tauna iraluq, atakumi aturniarci piyaraa tekiskan; alerquusngalriit tamalkuita taum atullerkaanun aturluki piniartuci.” 4Tua-i Moses-aam qanrutai Kituun atuusqelluku. 5Kituun-llu aturaat iralut ciuqliatni akimiarunritariitni erenrin atakumi Sinai-am yuilqurrani; Atanrem alerquutellra Moses-aamun aturluku tua-i tuaten pillruut Israel-aam yui. 6Tau͡gaam yugtangqellrulliniuq menuurtellernek agtullrulliniamegteggu tuqumalriim temii, Kituun-llu aturciiganaku tuani ernermi; taumek tuani ernermi taukut ullallrulliniagket Moses-aankuk Aaron-aaq-llu. 7Waten-llu qanrullukek, “Wangkuta menuulriaruukut agtullruamteggu tuqumalriim temii; ciin elliisciigatevkarcecikut piyarami ilaput Israel-aam yui ilagarluki?” 8Moses-aam-llu kiugai, “Uitaqerci niitnatkamnun Atanermek qaillun piarkaucirpecen̄ek.”

9Atanrem-llu qanrutaa Moses-aaq, 10“Israel-aam yui qanruski, Ilasi wall'u kinguverpeci iliit agturluku tuqumalriim temii menuurtellrung'e'rmi wall'u ayaumallrunge'rmi, Kituun aturyugngaciqaa Atanermun. 11Erenret akimiarunritariitni iralum aipaan atakumi atularciqaat; ner'arkauluku avuluku quulecirailngurnek kelipanek qatlinarqelrianek-llu naunrarnek. 12Ilakuingaunateng-llu unuaqullerkaanun, enranek-llu ayemcingaunateng; atullerkaanun-llu alerquusngalriit tamalkuita maligtaquluki aturarkauluku. 13Tau͡gaam yuk menuileng'e'rmi ayaumanrilngermi-llu Kituun aturyuumiilkuniu yum'inek au͡gaumaciquq, elliiyaraq Atanermun piyaraani atunrilamiu. Assiilngillra elliinun tusngaciquq. 14Allanrulria-llu nunavcen̄i ilaucukuni Kituun atuquvciu pivkarciqerci, tau͡gaam Kituutem atullranun picirkiutet aturluki piarkauluni; ataucimek picirkiutengqerciquci nutem tamatum yuinun allanrungraata-llu.”

Ekualria Amirluq

15Ernermi tuani Pelatekaq napartellratni amirlum patullrua. 16Unugaqan amirluq kenertun ayuqliriaqluni, arulaiyuunatek-llu piurallruuk, amirluugaqluni erenrani kenrurrluni-llu unugmi. 17Amirlum-llu Pelatekaq unitaqaku quliinun piluni Israel-aam yui upalallruut, natmun-llu cali arulairan ellait-llu tuavet arulairluteng. 18Atanrem alerquraqateng Israel-aam yui upalartut, cali-llu alerquraqateng arulairaqluteng; amirlum uitallran taktaciatun Pelatekam quliini uitauralartut uitavimeggni. 19Amirluq-llu uitamangraan Pelatekam quliini Israel-aam yui Atanrem picirkiutii aturluku ayayuitut. 20Tau͡gaam iliini ernerni qavcirrarni amirluq uitalartuq Pelatekam quliini, tua-i-llu Israel-aam yui uitalartut ayagluteng-llu Atanrem pisqutii aturluku. 21Iliini-llu amirluq uitalartuq atakumek ayagluni unuakumun; amirluq unuakumi nalugaqan ayagaqluteng. Tuaten piurallruut amirluq tau͡gaam nalugaqan ayagaqluteng. 22Erenregni malrugni pingraan, wall'u iralumi wall'u ak'anun, amirluq Pelatekam quliini uitaura'rqan Israel-aam yui upayuitut, nalugaqan tau͡gaam ayagaqluteng. 23Atanrem alerquutii Moses-aakun maligtaquluku uitallerkameggnun elkartelallruut wall'u upagluteng.

Yupik Bible

Yupik Bible © 2012 American Bible Society

More Info | Version Index