Search form

Sinik Abem 24

Filik am dim kot keimsiw sung uta ko.

1Kale Faul ayo dawtidiw bi am auok kal keida nade bokal kayak Ananayas ayo gebom gebom madik so sawa mit utamsa kinim am win Tedtulas so iyo tad Sesadiya abiw kal nadiwe Faul ayo gawman dukum kinim Filik alam dim kot taktakiw ka. 2Faul ayo gán dádawiw tam unane, sawa mit utamsa kinim Tedtulas ayo Faul kanadabiw weng uyo Filik bakodaw, “Au nam kamok kidel nuka kam kin modaw kalam akfak tem ken abino, kale kimis tein bom kalfal bom tein buduwade, kam aket kidel fukanin uta ta bom kinim wanang iyo imadew maek abin kidel dádaw tein bidiw ka. 3Kaleyo anang bakan adikum nuka kam kukuw kanabaw bo atin keno kal bom sun kuw kalfalin dukum kukákabuw. 4Kata naka weng kimis bakodono kanabi bá, naka weng bo katiw bakodono kanabi. Kale kaba kidilawano!” Kale nadane bako, 5“nuka kinim bela atamomo aka atin ban keimin kinim ka. Akeibuw. Kale aka anang bakan adikum Yu Kayak wanang kinim iyo aket keng wakáyamába. Kale aka Nasadin kinim gu makuw imi gebom kinim. 6Kata aka Yol am uyo kuw gulak dádono kal badano kayo nuka dew fakubuw, 7kata num un tabudin kinim kamok am win Laisiyas, aka kitid dukum kuw tabe tad num teng dim kail bá takeikudawse. 8Kale kaba kalawta am weng abo atam kal keidomo num kanadabuw bo adikum afan ka. Kalal kala.” Akeisa. 9Yu Kayak ika iliso Tedtulas wol fewiw Faul weng kanada bom bako, “am weng adikum bo afano.” Akansiw.

10Gawman Filik aka Faul bakodaw, “kawsik weng bakanalo!” Akane, Faul ayo bako, “nalam kal, kaba itol seng bakan kadák imi kinim wanang taktak ausaw. Kale naka kalfalin so tad kam mit tem tod nalam kál ged sánin weng bakodono kali. 11Kale kaba kabalawta utam kal keidalo! Naka am dánámin kilung kal keidongin banim dako aluno, naka tam Yedusalem kal Got suksukono, kale unsi. 12Yu Kayak kananábiw kinim ika mak natamiw, naka kinim so mak Yol am kal wengal fukodongin banim. Yu Kayak kawed am kal kinim so mak aket keng wakáyamongin banim ade abiw dukum kal yak abe maek abe ká bom wanang kinim aket keng mak wakáyamongin banim. 13Ade ika im kot keinabiw umi weng mit uyo mak kufi taw tei bo afano kakodiw banim ka. 14Kata naka bakokamon, naka Yesus leiw abo bom nulum awadik kasal Got win uta taken bidino, ika bako, ‘Yesus leiw bo afan báyo.’ Kalanbiw. Naka adikum ufek ufek Mosus Sawa so lum senin kinim weng so buk tem godusidiw be au be atin afan.” Kalesi. 15“Ade mew kinim imi Got am dim mimin dok diyámin taw naka mimin dok di kinim kidel kidel ika talá tabokabiw ade kinim mafak mafak so ikil iliso talá tabokabiw. Kalbi ka.

16Kaleyo naka sun kuw nam aket bo mak Got tada kinim tadiw uyo ban mak keidomino kale dufoyábi. 17Kale naka kalo abiw mak mak ká bi itol seng banima nade asiki tad Yedusalem tasi uyo nalam kinim kisol banim imi min kisol geleyamin kudew nadine Got fet dawkádawin ufek ufek kudew, au tasi. 18Naka yong mamon kidamin ban bo nadine Yol am kasadam tem kal tein álino, ika natamsidiw, kata wanang kinim seng iyo naso mak teinongin banim ade naso mak im mafak dádongin banim. 19Kata Yu Kayak madik Eisa bakan bidiw ita afan tadin nam bude ita nam namakanin weng so namti, ita ken tad kalam kibi dim kal nam kananámin weng uyo bakokamodiwo ka. 20A bede mew kinim kadák tod bidiw ilita nami tam kansol dim kot keimsi kal nam ban keimin so mak utamsidiw namti, be ikil bakokamin. 21Naka weng makuw be ki ilim kin dim kal matam tod gán dáyam, ‘nam aket afan Got ayo kinim fikalesiw iyo ifodokabano.’ Kalesi be kuw atamiw mafak bá namti, be ki bakokamino.” Akane, 22beta Filik aka Yesus ami kukuw leiw uyo atin alam kal keisa, kale aka adik adik kot atimin weng bakoyam, “un tabudin kinim kamok Laisiyas ayo tadano naka kim kot bo afetokabino.” Yakei nadane 23un tabudin kinim imi gebom weng daudaw, “kaba, Faul be dew tam kalabus am dawti kin modokabaw, kata aka ken gulbal katiw so dabadáliw tein badano, alam duw ifin ikil ufek ufek mak waktuwa be uyo dakodaw kudewlaw tadum kaliw namti, ken kudew tad dakádawino.” Akeisa.

24Si am seng banima nade gawman Filik aka alam kadel Dudusila uka Yu kayak wanang, kale uso tad Faul kalan dádiw tada am Yesus Kadais aket kudawsa weng uyo bakadaw bada kidilaw bisu. 25Kata Faul ayo kukuw kidel faku biyámin weng so alam tatun kuákeiku biyámin weng so ade taktakin am dánámin tadokabu umi weng so uyo kuek di bom bakadaw badano, Filik ayo fingánin so kei nadane bakodaw, “kuin kaba, kanodaw ki, kudá ken unalo. Naka alo yanol katow kal weng makso kidilono, kalokabi, beta ayo weng kudáli, kam finang tadokabu ko.” Akana nade 26Filik aka kanadawino Faul ata kisol mak kunamano min talá dabadálono, kale nadano kayo sun kuw gánla badano weng bakanlawsa. 27Kale bi itol alew banima nade gawman Bodsias Festas ayo tam Filik abin kudula nade Filik am aket kanodi, Yu Kayak im aket kidelyamako. Kale nadano kayo Faul ayo kalabus am kal dabadása ko.