Search form

Sinik Abem 4

Bita so Yon so kansol dim kot keimsiw sung uta ko.

1Kale bowál bowál so Yol am un tabudin kinim imi gebom so kinim mit Saddusi so iyo tad Bita so Yon so itamomo, alew ika kinim wanang weng bakaya bidiwo ika tad itam nadiwe 2aket mafak dukum kuw keiyamsa uyo watawo kaleyo bá, weng dew kámin kinim alew ika Yesus talá tabese umi sung uta kinim wanang weng kukuya bom keibiw uta ta bom atin dam kukuyam fikalanámin uyo talá tabe kaunsin ken bokabiw. Yakbu kayo ko. 3Kaleyo ika Bita so Yon so iyo imadew faku imadew kot keim unumo kaliw. Kata am kuina kabadákal kanabiw kayo imadew yak kalabus am imtidiw sidiwo amsino dánunalo kaliw ko. 4Kata wanang kinim imi kinim alew Yesus talá tabamin sung bakoyam aket dafoyamiw maek Got afan kalesidiw iyo ki kinim seng seng (5000) ausiw ko. 5Kanabi sidiwo matam kin moyámin kinim kinim so gebom gebom so sawa kukumin kinim kinim so iyo yak Yedusalem kal tada tada ausiw. 6Kale bokal kayak am win Anas aka kawákal alam muduw Kayafas, Yon, Aleksanda ade alam muduw madik iso bidiw. 7Kale ika Yon so Bita so imadew yak ilim kin gubuyo kal todiwade, ika weng dákadáyamiw ko. “Kiba yakno yakno bom nabiw ade kan imi kitid dim ade kan win tudow dim bo kanabiwe?” Yakiwe, 8Bita ayo Got Sinik Abem kiwa dausa kayo weng fakadu bakoyam, “kin moyámin kinim so gebom gebom so 9kiba num kukuw kidel kinim kun iwánsa kanodawuw kasáyase umi sung uta dákadáyabiwe? Ade kiba num dákadáyam kan ata kidel dauda kasáyaseno, kalbiwe? 10Afan namti, num aket kibil keidiw Isadael kayak wanang kinim adikum ikil keidiw, kiba be atin kidela mew kinim tad kilim kin gubuyo kadák toda be atam kal keidin kala. Aka kun iwánsa, kata Yesus Kadais Nasadet kayak kibilim anak as dim dásidiw, Got ta bom tá dafoda fikalanámin uyo kudáse ami win kitid tudow dim kinim bela atin kidelba. 11Kale Got godin weng bakosu be Yesus ami dinang bakosu, uyo bako,

‘kale am ginamin kinim kiba, tum bula mafako kale kudáliw yakabu kudásidiw, kata uta ta bom nadule kamano tum beta atin matam iwkuk midi keiba kala.’

12Kaleyo Yesus makuw aka alata kuw ken wanang kinim iyo ban keimin uyo kail bá takeikuyamoma kala. Kaleyo mew anang bakan kuw tabodu wanang kinim bidi mak Got win kitid dauyamsino ken im dim ban keimin kail bá takeikuyamodiw banim.” Yakiwe, 13kot keimin kinim ika Bita so Yon so imi aket fingánin banim keibidiw, be utayam nadiwade finang dádomo alew ika sukul mak keidongin banim ade ika takam budumin kinim kuw ka. Kale aket diking dakung bom nadiwe ika finang dádomo, kinim alew ika Yesus so makuw káwámsiw ka. Kaliw ko. 14Kata ika utamomo kinim kun iwánsa kidel daudiw kaí, alew ilim iwyak kal todbe ka. Kale nadiwade ika im weng mit banima kudá nadiwe 15kinim alew iyo imadáliw kot keimin am kudá abiw uniwe, beta kot keimin kinim ilifin gudulu bakodawa bakodawa au nadiwe kaliw ka. 16“Mew kinim bidi yaknoyamokabuwe? Yedusalem kayak wanang kinim adikum teiniw, ika alew imi dubat dubatin kukuw kanosidiw be utam atin afan kalebiw. Kayo nuka yakno yakno faltiyamoduw banim? 17Kata nuka weng kitid dauyam, kiba wanang kinim iyo Yesus win bemi sung be bakayamin báno yakuwo kanodin kukuw be yak aba maek aba sengoma banim keidako.”

18Kale nadiwe ika sawil gán dáyamiw tam uniwe, weng sawa kitid kuw bakoyam, “kiba Yesus win tudow dim weng bakanin ade kukumin bá.” 19Kata Bita so Yon so ika weng atung fakadu bakoyam, “kiba aket taktakudin kala. Au bo kukuw kidel ade bo kukuw mafak kalino. Got aka kin mobe kale kim aket nuka Got am weng kidimin bo kudá, kim weng kidiyamume? 20Bá be, nuka Got am kukuw utamsuduw ade alam weng sawa kidisuduw umi baka bom kukumin uyo kudá sading kaloluw banim.” Yakeisiw. 21Kale Yu kayak gebom gebom ika leiw sono masi, sok gei imudoliw banim, watawo kaleyo bá, wanang kinim adikum iyo kanodin kukuw kanodu bo utam Got win kufádabiw kayo ko. 22Kale kinim aka kun iwán kei bada bi itol ulumi ki deng mak ade fakadis dutamo tade tam kin kal keisa ayo kasáya daudiw, kayo Yu kayak gebom gebom ika weng dew kámin kinim iyo asawil kitid weng bakoyam kanamin báyo, yakei imadáliw unsiw ko.

Got wis sánla bom fingánin banimámin kuyamo akin sung uta ko.

23Kale Bita so Yon so iyo talá imadáliw tam abe wabading ú yak ilim kinim iyo itam nadiwade weng adikum bokal kayak as fakiw dakádawin kinim so gebom gebom so im weng bakoyamiw uyo isik kudew yak bakoyamiw ade 24Yesus afan kalin kinim iyo weng bela kidi nadiwe ilim kinim adikum iyo nikil dek amki tein, Got gánlaw bom nadiwe bako kaliw ko. “Got adikum kin modin kinim kaba, kalawta abid so bakan so wok so adikum ufek ufek im tem tem bidiw iyo kidel imusaw kinim. 25Kaba kalam Sinik Abem dim awadik Dewit kalam wok fakudin kinim bon tem leiw bakosaw uyo bako,

‘watawo kale anang bakan kuw tabodu, wanang kinim ika atin keng keiyaba? Watawo kale wanang kinim ika weng mit banim uyo gudulbiw. 26Kale bakan dim kamok kamok ika wasi ginumo kidelbiw ade ika tada tada dek amki bom Kamokim ade alam Walusa Kinim tabuduw ginumo kanabiw.’

27Kale afan Edot so Bantias Bailet so iyo tad Mifiw tademin so keidiwade Isadael kayak kinim so Yedusalem tein bidiw keidiw iyo tad kam wok fakudin kinim abem, Yesus kalam walamin kinim walusaw ayo weng gudul dau kukuw mafak kanadawsiw. 28Kale wanang kinim bidi kalam kanoduko kalesaw kaí, ita kanodiw matam dam abusu. Ade kanosu, be kalam kitid dim ade kalam kanoduko kalbaw kayo kanosu. 29Kamok kaba, kamano imi fingánin weng bakayabiw bo utayamal kala. Nuka kalam wok fakudin kinim. Kale dakoyamawo, nuka kam weng uyo fingánin banim bakan káwum kala. 30Kale kabalam wok fakudin kinim abem Yesus win tudow dim kalam kitid uyo kudálaw madák wanang kinim tá imkánin so dubat dubatin kukuw kukumin so kukuw makik makik kukumin so keimuk kala.” Kalsiw ko.

31Kale ika wis sánin uyo wis sán si banimano kalomo ilim am teinbidiw uyo bilak bilak tabuno kalomo, kinim so wanang so iyo Got Sinik Abem tabe tad kiwa imudane, ika Got weng sung uyo fingánin banim ken kitid kuw tabe bakansiw ko.

Got afan kalin wanang kinim ilim ufek ufek gelemsiw sung uta ko.

32Adikum Got afan kalin kinim iyo tada tada aket makuw keisiw uyo kinim so mak bako, “mew naka nalam ufek ufek bo nalam adik dáwo kalongin banim, kata ika adikum ufek ufek bo nikil num makuwo.” Kalsiw. 33Kale weng dew kámin kinim ika kitid dukum tuw wanang kinim bakoyam atin afan Kamok Yesus be fikale talá tabeseno yak bidiwo Got ayo atin adikum afan kalin kinim iyo im kinim dása. 34Kale adikum ika ufek ufek so mak iwongin banim. Be watawo kaleyo bá, wanang kinim iyo ilim bakan so ilim am so uyo moni mo ku kudew tad 35weng dew kámin kinim dakáya bidiwo ika moni uyo kudu kudew yak kan ita ufek ufek waktuwa bidiw iyo gele kukaya bidiwo kayo ko.

36Kale Got afan kalin kinim mak win Yosew, am kinim mit be Liwai ade am bakan be wok gung Saibadas. Kale weng dew kámin kinim ika win takudaw Bánabas, akbiw. Kale win Bánabas kalbiw, umi mit be, ‘weng im kitid sánin kinim.’ Kalbiw. 37Kale aka bakan mak kuduseno bakan uyo moni mo ku nadane kudew tad weng dew kámin kinim kuyamsa.