Search form

NAI VAKARUA 2

Sa ia tiko na nonai tukutuku ko Mosese: sa tukuna ni ka tabu na nodra veivala kei ira na kai Itomi, 1-7, kei ira na luve i Moapi, 8-15, kei na luve i Amoni, 16-23. A sa moku ga ko Sioni, 26-37.

1Eda a qai gole tani, ka lako yani ki na vanua liwa e na sala vaka ki na Wasa Damudamu, me vaka na vosa i Jiova vei au: ia eda sa tiko vakavolivolita na ulu-ni-vanua ko Sia ka bogi vuqa. 2A sa vosa vei au ko Jiova, ka kaya, 3Sa dede ga na nomudou vakavolivolita na ulu-ni-vanua oqo: dou gole tani vaka ki na tokalau. 4Ia mo vakaroti ira na tamata, ka kaya, Kemuni na lako e loma ni nodra yasana na wekamuni na luve i Iso, era tiko mai Sia; ia era na rerevaki kemuni: mo ni vakaraici kemuni vinaka kina: 5mo ni kakua ni sagai ira; ni'u na sega ni solia vei kemuni e dua na tiki ni nodra vanua, sa sega na tikina me va kina na yavamuni; ni'u sa solia na ulu-ni-vanua ko Sia vei Iso me taukena: 6kemuni na volia na kakana vei ira e nai lavo, mo ni kania; kemuni na volia talega na wai vei ira e nai lavo, mo ni gunuva. 7Ni sa vakalougatataki kemuni ko Jiova na nomuni Kalou e na cakacaka kecega ni ligamuni: sa kila ko koya na nomuni lakolako e na vanua liwa levu oqo: e vasagavulu na yabaki oqo sa tikoga kei kemuni ko Jiova na nomuni Kalou; sa sega na ka ko ni sa dravudravua kina.

8Ia eda a lako tani vei ira na wekada na luve i Iso, era tiko mai Sia, ka lako e na sala mai na vanua cecelevu mai Elaci, kei Esi-oni-keperi; eda qai gole tani ka lako yani e na sala ki na vanua liwa ni Moapi. 9A sa kaya vei au ko Jiova, Mo kakua ni vakararawataki ira na Moapi, ia mo kakua talega ni vala kei ira: ni'u na sega ni solia vei iko e dua na tiki ni nodra vanua mo taukena; ni'u sa soli Ari vei ira na luve i Loti me ra taukena. (10Era sa tiko kina eliu na luve i Emimi, a mataqali yagolevu, ka lewe vuqa, ka babalavu, me vakataki ira na luve i Anaki; 11era rogo ni ra sa tamata yagolevu sara, me vakataki ira na luve i Anaki; ia ko ira na Moapi era sa vakatokai ira, Na Emimi. 12Ko ira talega na luve i Ori, era tiko mai Sia eliu; a ra vakasavi ira ko ira na luve i Iso, ka sa vakarusai ira e matadra, ka qai tiko me kedrai sosomi; me vaka ka kitaka ko ira na Isireli ki na vanua era sa taukena, ka solia vei ira ko Jiova). 13Oqo, mo ni cavu tu, ka qalo-kosova na uciwai ko Sereti. Ia eda a qalo-kosova na uciwai ko Sereti.

14Ia mai na gauna eda a cavu tu kina mai Ketesa-parinea, ka yacova na gauna eda sa qalo-kosova kina na uciwai ko Sereti, sa tolusagavulu ka walu na yabaki; ka me sa oti laivi mada, mai vei ira nai vavakoso, nai tabatamata kecega era tamata i valu, me vaka sa bubului kina vei ira ko Jiova. 15Ia sa vala kei ira na liga i Jiova me vakaoti ira mai nai vavakoso, ka me ra oti laivi mada.

16Ia ni ra sa oti laivi kecega na tamata i valu e na mate, maivei ira na tamata, 17sa qai vosa vei au ko Jiova, ka kaya, 18Ko na lako edaidai ka mo sivi Ari, ko ya nai yalayala i Moapi: 19ia ni ko sa donui ira na luve i Amoni, mo kakua ni vakararawataki ira, se sagai ira: ni'u na sega ni solia vei iko e dua na tiki ni nodra vanua na luve i Amoni mo taukena: ni'u sa solia oti vei ira na luve i Loti me ra taukena. 20[Sa rogo talega ni sa vanua ni tamata yagolevu sara: era tiko kina eliu na tamata yagolevu sara; a ra sa vakatokai ira na Samisumi ko ira na luve i Amoni; 21era mataqali yagolevu, ka lewe vuqa, ka babalavu, me vakataki ira na luve i Anaki; ia sa vakarusai ira ko Jiova e matadra; a ra sa vakasavi ira, ka tiko me kedrai sosomi: 22me vaka ka kitaka ko koya e na vukudra na luve i Iso, era tiko mai Sia, ni sa vakarusai ira na luve i Ori mai na matadra; a ra sa vakasavi ira, ka tiko me kedrai sosomi ka yacova na siga oqo: 23kei ira na Avi era sa tiko mai na veikoro lalai, ka yaco ki Kesa, ko ira na Kapitorimi, era lako mai Kapitori, era sa vakarusai ira, ka ra sa tiko me kedrai sosomi]. 24Mo cavu tu; ka ia na lako, ka qalo-kosova na uciwai ko Arinoni: raica, ka'u sa soli Sioni na tui Esiponi, na Amoraiti, kei na nona vanua ki na ligamu: mo ia mada mo taukena, ka sagai koya e nai valu. 25Au sa vakatekivu edaidai me'u vakatubura vei ira na veimatanitu kecega e ruku i lomalagi, me ra rerevaki iko, ka me ra domobula e na vukumu, ko ira era sa rogoca na kemui rogorogo, a ra na sautaninini, ka kani yatedra e na vukumu.

26Ia ka'u a vakatadu mata mai na vanua liwa ko Kitemoci kivei Sioni na tui Esiponi, ka tukuna vua na vosa ni sautu, ka kaya, 27Me'u lako mada e nomu loma ni vanua: au na lako tu ga e na salatu, au na sega ni gole yani ki na liga i matau se nai mawi: 28mo volitaka ga vei au na kakana e nai lavo, me'u kania; ka volitaka vei au na wai e nai lavo, me'u gunuva; me'u lako tu mada ga e na yavaqu; 29me vaka era kitaka vei au na luve i Iso era tiko mai Sia, kei ira na Moapi era tiko mai Ari; ka me'u qalo-kosova mada na Joritani ki na vanua sa solia vei keimami ko Jiova na neimami Kalou. 30A sa bese ni laivi keda ko Sioni na tui Esiponi me da lako e nona loma ni vanua: ni sa vakayalokaukauwataki koya ko Jiova na nomuni Kalou, ka vaqaqataka na lomana, me soli koya kina ki na ligamuni, me vaka edaidai.

31A sa kaya vei au ko Jiova, Raica, ka'u sa ia me'u soli Sioni kei na nona vanua vei iko: mo ia mada mo taukena, me nomu na nona vanua. 32Sa qai lako mai me vala kei keda ko Sioni, ko koya kei ira na nona tamata kecega, me ia nai valu mai Jeasi. 33A sa soli koya sara vei keda ko Jiova na noda Kalou; ia eda a mokuti koya, kei iratou na luvena, kei ira kecega na nona tamata. 34Ia eda sa rawa na nona veikoro kecega e na gauna ko ya, ka vakarusai ira kece sara na tagane, kei ira na yalewa, kei na lalai, e na veikoro kecega; eda a sega ni vakavoca e dua: 35ia na manumanu e yavai va eda a tokitaka me noda, kei nai yau ni veikoro eda sa kaba. 36Mai Aroeri, ko ya mai na bati ni uciwai ko Arinoni, kei na koro mai na uciwai, io ka yacovi Kiliati, sa sega na koro sa gumatua vei keda: sa solia kecega vei keda ko Jiova na noda Kalou: 37ia ko ni sa sega ni torova na nodra vanua na luve i Amoni, se dua na yasana mai na uciwai ko Japoki, se na veikoro mai na veiulu-ni-vanua, se dua na tikina ka vakatabuya vei keda ko Jiova na noda Kalou.

Vakavakadewa Makawa

©1974 Bible Society of the South Pacific

More Info | Version Index