Search form

NAI VAKARUA 5

Sa tukuni tale na vunau e tini, 1-22. Sa masuti Mosese ko ira na tamata me rogoci Jiova mada ko koya, ka qai tukuna emuri vei ira na nona vosa, 23-33.

1A sa kacivi ira kecega na Isireli ko Mosese, a sa kaya vei ira, Mo ni rogoca, na Isireli, nai lesilesi kei na lewa ka'u sa tukuna ki na daligamuni e na siga oqo, mo ni vulica, ka vakabauta tiko, ka cakava. 2Sa ia vata kei keda ko Jiova na noda Kalou e dua na veiyalayalati mai Orepi. 3Sa sega ni kitaka na veiyalayalati oqo ko Jiova vei ira na noda qase, vei keda ga, vei keda eda sa bula kecega eke e na siga oqo. 4Kemuni sa veirai mata kei Jiova ni sa vosa vei kemuni ko koya mai na ulu-ni-vanua, mai loma ni bukawaqa; 5ni ka'u a tu e na kemuni maliwa kei Jiova e na siga ko ya, me'u tukuna vei kemuni na vosa i Jiova: ni kemuni a rere e na vuku ni bukawaqa, ka sega ni cabeta na ulu-ni-vanua; a sa kaya ko koya,

6Koi au ga ko Jiova na nomu Kalou, ka kauti iko mai na vanua ko Ijipita, mai na vale ni veivakabobulataki.

7Me kakua vei iko na Kalou tani, oi au duaduaga.

8Mo kakua ni cakava vei iko e dua na matakau ceuceu; se dua nai vakatakarakara ni ka mai lomalagi e cake, se dua na ka e vuravura e ra, se dua na ka e na wasawasa e na yasa i vuravura: 9mo kakua ni cuva vei ira, se qaravi ira: ni'u sa Kalou vuvu, koi au ko Jiova na nomu Kalou, au sa sauma na nodra caka ca na qase vei ira na luvedra, ka yacova nai katolu ni tabatamata kei na kenai kava, vei ira era sa cati au; 10ia ka'u sa vakatakila na loloma vei ira nai tabatamata e udolu, vei ira sa lomani au, ka muria na noqu vunau.

11Mo kakua ni cavuta walega na yaca i Jiova na nomu Kalou; ni na sega ni vakadonui koya ko Jiova sa cavuta wale na yacana.

12Mo vakabauta na siga ni vakacecegu, mo vakatabuya, me vaka ka vunautaka vei iko ko Jiova na nomu Kalou. 13E ono na siga mo daucakacaka kina, ka kitaka kina na nomu cakacaka kecega; 14ia nai kavitu ni siga sa siga ni vakacecegu i Jiova na nomu Kalou; mo kakua ni kitaka kina e dua na cakacaka, ko iko, se na luvemu tagane se na luvemu yalewa, se na nomu tamata, se na nomu vada, se na nomu pulumokau, se na nomu asa, se dua na nomu manumanu, se na nomu vulagi sa tiko e na nomu lomanibai: me vakacegu kina vakataki iko na nomu tamata kei na nomu vada. 15Ia mo nanuma ni ko a bobula mai na vanua ko Ijipita, a sa kauti iko tani maikina ko Jiova na nomu Kalou e na liga kaukauwa, kei na liga sa dodo yani: o koya sa vakaroti iko kina ko Jiova na nomu Kalou mo vakabauta ni siga na vakacecegu.

16Mo vakarokoroko vei rau na tamamu kei na tinamu, me vaka sa vakaroti iko ko Jiova na nomu Kalou; me dede kina na nomu bula, ia me yacovi iko kina na ka vinaka, e na vanua sa solia vei iko ko Jiova na nomu Kalou.

17Mo kakua ni laba.

18Mo kakua talega ni ia na veibutakoci.

19Mo kakua talega ni butako.

20Mo kakua talega ni beitaka vakailasu a kai nomu.

21Mo kakua talega ni domona na watina na kai nomu; mo kakua talega ni kocova na nona vale na kai nomu, se na nona were, se nona tamata, se nona vada, se na nona pulumokau, se nona asa, se dua na ka sa nona na kai nomu.

22A vosa oqo sa cavuta ko Jiova vei kemuni kecega sa soqoni vata mai na ulu-ni-vanua, mai loma ni bukawaqa, mai na o, kei na butobuto loaloa, e na domo levu: a sa sega ni kuria. A sa vola e na vatu raraba e rua, ka solia mai vei au.

23Ia ni kemuni sa rogoca na domo mai na loma ni butobuto, ni sa waqa tu na ulu-ni-vanua e na buka, ni a qai toro mai vei au, io na turaga kecega ni nomuni veimataqali, kei ira na nomuni qase; 24ia kemuni a kaya, Raica, sa vakatakila vei keda ko Jiova na noda Kalou na nonai ukuuku kei na nona lagilagi, ia eda sa rogoca na domona mai loma ni bukawaqa: keimami sa raica edaidai ni sa vosa na Kalou vei ira na tamata, ka ra sa bula tiko. 25Ia oqo, a cava me keimami mate kina? ni na kani keimami na bukawaqa levu oqo: kevaka keimami sa rogoca tale na domo i Jiova na noda Kalou, keimami na qai mate. 26Ko cei li vei ira na tamata kecega sa rogoca vakataki keda na domo ni Kalou bula, ni sa vosa mai loma ni bukawaqa, a sa bula ga? 27Mo ni toro yani, ka rogoca kecega na ka ena kaya ko Jiova na noda Kalou: ia mo ni tukuna vei keimami na ka kecega sa kaya vei kemuni ko Jiova na noda Kalou; ia keimami na rogoca, ka cakava.

28A sa rogoca na domo ni nomuni vosa ko Jiova, ni kemuni a vosa vei au; a sa kaya vei au ko Jiova, Au sa rogoca na nodra vosa na tamata oqo, era sa vosataka vei iko: sa dodonu na ka kecega era sa kaya. 29Ke sa tiko mada vei ira na yalo vakaoqo, me ra rerevaki au, ka vakabauta tikoga na noqu vunau kecega, me yaco kina vei ira na ka vinaka, kei na nodra kawa talega ka sega ni mudu!

30Mo la'ki kaya vei ira, Mo dou suka ki na nomudou veivale laca. 31Ia ko iko, mo tu mada eke me voleka vei au, me'u tukuna vei iko na vunau kecega, kei nai lesilesi, kei na lewa, mo vakavulica vei ira, me ra cakava e na vanua ka'u sa solia vei ira me ra taukena. 32Mo ni vakabauta kina, ka mo ni cakava me vaka e na vunau i Jiova na nomuni Kalou vei kemuni: mo ni kakua ni gole ki nai matau se nai mawi. 33Mo ni lako e na sala kecega sa vakarota vei kemuni ko Jiova na nomuni Kalou, mo ni bula kina, me yacovi kemuni kina na ka vinaka, me dede kina na nomuni bula e na vanua ko ni sa taukena.

Vakavakadewa Makawa

©1974 Bible Society of the South Pacific

More Info | Version Index