Search form

NA LAKO YANI 1

Era sa tubu me lewe vuqa na kawa i Isireli mai Ijipita, 1-7. Sa vakacacani ira ko ira na kai Ijipita, ka vakamatea na luvedra tagane, 8-22.

1Ia oqo na yacadra na luve i Isireli, era lako vata kei Jekope ki Ijipita; a tamata yadua kei na nona lewe-ni-vale ka lako mai: 2ko Rupeni, ko Simioni, ko Livai, kei Juta, 3ko Isakari, ko Sepuloni, kei Penijamini, 4ko Tani, kei Nafitalai, ko Kata, kei Aseri. 5Ia na tamata kecega sa kawa i Jekope era lewe vitusagavulu: ia ko Josefa, sa tiko eliu mai Ijipita.

6A sa mate ko Josefa, kei iratou na tuakana kei na tacina kecega, kei nai tabatamata kecega ko ya. 7A ra sa vakaluveni na luve i Isireli, ka tubu vakalevu, ka ra lewe vuqa mai, ka tubu me ra kaukauwa vakalevu sara; a sa tawa sara kina na vanua vei ira.

8A sa tubu e dua tani na tui me lewai Ijipita, ka sega ni kilai Josefa. 9A sa kaya vei ira na nona tamata ko koya, Raica, ko ira na Isireli era sa lewe vuqa ka kaukauwa, ia koi keda eda sa lewe lailai ka malumalumu: 10tou lewa mada, me da cakacaka vaqaseqase vei ira; de ra tubu tiko mai, ka sa yaco e dua nai valu, era na qai la'ki totaki ira na noda meca, ka veivala kei keda, ka lako tani e na vanua oqo. 11A ra sa qai lesia eso na turaga me lewa na nodra cakacaka, me vakasaurarataki ira e na nodra i tavi bibi. A ra sa tara me nei Fero na koro ni yau, ko Picomi kei Reamisesi. 12Ia ni sa levu cake na nodra vakasaurarataki ira, era sa vakalewevuqataki mai kina, ka ra sa tubu tiko. A ra sa rarawa e na vukudra na Isireli. 13Ia ko ira na kai Ijipita, era sa vakasaurarataki ira na Isireli me ra cakacaka vakabibi: 14a sa vakararawataka na nodra bula e na cakacaka ni bobula, e na caka lase kei na vatu-buli, kei na cakacaka kecega e na were; ia na nodra cakacaka kecega era sa kitaka era sa vakasaurarataki vakararawa kina.

15A sa vosa na tui Ijipita vei rau na vu-ni-kalou vei ira na Iperiu: a yacana e dua ko Sifira, na yacana nai karua ko Pua: 16a sa kaya, Ni drau sa vu-ni-kalou vei ira na Iperiu, drau raica nai dabedabe era vakasucu kina; ke sa gonetagane, drau qai vakamatea: ia ke sa goneyalewa, me bula ga. 17A rau sa rerevaka na Kalou na vu-ni-kalou, ka sega ni kitaka me vaka ka vakarota vei rau na tui Ijipita: a rau sa vakabulai ira na gonetagane. 18A ra kacivi rau na vu-ni-kalou na tui Ijipita, ka kaya vei rau, A cava drau sa cakava kina na ka oqo, ka me vakabulai ira na gonetagane? 19A rau sa kaya vei Fero na vu-ni-kalou, Era sa sega dina ni vakataki ira na yalewa ni Ijipita, ko ira na yalewa Iperiu; ni ra sa kaukauwa; era sa vakasucu ni sa bera ni curu vei ira na vu-ni-kalou. 20A sa caka vinaka kina na Kalou vei rau na vu-ni-kalou: a ra sa lewe vuqa mai na tamata, ka tubu me kaukauwa sara. 21Ia e na vuku ni rau sa rerevaka na Kalou na vu-ni-kalou, sa qisi rau me rau vakaluveni. 22Sa qai vakaroti ira na nona tamata kecega ko Fero, ka kaya, A gonetagane kecega sa sucu mai, dou biuta laivi ki na uciwai, ia na goneyalewa kecega dou vakabula.

Vakavakadewa Makawa

©1974 Bible Society of the South Pacific

More Info | Version Index