Search form

NA LAKO YANI 11

Sa kaya ko Jiova vei ira na Isireli me ra kere ka maivei ira na kai Ijipita, 1-3. Sa tukuna vei Fero ko Mosese ni na mate na ulumatua kecega, 4-10.

1A sa kaya vei Mosese ko Jiova, sa vo tale e dua na ca levu, ka'u na vakayacora vei Fero, kei Ijipita; sa oti ena qai laivi kemudou ko koya mo dou lako tani eke: ia ni sa laivi kemudou mo dou lako, ena qai vakasavi kemudou tani sara eke ko koya. 2Mo vosa mada vei ira na tamata, ka mo dou kerea nai ukuuku siliva kei nai ukuuku koula, na tagane yadua mai vua na nona lewe-ni-koro, kei na yalewa yadua mai vua na nona lewe-ni-koro. 3A sa vakayalovinakataki ira na kai Ijipita ko Jiova me ra lomani ira na tamata. Ia ko Mosese talega, sa tamata turaga sara e na vanua ko Ijipita, e na matadra era qaravi Fero, kei na matadra na tamata kecega.

4A sa kaya vei Fero ko Mosese, Sa kaya vakaoqo ko Jiova, E na lomaloma ni bogi ka'u na lako voli e loma i Ijipita: 5a ra na mate kecega na ulumatua e na vanua ko Ijipita, io, na ulumatua i Fero, ko koya sa tiko e nonai tikotiko-vakaturaga, kei na nona ulumatua talega na vada sa tiko mai daku ni vatu ni qaqi sila; kei na ulumatua kecega ni manumanu e yavai va: 6ia e na vanua ko Ijipita ena dua na tagi levu, ka sega e tautauvata, ka na sega tale e dua e tautauvata kaya emuri; 7ia ena sega ni yavalata na yamena e dua na koli, me ca kina e dua vei ira na luve i Isireli, se me ca na tamata se na manumanu: mo dou kila kina ni sa vakaivakatakilakilataki ira na kai Ijipita, kei ira na Isireli, ko Jiova. 8Ia ko ira kecega oqo sa qaravi kemuni, era na lako sobu mai vei au, ka cuva vei au, ka kaya, Mo ni lako tani, kei ira kecega na tamata era sa muri kemuni: ka sa oti ka'u na qai lako tani. A sa cudru vakalevu sara, ni sa lako tani ko koya mai na mata i Fero.

9A sa kaya vei Mosese ko Jiova, Ena sega ni vakarorogo vei iko ko Fero; ka me vakavuqataki kina na noqu cakacaka mana e na vanua ko Ijipita.

10A sa cakava na ka mana kecega oqo ko Mosese kei Eroni e na mata i Fero: a sa vakaukauwataka na loma i Fero ko Jiova, a sa sega kina ni laivi ira na luve i Isireli me ra lako tani mai na nona vanua.

Vakavakadewa Makawa

©1974 Bible Society of the South Pacific

More Info | Version Index