Search form

NA LAKO YANI 12

Sa lesi nai matai ni vula ni yabaki, 1,2. Sa vakaroti na Isireli me ra vakamatea na lami, ka me lako sivi ira ko Jiova, 3-28. Sa vakamatei na ulumatua; ka ra vakamasuti na Isireli me ra lako tani, 29-36. Era yaco ki Sukoci, 37. Ai valavala ni kana vata ni lako-sivia, 43-49.

1A sa vosa vei Mosese kei Eroni ko Jiova e na vanua ko Ijipita, ka kaya. 2A vula oqo ena kenai matai ni vula vei kemudou; na vula ka liu e na nomudou yabaki.

3Drau vosa vei ira nai soqosoqo taucoko ni Isireli, ka kaya, E na kenai katini ni siga ni vula oqo me ra taura e dua na lami na tamata yadua, me vaka na veivale ni nodra qase, e dua na lami ki na dua na vale. 4Ia kevaka sa lewe lailai na lewe-ni-vale me ra sega ni kania vakaoti rawa na lami, me ra qai kana vata kei na lewe-ni-vale ni kai nona era sa tiko voleka ki na nona vale, me dua na lami sa rauta na lewe-ni-vale ruarua; dou na wilika na tamata yadua, me vaka na ka sa daukania, ka me rauta ga na lami.

5A kemudou lami yadua me sega na kena ca, me ka tagane me yabaki dua; dou kauta maivei ira na sipi, se maivei ira na me: 6ia dou maroroya ka yacova na kenai katinikava ni siga ni vula ko ya: me ra qai vakamatea e na yakavi nai soqosoqo taucoko ni Isireli.

7Ia me ra taura e dua na kena dra, ka boroya kina na duru ruarua ni sogo, kei na ulu ni katuba, e na veivale era sa kania kina.

8Ia me ra kania na lewena e na bogi ko ya, ni sa tavu e na bukawaqa, kei na madrai sa sega ni vakaleveni; me ra kania vata kei na co gaga. 9Me kakua ni kania droka, se ni sa saqa e na wai, ka me tavu ga e na bukawaqa; a uluna, kei na yavana, kei na kena gacagaca. 10Ia me kakua ni vo e dua na tikina me yacova na mataka; ia na ka sa vo e na mataka dou vakama e na bukawaqa. 11Ia mo dou vakaoqo ni dou sa kania; Me vauci na tolomudou, me vakaivava na yavamudou, ka me taura nai titoko na ligamudou; ia dou kania vakatotolo: ko ya na kana ni lako-sivia i Jiova.

12Ni'u na lako voli e na vanua ko Ijipita e na bogi ko ya, ka yavita na ulumatua kecega e na vanua ko Ijipita, na tamata kei na manumanu e yavai va; ia ka'u na cudruvi ira kecega na kalou ni Ijipita: sai au ko Jiova. 13Ia na dra ena kemudoui vakatakilakila e na veivale dou sa tiko kina: ia ni'u sa raica na dra, ka'u na qai lako siviti kemudou, ena sega ga ni yacovi kemudou e dua na ka mo dou rusa kina, ni'u sa yavita na vanua ko Ijipita.

14Ia na siga ko ya sa na kenai vakananumi vei kemudou, ia dou ia kina na solevu vei Jiova: sa kenai lesilesi mo dou ia na so levu oqo e na nomudou veitabatamata ka tawa mudu. 15Sa bogi vitu dou kania kina na madrai sa sega ni vakaleveni; io e nai matai ni siga dou biuta tani na leveni mai na nomudou veivale: ia ko ira kecega sa kania na madrai sa vakaleveni e nai matai ni siga ka yacova nai kavitu ni siga, ena muduki tani na tamata ko ya vei ira na Isireli. 16Ia dou na ia e nai matai ni siga nai soqosoqo tabu, ia e nai kavitu talega ni siga ena dua na nomudou i soqosoqo tabu; ena sega e dua na cakacaka me caka kina, a ka ga me kana kina na tamata yadua, oqori duaduaga e tara mo dou cakava. 17Ia dou na ia na kana madrai sa sega ni vakaleveni; ni'u sa kauta tani na nomudou veivavakoso mai na vanua ko Ijipita, e na siga dina oqori: o koya sa qai kenai lesilesi mo dou nanuma na siga ko ya e na nomudou veitabatamata ka tawa mudu. 18E nai matai ni vula, e na kenai katinikava ni siga ni vula ni sa yakavi mai, dou kania na madrai sa sega ni vakaleveni, ka yacova na yakavi e nai karuasagavulu ka dua ni siga ni vula. 19E vitu na siga me kakua na leveni me kune e na nomudou veivale: ia ko ira kecega sa kania na madrai sa vakaleveni, ena muduki tani na tamata ko ya mai nai soqosoqo ni Isireli, se kai tani, sei taukei. 20Mo dou kakua ni kania e dua na ka sa vakaleveni: dou kania ga na madrai sa sega ni vakaleveni e na nomudou veivale kecega.

21Sa qai kacivi ira kecega na qase ni Isireli ko Mosese, a sa kaya vei ira, Dou dui la'ki toboka e dua na kemudou lami me rauta na lewe ni nomudou veivale, ka vakamatea na lami ni lako-sivia. 22Ia dou kauta e dua nai vau isopa, ka tonia e na dra sa tu e na peseni, ka boroya na ulu ni katuba, kei na duru ruarua ni sogo, e na dra sa tu e na peseni; ia me kakua e dua vei kemudou me curu yani e na katuba ni nona vale ka me mataka mada mai: 23ni na lako voli e na vanua ko Jiova me yaviti ira na kai Ijipita; ia ni sa raica na dra e na ulu ni katuba, e na duru ruarua talega ni sogo, ena qai lako sivita na katuba ko Jiova, ka sega ni laivi koya sa ia na veivakarusai me curuma na nomudou veivale me vakayaco mate vei kemudou. 24Ia dou vakabauta na ka oqo, mei lesilesi vei iko kei ira na luvemu ka tawa mudu. 25Ia ni dou yaco ki na vanua sa solia vei kemudou ko Jiova, me vaka ka yalataka, dou na qai vakabauta tiko nai valavala oqo. 26Ia ni ra na tarogi kemuni na luvemuni, A cava nai balebale ni cakacaka oqo vei kemuni? 27dou na qai kaya, Oqo nai soro ni lako-sivia i Jiova, ko koya ka lako sivita na nodra veivale na Isireli mai Ijipita, ni sa yaviti Ijipita, ka vakabula na noda veivale. A ra sa cuva na tamata, ka ra lotu.

28A ra sa lako yani na Isireli ka kitaka: ia me vaka ka vakarota vei Mosese kei Eroni ko Jiova, era sa kitaka vakakina.

29A sa yaco e na lomaloma ni bogi, sa qai yaviti ira kecega na ulumatua e na vanua ko Ijipita ko Jiova, na ulumatua i Fero, ko koya sa tiko e nonai tikotiko vakaturaga, kei na nona ulumatua talega na bobula sa tiko e na vale butobuto; kei na ulumatua kecega ni manumanu e yavai va. 30A sa duri cake ko Fero e na bogi, kei ira kecega era qaravi koya, kei ira kecega na kai Ijipita; ka sa qai dua na tagi levu mai Ijipita; ni sa sega e dua na vale sa sega ni mate kina e dua. 31A sa kacivi Mosese kei Eroni ko koya e na bogi, ka kaya, Drau ia, drau lako tani mai vei ira na noqu tamata, koi kemudrau, kei ira na Isireli; ia ni lako, qaravi Jiova, me vaka ni a kaya: 32ni kauta talega na nomuni sipi, kei na nomuni pulumokau, me vaka na nomuni vosa, ia ni lako; ka mo ni vosavakalougatataki au talega.

33Ia ko ira na kai Ijipita era sa cikevi ira na tamata, me ra vakatalai ira vakusakusa sara yani e na vanua; ni ra sa kaya, Eda sa mate kecega. 34Ia ko ira na tamata era sa kauta na kedra madrai droka ni sa sega ni vakalevenitaki, ia era sa dreketa lako na nodra sedre sa natuki kina na madrai, ka sa oloni e na nodra i sulu. 35Ia na Isireli era sa kitaka me vaka na vosa i Mosese; a ra sa kerea mai vei ira na kai Ijipita nai ukuuku siliva, kei na i ukuuku koula, kei nai sulu: 36a sa vakayalovinakataki ira na kai Ijipita ko Jiova vei ira na tamata, a ra sa solia kina vei ira na ka era sa kerea. A ra sa tokitaka na nodra i yau na kai Ijipita.

37A ra sa toki mai Ramisese ki Sukoci ko ira na Isireli, e le onosagavulu na oba era tamata bula sa taubale, ka ra sa sega ni wili na gone. 38A sa lako vata kei ira e dua nai vavakoso levu era dui kaikai; kei na qele ni sipi kei na qele ni pulumokau; na manumanu a ka levu sara. 39A ra sa vavia na keki madrai sa sega ni vakaleveni, e na madrai droka era sa kauta mai Ijipita, ni sa sega ni vakalevenitaki; ka ni ra sa biligi tani mai Ijipita, ka sega ni vakaberabera rawa, a ra sa sega ni vakarautaka oti na kedrai vaqa.

40Ia na nodra tiko vulagi mai Ijipita ko ira na Isireli, sa va na drau ka tolusagavulu na yabaki. 41A sa yaco ni sa oti e va na drau ka tolusagavulu na yabaki, io e na siga dina ko ya, era sa lako tani nai vavakoso kecega i Jiova mai na vanua ko Ijipita

42Ko ya na bogi me daunanumi vei Jiova, ni sa kauti ira tani ko koya mai na vanua ko Ijipita: sa dua na bogi i Jiova oqo me ra daunanuma kecega na Isireli e na nodra veitabatamata.

43A sa kaya vei Mosese kei Eroni ko Jiova, Oqo nai lesilesi ni kana vata ni lako-sivia: Me kakua ni kana kina e dua na kai tani: 44ia na nomu tamata dauveiqaravi sa voli e nai lavo, ena kania ni ko sa ciliva oti. 45A kai tani, kei na tamata sa saumi na nona cakacaka, ena sega ni kania. 46Me laukana e na dua ga na vale: ka mo kakua ni kauta ki tautuba e dua na tikina; ia dou kakua ni musuka e dua na suina. 47Era na cakava nai soqosoqo taucoko ni Isireli. 48Ia ni sa tiko vulagi kei iko e dua na kai tani, ka sa lomana me ia na kana ni lako-sivia vei Jiova, me ra cilivi mada ko ira na nona tagane kecega, ka me ra qai toro mai ka kania; ena qai tautauvata kei nai taukei: ia sa tabu ni kana kina e dua na tamata sa sega ni cilivi. 49Sa dua ga na kenai vakarau vua nai taukei, kei na kai tani sa tiko vulagi e na kemudou maliwa.

50A ra sa kitaka ko ira kecega na Isireli; me vaka sa vakaroti Mosese kei Eroni ko Jiova, era sa kitaka vakakina.

51A sa yaco e na siga dina ko ya, sa kauti ira na Isireli mai na vanua ko Ijipita ko Jiova me vaka na nodra veivavakoso.

Vakavakadewa Makawa

©1974 Bible Society of the South Pacific

More Info | Version Index