Search form

NA LAKO YANI 13

Sa nei Jiova na ulumatua, 1,2. A kana vata ni lako-sivia, 3-16. Era lako tani mai Ijipita na Isireli, ka kauta na sui i Josefa, 17-19. Sa liutaki ira na o, 20-22.

1A sa vosa vei Mosese ko Jiova, ka kaya, 2Mo vakatabuya me noqu na ulumatua kecega, o koya kecega sa sucu taumada, vei ira na Isireli, a tamata kei na manumanu talega e yavai va: sa noqu ga.

3A sa kaya vei ira na tamata ko Mosese, Dou nanuma na siga oqo, dou a lako mai kina mai Ijipita, mai na vale ni veivakabobulataki; ni sa kauti kemudou tani maikina ko Jiova e na ligana kaukauwa: ia me kakua ni kani na madrai sa vakaleveni. 4E na siga oqo dou a lako tani, e na vula ko Epipi. 5Ia ni sa kauti iko ko Jiova ki na nodra vanua na kai Kenani, kei na Itaiti, kei na Amoraiti, kei na Aivaiti, kei na Jepusaiti, ka bubului kina ko koya vei ira na nomu qase me solia vei iko, a vanua sa dave kina na wai-ni-sucu kei na oni, ko na qai cakava na cakacaka oqo e na vula oqo. 6E vitu na siga, mo kania na madrai sa sega ni vakaleveni, ia e na kenai kavitu ni siga me dua na soqoni levu vei Jiova. 7Ena kani tiko na madrai sa sega ni vakaleveni ka bogi vitu; me kakua vei iko na madrai sa vakaleveni; me kakua talega ni kune vei iko na leveni e na nomu veiyasana kecega. 8Ia mo tukuna vua na luvemu e na siga ko ya, ka kaya, Sa caka na ka oqo e na vuku ni ka sa cakava vei au ko Jiova ni'u a lako tani mai Ijipita. 9Ia ena kemui vakatakilakila e na ligamu, kei nai divi e na yadremu, me tiko kina e na gusumu na vunau i Jiova: ni sa kauti iko tani mai Ijipita ko Jiova e na ligana kaukauwa. 10Mo vakabauta kina nai lesilesi oqo e na kena gauna sa lokuci, e na veiyabaki.

11Ia ni sa kauti kemuni ko Jiova ki na nodra vanua na kai Kenani, me vaka sa bubului kina vei kemuni kei ira na nomuni qase, ka sa solia vei kemuni, 12mo ni qai vakatabuya me nei Jiova na ka kecega sa sucu taumada, kei na ulumatua kecega ni nomuni manumanu e yavai va; ena nei Jiova na ka tagane. 13Ia na ulumatua kecega ni asa mo volia e na lami; ia kevaka ko sa sega ni via volia, mo musuka na domona: ia na ulumatua kecega ni tamata vei ira na luvemuni mo volia.

14Ia ena yaco ni sa tarogi iko na luvemu e na gauna maimuri, ka kaya, A cava oqo? mo qai kaya vua, Sa kauti keda tani e na ligana kaukauwa ko Jiova mai Ijipita, mai na vale ni veivakabobulataki: 15a sa yaco ni sa vakadredreta ko Fero na noda lako, sa qai vakamatea ko Jiova na ulumatua kecega mai na vanua ko Ijipita, na ulumatua ni tamata kei na ulumatua ni manumanu e yavai va: o koya ka'u sa vakacabora kina vei Jiova na ka tagane kecega sa sucu taumada; ia na ulumatua kecega vei ira na luvequ ka'u sa volia. 16Ia sa na kenai vakatakilakila e ligamuni, kei nai ukuuku e na yadremuni: ni sa kauti keda tani mai Ijipita ko Jiova e na ligana kaukauwa.

17Ia ni sa vakatalai ira na tamata ko Fero sa lekaleka na sala sa lako e na nodra vanua na kai Filisitia, ia sa sega ga ni tuberi ira kina na Kalou; ni sa kaya na Kalou, De ra veivutuni na tamata ni ra sa raica nai valu, ka lesu ki Ijipita: 18ia sa tuberi ira voli na tamata na Kalou e na sala mai na lekutu mai na Wasa Damudamu: a ra sa vakaiyaragi tu na Isireli, ni ra sa lako cake mai na vanua ko Ijipita. 19A sa kauta vata kaya ko Mosese na sui i Josefa: ni ka vakabubuluitaki ira matua sara na Isireli ko koya, ka kaya, Ena talevi kemudou vakaidina na Kalou; ia dou kauta tani eke kei kemudou na suiqu.

20A ra sa toki tani mai Sukoci, ka la'ki tiko mai Ecami, ka voleka ki na lekutu. 21A sa liutaki ira tiko ko Jiova e na duru o e na siga, me tuberi ira e na sala; kei na duru bukawaqa e na bogi, me vakararamataki ira; me ra lako e na siga kei na bogi: 22sa sega ni kauta tani ko koya na duru o e na siga, se na duru bukawaqa e na bogi, mai na matadra na tamata.

Vakavakadewa Makawa

©1974 Bible Society of the South Pacific

More Info | Version Index