Search form

NA LAKO YANI 14

Sa vakavulici ira na Isireli ko Jiova e na sala me ra lako kina, 1-4. Sa muri ira ko Fero, 5-9. Era rere ka didi na Isireli, 10-12. Sa vakacegui ira ko Mosese, 13,14. Sa vosa vei Mosese ko Jiova, 15-18. Sa la'ki muri ira na agilose i Jiova, 19,20. Sa tawase na wai, a ra sa lakova na Isireli, 21,22. Sa muri ira na kai Ijipita, a ra sa mate kina, 23-31.

1A sa vosa vei Mosese ko Jiova, ka kaya, 2Mo vosa vei ira na Isireli, me ra lesu ka la'ki tiko e na mata i Pi-eiroci e na maliwa kei Mikitoli kei na waitui, me sa donui Peali-sifoni: ni tiko donuya na matasawa: 3ni na kaya ko Fero e na vukudra na Isireli, Era sa vakaleqai e na vanua, sa lati ira na lekutu. 4Ia ka'u na vakaukauwataka na loma i Fero, ena vakasavi ira kina ko koya; ia ka'u na vakarokorokotaki e na vuku i Fero, kei na nonai valu kecega; me ra kila kina na kai Ijipita ni sai au ko Jiova. A ra sa kitaka vakakina.

5A sa tukuni vua na tui Ijipita ni ra sa dro na tamata: a sa vuki na lomadra ko Fero kei na nona tamata me veimecaki kei ira na tamata, a ra sa kaya, A cava beka oqo eda sa kitaka, ni da sa laivi ira na Isireli me ra lako tani me kakua ni qaravi keda tiko? 6A sa vakarautaka na nona qiqi-ni-valu ko koya, ka kauta vata kaya na nona tamata; 7a sa kauta e ono na drau na qiqi-ni-valu sa digitaki, kei na qiqi-ni-valu kecega ni Ijipita, kei na turaga vei ira kecega. 8A sa vakaukauwataka na loma i Fero na tui Ijipita ko Jiova, a sa vakasavi ira kina na Isireli: a ra sa lako yani na Isireli e na liga kaukauwa. 9A ra sa cicimuri ira ko ira na kai Ijipita, na ose kei na qiqi-ni-valu kecega nei Fero, kei ira sa dauvodo ose, kei na nonai valu, a sa vauci ira ni ra sa tiko voleka ki na wasawasa voleka ki Pi-eiroci, sa donui Peali-sifoni.

10Ia ni sa toro voleka ko Fero, era sa ta cake na Isireli, ka raica, sa muri ira na kai Ijipita; a ra sa rere vakalevu: ka ra tagi vei Jiova na Isireli. 11A ra sa kaya vei Mosese, Sa sega beka nai bulubulu mai Ijipita, ko sa kauti keimami mai kina me keimami mate e na lekutu? a cava ko sa kitaka kina vei keimami na ka oqo, me kauti keimami tani mai Ijipita? 12sa sega beka ni ka oqo keimami a kaya vei iko mai Ijipita, ka vaka, Mo laivi keimami, me keimami qaravi ira na kai Ijipita? sa vinaka me keimami qaravi ira tiko na kai Ijipita, ka ca me keimami mate e na lekutu.

13A sa kaya vei ira na tamata ko Mosese, Mo ni kakua ni rere, ni tu vakadua, ka raica na veivakabulai i Jiova ena cakava vei kemuni edaidai; ni dou sa raici ira na kai Ijipita edaidai, ia dou na sega ni raici ira tale ka tawa mudu: 14ena vala e na vukumudou ko Jiova, ia dou na tiko lo.

15A sa kaya vei Mosese ko Jiova, A cava ko sa tagi kina vei au? mo vosa vei ira na Isireli, me ra lako ki liu: 16Ia ko iko, mo kauta ga na nomu i titoko, ka dodoka yani na ligamu vaka ki na waitui, ka wasea; a ra na lako na Isireli e na qele mamaca e loma ni wasawasa. 17Ka raica, koi au, ka'u na vakaukauwataka na lomadra na kai Ijipita, era na muri ira kina: ia ka'u na dokai e na vuku i Fero, kei na nonai valu kecega, e na vuku ni nona qiqi-ni-valu, kei na vukudra na nonai valu sa vodo ose. 18Ia era na kila na kai Ijipita ni sai au ko Jiova, ni'u sa dokai e na vuku i Fero, e na vuku ni nona qiqi-ni-valu, kei ira na nonai valu sa vodo ose.

19Ia na agilose ni Kalou ka liutaka na nodra i vavakoso na Isireli sa lesu ka la'ki muri ira; ia sa lako tani mai na matadra na duru o, ka la'ki tu e dakudra: 20a sa la'ki tu e na maliwa ni nodra i tikotiko na kai Ijipita kei na nodra i tikotiko na Isireli; a sa tiko na o kei na butobuto vei ira ko ya, ia ka sa cilavi ira oqo e na bogi: a ra sa sega ni veitorovi kina e na bogi ka siga.

21A sa dodoka na ligana ko Mosese vaka ki na waitui; a sa vakasuka na wasawasa ko Jiova e na cagi tokalau kaukauwa e na bogi ka siga, a sa vakadiva na wasawasa, ka sa wasei na wai. 22A ra sa lako e loma ni wasawasa e na qele mamaca ko ira na Isireli: a sa kedra bai na wai, e na kedra i matau kei na kedra i mawi.

23A ra sa cicimuria, ka muri ira ki loma ni wasawasa, ko ira na kai Ijipita, na ose kecega nei Fero, na nona qiqi-ni-valu, kei ira nai valu sa vodo ose. 24A sa yaco ni sa veivuke nai vakatawa e na mataka, sa qai dikeva ko Jiova na nodra i valu na kai Ijipita mai na duru bukawaqa kei na o, ka vakataqayataka na nodra i valu na kai Ijipita, 25ka vakalutuya na yava ni nodra qiqi-ni-valu, me lako vakabibi kina: a ra sa kaya kina na kai Ijipita, Me da drotaka na matadra na Isireli; ni sa totaki ira ko Jiova, a sa nodra meca na kai Ijipita. 26A sa kaya vei Mosese ko Jiova, Mo dodoka na ligamu vaka ki na waitui, me suka tale na wai me luvuci ira na kai Ijipita, na nodra qiqi-ni-valu, kei ira nai valu sa vodo ose. 27A sa dodoka na ligana ko Mosese vaka ki na waitui, a sa suka tale na waitui ki na kenai tutu eliu ni sa kida mai na mataka; a ra sa dro ka sota kaya ga na kai Ijipita; a sa biuti ira na kai Ijipita ko Jiova ki loma ni wasawasa. 28A sa lesu na wai, ka luvuca na qiqi-ni-valu, kei ira sa vodo ose, io nai valu kecega nei Fero ka muri ira ki na wasawasa; sa sega e dua vei ira sa vo. 29Ia ko ira na Isireli era sa lako e na qele mamaca e loma ni wasawasa; a sa kedra bai na wai e na kedra i matau kei na kedra i mawi.

30A sa vakabula na Isireli ko Jiova e na siga ko ya mai na ligadra na kai Ijipita; a sa raici ira na kai Ijipita ko ira na Isireli ni ra sa mate koto mai matasawa. 31Ia na Isireli sa kunea na cakacaka levu ko ya ka cakava ko Jiova kivei ira na kai Ijipita; a ra sa rerevaki Jiova na tamata, ka vakabauti Jiova, kei na nonai talatala ko Mosese.

Vakavakadewa Makawa

©1974 Bible Society of the South Pacific

More Info | Version Index