Search form

NA LAKO YANI 15

A sere i Mosese, 1-21. Sa yali na wai mai Suri, ka gaga na wai mai Mara, a sa vakavinakataki e na dua na kau sa biu kina, 22-26. Era yaco ki Elimi, a sa levu na wai, 27.

1Ia ko Mosese kei ira na Isireli, era sa qai seretaka vei Jiova na sere oqo, ka ra sa kaya, Au na sere vei Jiova, ni sa ka talei na nona gumatua: Na ose kei koya sa vodoka sa biuta ko koya ki na wasawasa. 2Sa noqu kaukauwa ko Jiova ko koya ka'u sa seretaka, A sa noqu vu-ni-bula ko koya: Sa noqu Kalou ko koya, ka'u na vakavinavinaka vua; Na Kalou nei tamaqu, ka'u na vakalevulevui koya. 3A qaqa e nai valu ko Jiova: Ko Jiova na yacana. 4A qiqi-ni-valu nei Fero kei na nonai valu sa biuta ko koya ki na wasawasa: Era sa dromu e na Wasa Damudamu na nona kapiteni vinaka. 5Sa luvuci ira na wai titobu: Era sa dromu ki botona me vaka na vatu. 6Kemuni Jiova, sa rogovaki e na kaukauwa na ligamuni matau: Kemuni Jiova, sa musumusuka na meca na ligamuni matau. 7Ia e na kena levu ni nomuni kaukauwa ko ni sa vukici ira era tu cake me nomuni meca: Ko ni a vakatauca na nomuni cudru waqawaqa, a sa vakamai ira me vaka na vu-ni-sila. 8A sa bini toka na wai e nai cegu ni ucumuni, Sa tu vakadodonu na wai levu me vaka na bukebuke levu, Sa cevata tu na wai titobu e na loma ni wasawasa. 9Sa kaya na meca, Au na vakasava, au na vauca, au na vota nai toki ni valu; Ena mamau vei ira na noqu kocokoco; Ka'u na ucuna na noqu i seleiwau, ena vakarusai ira na ligaqu. 10Ko ni a vakaliwava na nomuni cagi ka sa luvuci ira na wasawasa: Era sa dromu e na wai rerevaki me vaka na uma. 11Ko cei vei ira na kalou sa tautauvata kei kemuni Jiova? Ko cei sa tautauvata kei kemuni, sa vakaiukuuku e na savasava, Sa dokai ni sa vakavinavinakataki, sa caka mana tiko? 12Ko ni a dodoka na ligamuni matau, Sa qai tilomi ira ko vuravura. 13E na nomuni loloma ko ni sa tuberi ira yani na tamata ko ni a volia: E na nomuni kaukauwa ko ni sa kauti ira ki na nomuni tikotiko tabu. 14Era na rogoca na veimatanitu, era na taqaya: Ena kani ira na kai Filisitia na rarawa. 15Era na qai domo bula na turaga ni Itomi; Ena tauvi ira na qaqa ni Moapi na sautaninini; Era na waicala yani na kai Kenani kecega. 16Ena tauvi ira na rere kei na domo bula; E na kena kaukauwa ni ligamuni era na tiko lo me vaka na vatu, Ka me ra lako mada yani na nomuni tamata, Jiova, Me ra lako mada yani na tamata ko ni a volia. 17Ko na vakayacori ira kina, ka tea e na ulu-ni-vanua ko ni sa taukena. Na yasana ko ni sa cakava Jiova me nomuni tikotiko, Na vale tabu sa vakarautaka na ligamuni, na Turaga. 18Ena tawa mudu ka tawa mudu na nona lewa ko Jiova.

19Ni ra sa lako ki loma ni wasawasa na ose nei Fero kei na nona qiqi-ni-valu, kei ira na nonai valu sa vodo ose, a sa vakasuka tale ko Jiova na wai ni wasawasa me luvuci ira; ia ko ira na Isireli, era sa lako e na vanua mamaca e loma ni wasawasa.

20Ia ko Miriama, na parofita yalewa, na gane i Eroni, sa kauta e ligana na tibereli; a ra sa muri koya ko ira na yalewa kecega, ka taura na tibereli ka meke lako. 21A sa veisausau meke kei ira na tagane ko Miriama, Dou meke vei Jiova, ni sa ka talei na nona gumatua; Na ose kei koya sa vodoka sa biuta ko koya ki na wasawasa.

22A sa kauti ira na Isireli mai na Wasa Damudamu ko Mosese, ka ra sa lako ki na lekutu mai Suri; a ra sa lako e loma ni vanua ka bogi tolu, ka sega ni kunea na wai. 23A ra sa yaco ki Mara, a ra sa sega ni gunuva rawa na wai mai Mara, ni sa gaga: o koya sa vakayacani kina ko Mara [Gaga.] 24A ra sa vosakudrukudru vei Mosese ko ira na tamata, ka kaya, A cava me keimami gunuva? 25A sa tagi vei Jiova ko koya; a sa vakatakila vua ko Jiova e dua na kau, a sa biuta ko koya ki na wai, a sa qai kamikamica mai na wai: sa tauca maikea ko koya eso na vunau kei nai vakaro me ra daumuria, a sa vakatovolei ira maikea, 26ka kaya, Kevaka ko ni na vakarorogo vakavinaka ki na domo i Jiova na nomuni Kalou, ka cakava na ka sa dodonu e matana, ka vakatu daligamuni ki na nona vunau, ka vakabauta na ka kecega sa lesia ko koya, ka'u na qai sega ni vakayacora vei kemuni e dua na mate ka'u a vakayacora vei ira na kai Ijipita; ni sai au ko Jiova, ka'u sa vakabulai kemuni tiko.

27A ra sa yaco ki Elimi, sa tu kina e tinikarua na mata-ni-wai, ka vitusagavulu na balabala; a ra sa tiko maikea, voleka ki na wai.

Vakavakadewa Makawa

©1974 Bible Society of the South Pacific

More Info | Version Index