Search form

NA LAKO YANI 16

Era yaco ki Sini ka didi ni sa sega na kakana, 1-3. Sa solia na kakana mai lomalagi na Kalou, ka solia na toa, 4-15. Ai valavala ni mana kei na kena vunau; a sa sega ni kune e na siga ni vakacecegu, 16-31. Me maroroi e dua na omeri mana, 32-36.

1A ra sa lako tani mai Elimi, a ra sa lako nai soqosoqo taucoko ni Isireli ki na vanua liwa mai Sini, e na maliwa kei Elimi kei Saineai, ni ra sa lako tani mai na vanua ko Ijipita, ka sa oti na vula dua kei na siga e tinikava. 2A ra sa didivaki Mosese kei Eroni nai soqosoqo taucoko ni Isireli, e na vanua liwa: 3a sa kaya vei rau ko ira na Isireli, E vinaka kevaka keimami a mate e na liga i Jiova mai na vanua ko Ijipita, ni keimami a tiko kei na kuro lewe ni manumanu, ni keimami a kana magiti ka mamau kina! ia drau sa kauti keimami mai ki na vanua liwa oqo, me vakamatea nai vavakoso taucoko oqo e na viakana.

4A sa kaya vei Mosese ko Jiova, Raica, ka'u na vakatauca vei kemudou na kakana mai lomalagi; a ra na curu yani na tamata, ka kumuna vata e na veisiga nai votavota sa rauta na siga yadua, me'u vakatovolei ira kina, se ra na muria na noqu vunau, se sega: 5Ia e na kenai kaono ni siga me ra vakarautaka ga na ka era sa kauta ki vale; ia ena rauta na siga e rua na ka era kumuna vata e na dua na siga.

6A rau sa kaya ko Mosese kei Eroni vei ira kecega na Isireli, Ni sa yakavi mai, ko ni na qai kila ni sa kauti kemuni ko Jiova mai na vanua ko Ijipita: 7ia e na mataka, ko ni na qai raica na serau i Jiova; ni sa rogoca ko koya ni kemuni sa didivaki Jiova: ia ko cei koi keirau, mo ni didivaki keirau? 8A sa kaya ko Mosese, Ena vakaoqo, ni sa solia ko Jiova na kemuni lewe ni manumanu e na yakavi, kei na kemuni kakana e na mataka mo ni mamau kina: ni sa rogoca ko Jiova na nomuni didi kemuni sa didivaki koya kina: ia ko cei koi keirau? a nomuni didi sa sega ni baleti keirau, sa baleti Jiova ga.

9A sa vosa vei Eroni ko Mosese, Mo kaya kivei ira nai soqosoqo taucoko ni Isireli, Ni lako mai ki na mata i Jiova; ni sa rogoca ko koya na nomuni didi. 10Ia ni sa vosa tiko ko Eroni vei ira nai soqosoqo taucoko ni Isireli, era sa rai vuki vaka ki na vanua liwa, ka raica, sa rairai mai na serau i Jiova e na o. 11A sa vosa vei Mosese ko Jiova, ka kaya, 12Au sa rogoca na nodra didi na Isireli: mo vosa vei ira, ka kaya, E na yakavi kemuni na kania na lewe ni manumanu, ia e na mataka kemuni na mamau e na kakana; ia kemuni na kila ni sai au ko Jiova na nomuni Kalou.

13Ia e na yakavi, sa lako cake mai na toa ni veikau, ka ubia na nodra i tikotiko: ia e na mataka sa koto volita nai tikotiko na tegu. 14Ia ni sa kuvu cake na tegu ka koto, raica, sa koto e na vanua liwa e dua na ka lailai sa mokimokiti, sa matailalai e vaka na tegu cevata e na dela ni vanua. 15Ia ni ra sa raica na Isireli, era sa veikayaka vakai ira, A cava oqo? ni ra sa sega ni kila se cava beka. A sa kaya vei ira ko Mosese, Oqo na kakana sa solia vei kemuni ko Jiova mo ni kania: 16Oqo na ka sa vakarota ko Jiova, Mo ni kumuna vata na tamata yadua na ka sa ganiti koya: me tauyadua na omeri, me rauta nai wiliwili ni tamata: mo ni kauta na tamata yadua na kedra era tiko e nona vale laca. 17A ra sa kitaka vakakina na Isireli, ka kumuna vata, na ka levu cake eso, ka lailai sobu eso. 18Ia ni ra sa vakarautaka e na omeri, ko koya sa vakalevu sa sega na ka e vo vua, kei koya sa vakalailai sa sega na ka e yali vua: era sa kumuna na tamata yadua na ka sa ganiti koya. 19A sa kaya vei ira ko Mosese, Me kakua na tamata me maroroya ki na mataka. 20A ra sa sega ga ni vakarorogo vei Mosese; ni so vei ira sa maroroya eso ki na mataka, a sa ulouloa mai, ka boi ca: a sa cudruvi ira ko Mosese. 21A ra sa daukumuna e na veimataka kecega, na tamata yadua na ka sa ganiti koya: ia ni sa katakata mai na mata-ni-siga, sa waicala.

22Ia e na kenai kaono ni siga era sa qai kumuna na kakana me vakarua na kena levu, sa rua na omeri vei ira na tamata yadua: a ra sa lako mai na turaga kecega ni soqosoqo, ka tukuna vei Mosese. 23A sa kaya vei ira ko koya, Oqo na ka sa kaya ko Jiova, Na mataka sa siga ni vakacecegu, na vakacecegu tabu vei Jiova: na ka kemuni sa via vavia ni vavia edaidai, kei na ka kemuni sa vakasaqa ni vakasaqa edaidai; ia na ka sa vo ni maroroya me kemuni, ki na mataka. 24A ra sa maroroya ki na mataka, me vaka ka vakarota ko Mosese: a sa sega ni boi ca, a sa sega kina na ulo. 25A sa kaya ko Mosese, Mo ni kania oqori edaidai; ni sa siga ni vakacecegu vei Jiova na siga edaidai: ko ni na sega ni kunea edaidai e na vanua: 26E ono na siga kemuni na kumuna kina; ia na kenai kavitu ni siga, na siga ni vakacecegu, ena sega kina. 27Ia ka so vei ira na tamata era a lako yani e nai kavitu ni siga me kumuna, a ra sega ni kunea. 28A sa kaya vei Mosese ko Jiova, E vakaevei na kena dede ko ni sa bese tiko ni vakabauta na noqu i vakaro kei na noqu vunau? 29raica, ni sa solia vei kemuni na siga ni vakacecegu ko Jiova, sa solia kina vei kemuni e na kenai kaono ni siga na kakana me rauta na bogi rua; mo ni dui tiko na tamata yadua e na nona tikina; me kakua e dua na tamata me lako tani mai na nona tikina e na kenai kavitu ni siga. 30A ra sa qai vakacegu na tamata e na kenai kavitu ni siga. 31A ra sa vakayacana na ka ko ya ko ira na mataqali i Isireli na Mana: a sa vaka na sore ni koriada, sa vulavula; ia ni sa tovolei sa vaka na madrai sa caka vata kei na oni.

32A sa kaya ko Mosese, Oqo na ka sa vakarota ko Jiova, Ni vakasinaita kina e dua na omeri, me maroroi me yacova na nomuni tabatamata maimuri; me ra raica na kakana ka'u sa vakani kemuni kina e na vanua liwa, ni'u a kauti kemuni tani mai na vanua ko Ijipita. 33A sa kaya vei Eroni ko Mosese, Mo kauta e dua na bilo, ka sova kina e dua na omeri mana, ka viritura e na mata i Jiova, me maroroi me yacova na nomuni tabatamata maimuri. 34A sa viritura ko Eroni e na mata ni kato ni vunau me maroroi tu, me vaka ka vakarota vei Mosese ko Jiova. 35Ia ko ira na Isireli, era kana mana ka vasagavulu na yabaki, me yacova na gauna era yaco kina ki na vanua tawa: era sa kana mana tiko ka ra yacova mada nai yalayala ni vanua ko Kenani. 36Ia e dua na omeri sa kenai katini ni wase ni efa.

Vakavakadewa Makawa

©1974 Bible Society of the South Pacific

More Info | Version Index