Search form

NA LAKO YANI 17

Era didi na tamata mai Rifitimi ni sa sega na wai, 1-3. Sa vure cake na wai mai na vatu, 4-7. Era veivala kei na Amaleki, ka ra gumatua ni sa lave tu na liga i Mosese: era qai cakava na kenai vakananumi, 8-16.

1A ra sa toki tani mai na vanua liwa ko Sini nai soqosoqo taucoko ni Isireli, e na nodra i lakolako, me vaka na vosa i Jiova, ka la'ki tiko mai Rifitimi: a sa sega na wai me ra gunuva ko ira na tamata. 2A ra sa veileti kina na tamata kei Mosese, ka kaya, Mo solia mai vei keimami na wai me keimami gunuva. A sa kaya vei ira ko Mosese, A cava dou sa veileti kina kei au? a cava dou sa vakatovolei Jiova kina? 3A ra sa viagunu wai maikea na tamata; a ra sa didivaki Mosese ko ira na tamata, ka kaya, E na cava ko sa kauti keimami cake mai Ijipita, me vakamatei keimami, kei na neimami gone, kei na neimami manumanu e yavai va, e na viagunu?

4A sa tagi vei Jiova ko Mosese, ka kaya, A cava me'u kitaka vei ira na tamata oqo? sa vo e lailai me ra vakaviriki au e na vatu. 5A sa kaya vei Mosese ko Jiova, Mo lako yani e na matadra na tamata, ka kauta vata kei iko eso vei ira na qase ni Isireli; kei na nomu i titoko, ko a yavita kina na uciwai, mo kauta ga e ligamu, ka lako: 6Raica, ka'u na la'ki tu e matamu maikea e na dela ni uluvatu, mai Orepi; ia ko na yavita na vatu, ka na vure maikina na wai, me ra gunu na tamata. A sa cakacaka vakakina ko Mosese e na matadra na qase ni Isireli. 7A sa vakayacana na yasana ko ya ko koya ko Masa [A veivakatovolei], kei Meripa [A veileti], e na vuku ni nodra veileti na Isireli, ni ra sa vakatovolei Jiova talega, ni ra kaya, Sa tiko beka kei keda ko Jiova, se segai?

8Sa qai lako mai na Amaleki, ka veivala kei Isireli mai Rifitimi. 9A sa kaya vei Josua ko Mosese, Mo digitaka vei keda eso na tamata, ka lako yani me veivala kei Amaleki: e na mataka ka'u na la'ki tu e na dela ni vanua-cecere, kei nai titoko ni Kalou e ligaqu. 10A sa kitaka ko Josua me vaka ka kaya vua ko Mosese, ka vala kei Amaleki: a ratou sa cabe ki dela ni vanua-cecere ko Mosese, ko Eroni, kei Uri. 11A sa yaco, ni sa dulaka tiko na ligana ko Mosese, sa qai gumatua na Isireli: ia ni sa vakasavuya sobu na ligana ko koya, sa qai gumatua na Amaleki. 12A sa bibi mai na liga i Mosese; a rau sa kauta e dua na vatu, me nonai tikotiko, a sa tiko kina ko koya: ia ko Eroni kei Uri, erau sa tabea na ligana, e dua vaka, ka dua vaka; a sa dei kina na ligana ka yacova na kena dromu na mata-ni-siga. 13Ia ko Josua, sa vakamalumalumutaki Amaleki, kei na nona tamata, e nai seleiwau. 14A sa kaya vei Mosese ko Jiova, Mo vola oqo e nai vola me nanumi, ka tukuna sara vei Josua: ni'u na vakawabokotaki Amaleki laivi mai na ruku i lomalagi, me kakua ni nanumi. 15A sa cakava e dua nai cabocabo-ni-soro ko Mosese, ka vakayacana ko Jiova-nisai: 16a sa kaya, Sa bubului ko Jiova ni na vala kei Amaleki ko Jiova e nai tabatamata kecega.

Vakavakadewa Makawa

©1974 Bible Society of the South Pacific

More Info | Version Index