Search form

NA LAKO YANI 2

Sa sucu ko Mosese, a sa vunitaki ka vula tolu, sa qai vakotori e na waqa lailai, ka biu ki na uciwai, 1-4. Sa kunei koya na luve i Fero ka yalewa, ka susuga me luvena, 5-10. Sa yavita edua na kai Ijipita ko Mosese, ka qai dro ki Mitiani, 11-22. Era tagi vei Jiova na luve i Isireli e na vuku ni nodra rarawa, 23-25.

1A sa lako e dua na tamata e na mataqali i Livai, ka vakawati kei na dua na luve i Livai. 2A sa kunekune na yalewa, ka vakasucuma e dua na luvena tagane: ia ni sa raica ko koya sa matavinaka na gone, sa vunia ka vula tolu. 3Ia ni sa sega ni vunia rawa tiko, sa cakava e dua na waqa kuta, ka boroya e na qele dregadregata kei nai boro, ka vakotora kina na gone; a sa la'ki kotora e na loma ni veikuta mai na bati ni uciwai. 4A sa tu vakayawa na ganena, me raica se cava na ka ena yaco vua.

5A sa lako sobu na luve i Fero na gone yalewa, me sili e na uciwai; a ra sa gade voli na nona vada mai na bati ni uciwai; ia ni sa kunea ko koya na waqa e na veikuta, sa tala na nona vada me kauta mai. 6Ia ni sa cega, sa kunea na gone; ka raica, sa tagi na gone. A sa lomani koya, ka kaya, Oqo e dua na luve ni Iperiu. 7Sa qai kaya na ganena vua na luve i Fero ka yalewa, Me'u lako me'u kaciva mai vei iko e dua na yalewa daususu gone maivei ira na yalewa Iperiu me susuga vei iko na gone, ne? 8A sa kaya vua na luve i Fero, Io mo lako. A sa lako na goneyalewa, ka kaciva mai na tinana na gone ko ya. 9A sa kaya vua ko koya na luve i Fero, Mo kauta na gone oqo, ka susuga me noqu, ka'u na solia vei iko na kemui sau. A sa kauta na gone na yalewa, ka susuga. 10A sa tubu na gone, a sa kauti koya tale na yalewa ki na luve i Fero ka yalewa, a sa susuga me luvena. A sa vakayacani koya ko Mosese: ka kaya, E na vuku ni'u a vueta mai na wai.

11Ia e na gauna ko ya, ni sa tubu ko Mosese, sa lako yani vei ira na wekana, a sa vakaraica na nodra i tavi bibi: a sa kunea e dua na kai Ijipita ni sa yavita tiko e dua na Iperiu, e dua vei ira na wekana. 12A sa veiraiyaki, ka raica ni sa sega na tamata, sa qai mokuta na kai Ijipita, ka vunia e na nuku. 13A sa lako yani e na siga kadua, ka raica, erau sa veivala e le rua na Iperiu: a sa kaya vua sa caka cala, A cava ko sa yavita kina na wekamu? 14A sa kaya ko koya, Ko cei sa lesi iko mo turaga mo mai lewai keimami? ko sa via vakamatei au beka, me vaka ko a vakamatei koya na kai Ijipita? Sa qai rere ko Mosese, ka kaya, Sa dina ga sa kilai na ka oqo.

15Ni sa rogoca na ka oqo ko Fero, sa segata me vakamatei Mosese. A sa drotaki Fero ko Mosese, ka sa la'ki tiko e na vanua ko Mitiani: a sa tiko voleka ki nai keli-wai. 16Ia sa le vitu na luvena yalewa na bete mai Mitiani: a ratou sa lako mai ka taki, ka vakasinaita nai gunugunu, me vagunuva na qele ni sipi nei tamadratou. 17A ra sa lako mai na dauvakana manumanu, ka vakasavi iratou yani: ia sa qai tu ko Mosese, ka totaki iratou, ka vagunuva na nodratou qele ni sipi. 18Ia ni ratou sa lako kivei Riueli na tamadratou, sa kaya ko koya, E vakaevei ni dou sa tale vakatotolo mai edaidai vakaoqo? 19A ratou sa kaya, E dua na kai Ijipita sa vakabulai keitou mai vei ira na dauvakana manumanu, ka taki talega me rauti keitou, ka vagunuva na qele ni sipi. 20A sa kaya ko koya vei iratou na luvena yalewa, Ka sa evei ko koya? e vakaevei oqo ni dou sa biuta na tamata? kacivi koya mai, me mai kana mada. 21A sa vinakata ko Mosese me tiko kaya na tamata: a sa musuki Sipora na luvena vei Mosese. 22A sa vakasucuma e dua na luvena tagane, ia ko Mosese sa vakayacani koya ko Kerisomi: ni sa kaya, Au a tiko vulagi e na vanua e sega ni noqu.

23Ia ni sa oti e vuqa na yabaki, sa qai mate na tui Ijipita; a ra sa vutugu na Isireli e na vuku ni nodra veivakasaurarataki, a ra sa tagi; a sa lako cake vua na Kalou na nodra tagi, e na vuku ni nodra veivakasaurarataki. 24A sa rogoca na nodra vutugu na Kalou, a sa nanuma na Kalou na nona vosa ni yalayala vei Eparaama, vei Aisake, kei Jekope. 25A sa raici ira na Isireli na Kalou, a sa golevi ira na Kalou.

Vakavakadewa Makawa

©1974 Bible Society of the South Pacific

More Info | Version Index