Search form

NA LAKO YANI 20

Sa cavuta ko Jiova na vunau e tini, 1-17. Era rere vakalevu na tamata, 18,19; a sa vakacegui ira ko Mosese, 20. Sa vakaroti Mosese tiko ko Jiova, 21-26.

1A sa tukuna na vosa kecega oqo ko Jiova, ka kaya,

2Koi au, ko Jiova na nomu Kalou, ko koya ka kauti iko mai na vanua ko Ijipita, mai na vale ni veivakabobulataki.

3Me kakua vei iko na Kalou tani, koi au duaduaga.

4Mo kakua ni cakava vei iko e dua na matakau ceuceu; se dua nai vakatakarakara ni ka mai lomalagi e cake, se dua na ka e tu e vuravura era, se dua na ka e na wasawasa e na yasa i vuravura: 5mo kakua ni cuva vei ira, se qaravi ira: ni'u sa Kalou vuvu, koi au ko Jiova na nomu Kalou, au sa sauma na nodra caka ca na qase vei ira na luvedra, ka yacova nai katolu ni tabatamata kei na kenai kava, vei ira sa cati au; 6ia ka'u sa vakatakila na loloma vei ira nai tabatamata e udolu, vei ira era sa lomani au, ka muria na noqu vunau.

7Mo kakua ni cavuta walega na yaca i Jiova na nomu Kalou; ni na sega ni vakadonui koya ko Jiova sa cavuta wale na yacana.

8Mo nanuma na siga ni vakacecegu, mo vakatabuya. 9E ono na siga mo daucakacaka kina, ka kitaka kina na nomu cakacaka kecega; 10ia nai kavitu ni siga sa siga ni vakacecegu i Jiova na nomu Kalou; mo kakua ni kitaka kina e dua na cakacaka, ko iko, se na luvemu tagane se na luvemu yalewa, na nomu tamata se nomu vada, se nomu manumanu, se nomu vulagi sa tiko e na nomu lomanibai: 11ni sa buli lomalagi kei vuravura kei na waitui, kei na ka kecega sa tu maikina, ko Jiova e na siga e ono, a sa vakacegu e nai kavitu ni siga: o koya sa vakalougatataka kina ko Jiova na siga ni vakacecegu, ka vakatabuya.

12Mo vakarokorokotaki rau na tamamu kei na tinamu; me dede kina na nomu bula e na vanua sa solia vei iko ko Jiova na nomu Kalou.

13Mo kakua ni laba.

14Mo kakua ni ia na veibutakoci.

15Mo kakua ni butako.

16Mo kakua ni beitaka vakailasu na kai nomu.

17Mo kakua ni kocova na nona vale na kai nomu; mo kakua ni domona na watina na kai nomu, se kocova nona tamata, se nona vada, se nona pulumokau, se nona asa, se dua na ka sa nona na kai nomu.

18A ra sa kunea na tamata kece na kurukuru, kei na livaliva, kei na domo ni davui, kei na ulu-ni-vanua ni sa kubou tiko: ia ni ra sa kunea na tamata, era sa sautaninini, ka la'ki tu vakayawa. 19A ra sa kaya vei Mosese, Mo ni vosa ga vei keimami koi kemuni, ia keimami na vakarorogo: ia me kakua ni vosa vei keimami na Kalou, de keimami mate. 20A sa kaya vei ira na tamata ko Mosese, Mo ni kakua ni rere: ni sa lako mai na Kalou me vakatovolei kemuni, me tu vei kemuni na rerevaki koya, mo ni kakua ni valavala ca.

21A sa tu vakayawa ko ira na tamata, a sa torova ko Mosese na butobuto loaloa sa tiko kina na Kalou. 22A sa kaya vei Mosese ko Jiova, Mo vosa vakaoqo vei ira na Isireli, Dou sa raica ni'u a vosa vei kemudou mai lomalagi: 23Mo dou kakua ni cakava na kalou siliva me kequi kuri, mo kakua talega ni cakava vei kemudou na kalou koula: 24Mo cakava vei au nai cabocabo-ni-soro qele, ka cabora kina na nomu i soro kama, kei na nomu i madrali ni veivinakati, na nomu sipi, kei na nomu pulumokau: e na yasana kecega ka'u sa lesia me cavu kina na yacaqu, ka'u na lako kina vei iko, ka vakalougatataki iko: 25Ia kevaka ko sa via cakava vei au e dua nai cabocabo-ni-soro vatu, mo kakua ni cakava e na vatu sa ta: kevaka ko sa taya e na nomu matau, ko sa vakacacana: 26Mo kakua talega ni cabeta na noqu i cabocabo-ni-soro e nai cabecabe, me kakua kina ni raici na nomu luvawale.

Vakavakadewa Makawa

©1974 Bible Society of the South Pacific

More Info | Version Index