Search form

NA LAKO YANI 21

Sa cavuta tiko na vunau eso ko Jiova, e na vukudra na tamata kei na nodra turaga, 1-11, kei na laba, 12-15, kei na butakoca na tamata, 16, kei na rukaka na qase, 17, kei na veivala, 18-27, kei na ka eso me saumi, 28-36.

1Ia oqo na vunau mo tauca vei ira: 2Kevaka ko sa volia e dua na Iperiu me nomu bobula, me qaravi iko ko koya ka yabaki ono ga: ia e na kenai kavitu sa na sereki wale yani. 3Kevaka sa lako mai vakai koya ga, ena lako ga vakai koya yani: kevaka ka vakawati, ena lako vata kaya na watina. 4Kevaka sa solia vua e dua na watina ko koya na nona turaga, a sa vakasucuma ko koya na luvena tagane se na luvena yalewa; sa na nei koya na nona turaga na watina kei na luvena, ia ena lako yani ko koya vakai koya ga. 5Ia kevaka sa kaya vakadodonu na tamata, Au sa lomana na noqu turaga, kei na watiqu, kei na luvequ; au sa sega ni via sereki: 6me qai kauti koya na nona turaga vei ira na turaga ni lewa; ka kauta talega ki na katuba, se na duru ni sogo; ena qai cula-basika na daligana ko koya na nona turaga e na dua nai cula; ena qai qaravi koya ko koya ka tawa mudu.

7Ia kevaka sa volitaka na luvena yalewa e dua na tamata me vada, ena sega ni lako yani ko koya me vakataki ira na tagane bobula. 8Kevaka sa sega ni vinakati koya na nona turaga, ni sa kaya oti me watina, me qai laivi koya ko koya me voli tale: sa tabu vua me volitaka ki na kai tani, ni sa vakaisini koya ko koya. 9Ia kevaka sa musuka vua na luvena, me na qai cakacaka vua me vaka sa luvena yalewa. 10Kevaka sa vakawati kei na dua tale; ena sega ni vakalailaitaki kina na kena kakana, na nonai sulu, kei na nonai valavala vakaveiwatini 11Ia kevaka sa sega ni via cakava vua na ka tolutolu oqo, me na qai lako wale yani ko koya, sa na sega ni voli e nai lavo.

12O koya sa yavita mate e dua na tamata, ena vakamatei vakaidina ko koya: 13Ia kevaka sa sega ni nakita na tamata, ia sa solia ki na ligana na Kalou; au na lesia vei iko na koro me dro kina ko koya. 14Ia kevaka e dua na tamata sa nakita me vakamatea na kai nona, ni sa lawakitaka; ko na qai kauta tani mai na noqu i cabocabo-ni-soro, me mate. 15Kei koya talega sa yavita na tamana, se tinana, ena vakamatei vakaidina.

16Kei koya sa butakoca e dua na tamata, ka volitaki koya, se sa kune ga vua, ena vakamatei vakaidina.

17Kei koya sa rukaka na tamana, se tinana, ena vakamatei vakaidina.

18Ia kevaka erau veivala e lewe rua na tamata, ka dua sa yavita nai karua e na vatu, se na ligana, a sa sega ni mate ko koya, sa davo ga e nonai mocemoce: 19kevaka sa duri tale, ka vakaititoko voli e tautuba, me qai kakua ni cudruvi ko koya ka yavita: ia ena sauma ga vua na siga sa davo kina, ka sauma talega na ka me bula vinaka tale kina.

20Ia kevaka sa yavita na nona tamata, se nona vada, e dua na tamata, e na kau, a sa ciba ni sa yaviti tiko; ena cudruvi vakaidina: 21Ia kevaka sa bula bogi dua se bogi rua, ena sega ni cudruvi; ni sa nonai lavo ko koya.

22Ia kevaka erau veivala e lewe rua na tamata, ka ca kina e dua na yalewa sa bukete, a sa lutudole kina, a sa sega tale na kena ca; ena totogi vakaidina ko koya, me vaka na ka sa lewa vua ko koya na wati ni yalewa; ka ni ra vakadonuya na mataveilewai. 23Ia kevaka sa ca kina emuri, ko na qai sauma na mate e na mate, 24na mata mei sau ni mata, na bati mei sau ni bati, na liga mei sau ni liga, na yava mei sau ni yava, 25na tavu mei sau ni tavu, na mavoa mei sau ni mavoa, na kuita mei sau ni kuita.

26Ia kevaka sa yavita na mata ni nona tamata, se na mata ni nona vada, e dua na tamata, a sa boko kina; me qai sereki koya me lako yani, e na vuku ni matana. 27Ia kevaka sa tila yani na batina na nona tamata, se na batina na nona vada; me qai sereki koya me lako yani, e na vuku ni batina.

28Kevaka sa leuta e dua na tagane se dua na yalewa na pulumokau, a sa mate kina; ena lauviri mate vakaidina na pulumokau, ka na sega ni kani na lewena; ia ena sega ni cudruvi na kenai taukei. 29Ia kevaka sa dauveileu eliu na pulumokau ko ya, a sa tukuni oti vua na kenai taukei, a sa sega ni viribaita ko koya, a sa vakamatea kina e dua na tagane se dua na yalewa, ena lauviri mate na pulumokau, ena vakamatei talega na kenai taukei. 30Kevaka sa lewai vua me totogi lavo me kenai sau, me qai solia ko koya na ka sa lesi vua me kenai voli ni nona bula. 31Se leuta na gonetagane, se leuta na goneyalewa, ena caka vua me vaka na lewa oqo. 32Kevaka sa leuta na tamata se na vada na pulumokau; ena solia ko koya vua na nona turaga e tolusagavulu na sikeli siliva, me qai lauviri mate na pulumokau.

33Ia kevaka sa sega ni ubia nai keli-wai e dua na tamata, se dua na tamata sa kelia nai keli-wai, ka sega ni ubia, a sa sikalutu kina e dua na pulumokau, se dua na asa; 34ena sauma ga nai taukei ni keli-wai, ena solia nai lavo ki na kenai taukei; ena qai nona na manumanu sa mate.

35Ia kevaka sa vakacacana na nona pulumokau e dua na tamata na pulumokau ni tani, a sa mate kina; erau na qai volitaka na pulumokau sa bula, ka wasea rua na kenai voli me nodrau; me rau wasea rua talega na manumanu sa mate. 36Ia kevaka sa kilai ni sa dauveileu eliu na pulumokau, a sa sega ni viribaita na kenai taukei; ena sauma vakaidina na pulumokau ena pulumokau; ia ena nona ga na manumanu sa mate.

Vakavakadewa Makawa

©1974 Bible Society of the South Pacific

More Info | Version Index