Search form

NA LAKO YANI 22

Sa cavuta tiko eso na vunau ko Jiova, e na vuku ni butako, 1-5, kei na kama, 6, kei na veivakaisini, 7-13, kei na kere manumanu, 14,15, kei na vaqasea na goneyalewa, 16,17, kei na cakai sausau, 18, kei na koto kei na manumanu, 19, kei na soro ki na kalou lasu, 20, kei na vulagi, 21, kei na dawai kei na sega ni vakatamani, 22-24, kei nai valavala eso sa sega ni dodonu, 25-28. Ai sevu, 29,30. Me ra tamata tabu, 31.

1Kevaka sa butakoca na pulumokau se na sipi e dua na tamata, ka vakamatea, se volitaka; ena sauma ko koya na pulumokau e dua e na pulumokau e lima, se na sipi e dua e na sipi e va. 2Kevaka sa kune na butako ni sa basuka tiko na vale, a sa moku mate, ena sega ni tarogi na nona mate: 3Ia kevaka sa cadra vua na mata-ni-siga, ena qai tarogi na nona mate. Me sauma vakavinaka ko koya; kevaka sa sega na nona ka, me qai volitaki ko koya mei sau ni ka sa butakoca. 4Kevaka sa kune bula vua na ka sa butakoca, se pulumokau, se asa, se sipi; me qai sauma me rauta vakarua.

5Kevaka e dua na tamata sa vuna na kena laukana e dua na were se veivaini, ni sa kauta kina na nona manumanu, a sa kani na nona were na tamata tani; ena sauma ga e na ka vinaka sara mai nona were, se nona veivaivaini vinaka sara.

6Kevaka sa waqa loa mai e dua na buka, a sa katia na veico, a sa kama kina nai binibini sila, se na sila sa tu, se na veiwere; ena sauma vakaidina ko koya sa vakawaqa na buka.

7Kevaka e dua na tamata sa solia vua na kai nona nai lavo se nai yaya me maroroya, a sa butakoci mai na vale ni tamata ko ya; kevaka sa kune na butako, me qai sauma vakarua ko koya: 8kevaka sa sega ni kune na butako, me qai kau nai taukei ni vale ko ya vei ira na mataveilewai, me bubului ni sa sega ni tara ko koya e dua na nonai yau na kai nona. 9E nai valavala vakabutako kecega, se na pulumokau, se na asa, se na sipi, se nai sulu, se dua na ka sa yali, sa kaya e dua sa nona, na ka sa veiletitaki vei rau ena kau vei ira na mataveilewai; ko koya era sa vakacala na mataveilewai, ena sauma vakarua vua na kai nona.

10Kevaka sa dua na tamata sa solia vua na kai nona e dua na asa, se na pulumokau, se na sipi, se dua na manumanu, me vakaraica; a sa mate, se mavoa, se vakasavi tani, ka sega na tamata sa raica; 11me qai bubului e na matai Jiova, ni sa sega ni tara ko koya e dua na nonai yau na kai nona; me qai donuya ga na kenai taukei, ia ena qai sega ni sauma ko koya. 12Ia kevaka sa butakoci vua, me qai sauma ko koya vua na kenai taukei. 13Kevaka sa dresulaki, me qai kauta ga mai me kilai; ena sega ni sauma ko koya na ka sa dresulaki.

14Ia kevaka sa dua na tamata sa kerea na nona ka na kai nona, a sa mavoa, se mate, ni sa sega ni tiko kaya na kenai taukei, ena qai sauma vakaidina ko koya: 15kevaka sa tiko kaya na kenai taukei, ena qai sega ni sauma ko koya: kevaka sa ka e kere, sa lako e na vuku ni kenai kere.

16Ia kevaka sa dua na tamata sa temaka e dua na goneyalewa sa sega ni musu, a sa veiyacovi kaya, me qai solia dina vua ko koya nai yau me watina. 17Kevaka sa bese sara ni soli koya vua ko tamana, me qai solia nai lavo ko koya me vaka nai yau sa dausoli vei ira na goneyalewa.

18Dou kakua ni vakabula e dua na yalewa sa daucakai sausau.

19Ko koya sa koto vata kei na manumanu e yavai va ena vakamatei vakaidina.

20Ko koya sa vakacabora nai soro vua na kalou tani, ka sega vei Jiova duaduaga, ena vakarusai sara.

21Ia dou kakua ni vakararawataka e dua na vulagi, se vakasaurarataka: ni dou a vulagi mai na vanua ko Ijipita.

22Dou kakua ni vakararawataka e dua na yada, se dua sa sega ni vakatamani. 23Kevaka dou sa vakararawataka vakalailai, a ra sa tagi vakalailai ga vei au, ka'u na rogoca vakaidina na nodra tagi; 24ia ena waqa mai na noqu cudru, ka'u na qai vakamatei kemudou e nai seleiwau; ka na yada na watimudou, ka na sega ni vakatamani na luvemudou.

25Kevaka dou sa solia me talevaki nai lavo vua e dua na noqu tamata sa dravudravua ka tiko kei iko, mo kakua ni vaka e dua sa via volivoli vua: dou kakua ni taroga vua na kenai kere. 26Kevaka dou sa taura na nonai sulu na kai nomu me kenai vakadinadina, dou vakasuka vua ni sa la'ki dromu na mata-ni-siga: 27ni sa nonai tutuvi ga oqori, nai tutuvi ni yagona: a cava na ka me moce kina? ia ni sa tagi vei au ko koya, ka'u na rogoca; ni'u sa yalololoma.

28Dou kakua ni vosavakacacataki ira na mataveilewai, se rukaki koya sa turaga vei ira na kai nomudou.

29Dou kakua ni berabera ni cabora nai sevu ni nomu vuata, kei na nomu waini kei na waiwai: mo dou solia vei au na ulumatua ni luvemudou tagane. 30Dou kitaka vakakina kei na nomu pulumokau, kei na nomu sipi: sa bogi vitu ena tiko kei tinana; e na kenai kawalu ni siga mo dou solia vei au.

31Ia dou na noqu tamata tabu: mo dou kakua talega ni kania na lewe ni manumanu sa dresulaki mai veikau; dou biuta ga ki na koli.

Vakavakadewa Makawa

©1974 Bible Society of the South Pacific

More Info | Version Index