Search form

NA LAKO YANI 23

A vunau e nai tukutuku lasu, 1-3. A ka dodonu eso, 4-13. A soqolevu e tolu, 14-19. Ena liutaki ira na Agilose, 20-24. Ena vukei ira na Kalou ka vakalougatataki ira e na vanua ko Kenani, 25-33.

1Dou kakua ni vakadinata e dua nai rogorogo lasu; mo dou kakua ni vukei koya na tamata ca, ni dou sa vakadinadina vakatawa dodonu. 2Mo dou kakua ni muri ira na lewe vuqa me caka ca; mo dou kakua talega ni vosa vata kei ira na lewe vuqa e na ka e lewai tiko, me vakatanitaki na lewa. 3Mo dou kakua talega ni vukea vakatawa dodonu na dravudravua e na nona veileti.

4Kevaka dou sa kunea na nona pulumokau se nona asa na nomu meca ni sa lako sese, mo kauta sara tale vua. 5Kevaka ko sa raica na asa nei koya sa cati iko, ni sa koto e ruku ni nonai colacola, mo kua so ni laiva vei koya: mo drau veivuke vata kaya ga.

6Mo dou kakua ni kauta vakatani na lewa vua na nomu dravudravua, e na nona veileti. 7Mo dou yawa ki na ka lasu; kakua talega ni vakamatea na tawa cala, kei na yalododonu: ni'u na sega ni vakadonui koya na tamata ca. 8Mo dou kakua talega ni taura nai solisoli: ni sa vakamatabokotaki ira era rai vinaka nai solisoli, ka kauta vakatani na nodra vosa na yalododonu.

9Dou kakua talega ni vakasaurarataka na vulagi: ni dou sa kila na yalo ni vulagi, ni dou a vulagi mai na vanua ko Ijipita.

10E ono na yabaki mo dou tea kina na nomudou vanua, ka kumuna na vuana: 11ia e na kenai kavitu mo laiva mada me lumulumu; me ra kana kina ko ira na kai nomu era sa dravudravua: ia na ka era vakavoca, me kania na manumanu ni vanua. Mo dou cakacaka vakakina ki na nomudou veivaivaini, kei na nomu veiolive.

12E ono na siga mo dou kitaka kina na nomudou cakacaka, ia e na kenai kavitu ni siga mo dou vakacegu: me vakacegu kina na nomu pulumokau kei na nomu asa, ka me kaukauwa kina na luvena na nomu vada, kei na vulagi.

13Ia e na ka kecega ka'u sa kaya vei kemudou, dou qarauni kemudou: ia dou kakua ni cavuta na yacadra na kalou tani: me kakua ni rogo mai na gusumudou.

14Mo dou cakava vakatolu na soqoni levu vei au e na yabaki. 15Mo cakava na soqoni levu ni madrai sa sega ni vakaleveni: mo kania na madrai sa sega ni vakaleveni ka bogi vitu, me vaka ka'u a vakarota kina vei kemudou, e na gauna sa lokuci, e na vula ko Epipi; (ni ko a lako mai kina mai Ijipita:) ia me kakua e dua me lako wale mai vei au: 16kei na soqoni levu ni magomago, nai sevu ni nomudou cakacaka, dou a tea e na nomudou veiwere: kei na soqoni levu ni kumukumuni, ni sa cava na yabaki, ni dou sa kumuna vata oti na nomudou cakacaka mai na veiwere. 17Me rairai vakatolu e na matai Jiova na Turaga ko ira kecega na nomudou tagane e na yabaki.

18Dou kakua ni cabora vata kei na madrai sa vakaleveni na dra ni noqu i soro; ia me kakua ni vo me yacova na mataka na uro ni noqu i soro.

19Ai sevu sa liu sara e na nomudou vanua mo dou kauta ki na vale i Jiova na nomudou Kalou. Dou kakua ni vakasaqa na luve ni me e na wai-ni-sucu i tinana.

20Raica, ka'u sa tala e dua na Agilose me liutaki kemudou, me maroroi kemudou e na sala, ka me vakayacori kemudou ki na yasana ka'u sa vakarautaka oti. 21Dou qarauni kemudou e na vukuna, ka vakarorogo ki na domona; dou kakua ni vakacudruya: ni na sauma ko koya na nomudou caka cala: ni sa tiko vua na yacaqu. 22Ia kevaka dou sa vakarorogo sara ki na domona, ka kitaka na ka kecega ka'u sa kaya; au na qai nodra meca na nomu meca, ka vakararawataki ira era sa vakararawataki kemudou. 23Ni na liutaki kemudou na noqu Agilose, ka kauti kemudou vei ira na Amoraiti, kei na Itaiti, kei na Perisaiti, kei na kai Kenani, na Aivaiti, kei na Jepusaiti: ia ka'u na muduki ira tani. 24Mo dou kakua ni cuva ki na nodra kalou, se qaravi ira, se muria na nodra i valavala; ia mo vukici ira sara ga, ka basuka sobu sara na nodra matakau.

25Ia dou qaravi Jiova ga na nomudou Kalou, ena qai vakalougatataka ko koya na kemu kakana kei na memu wai; ia ena sega ni tauvi kemudou na mate. 26Ena sega e dua na ka me lutu dole, se yava, e na nomudou vanua: au na vakayacora ga nai wiliwili ni nomu veisiga. 27Au na tala na noqu veivakatarerei e matamudou, ka vakataqayataka na tamata kecega dou na yaco yani kina; ia ka'u na vakubutaki ira kecega na nomudou meca me ra dro e matamudou; 28ia ka'u na tala e dua na lagotavuivui rerevaki me liutaki kemudou, ia ena vakasavi ira tani e matamudou na Aivaiti, kei na kai Kenani, kei na Itaiti. 29Au na sega ni vakaseva tani e matamudou e na dua na yabaki; de lala na vanua, ka sa levu mai vei kemudou na manumanu ni veikau: 30Au na vakaseva tani vakamalua tiko e matamudou, mo dou lewe levu mada mai, ka taukena na vanua. 31Ia ka'u na yalayalana na nomudou vanua ka vakatekivu mai na Wasa Damudamu ka yacova na nodra wasawasa na kai Filisitia, ka vakatekivu tale mai na lekutu ka yacova na Uciwai: ni'u na solia ki na ligamudou na lewe ni vanua; ia dou na vakasavi ira tani e matamudou. 32Dou kakua ni veiyalayalati kei ira, se kei ira na nodra kalou. 33Me ra kakua ni tiko e nomudou vanua, de ra vakacalai kemudou vei au: ia kevaka dou qaravi ira na nodra kalou, dou na tacori dina kina.

Vakavakadewa Makawa

©1974 Bible Society of the South Pacific

More Info | Version Index