Search form

NA LAKO YANI 24

Sa kaya na Kalou me cabe tale vua ko Mosese, 1,2. A sa qai la'ki tukuna, ka vola, ka wilika na vunau i Jiova vei ira na tamata, 3-8. Eso sa cabeta na ulu-ni-vanua, ka raica na Kalou, 9-11. Sa toro vua na Kalou ko Mosese; na serau ni Kalou, 12-18.

1A sa kaya vei Mosese ko koya, Koi kemudou kei Eroni, ko Netapi kei Epaiu, dou cabe cake mai vei Jiova, ka lewe vitusagavulu vei ira na qase ni Isireli; ia dou tiko vakayawa, ka lotu: 2ia ko Mosese duaduaga me toro vei Jiova; ia ko ira, me ra kakua ni toro mai; me ra kakua talega ni cabe vata kaya ko ira na tamata.

3A sa lako ko Mosese, ka tukuna vei ira na tamata na vosa kecega i Jiova, kei na lewa kecega: a ra sa vosa vata na tamata kecega, ka ra kaya, A vosa kecega sa kaya ko Jiova keimami na cakava.

4A sa vola na vosa kecega i Jiova ko Mosese, a sa sou e na mataka, ka cakava nai cabocabo-ni-soro e ruku ni ulu-ni-vanua, kei na duru e tinikarua, me vaka nai wiliwili ni veiyavusa i Isireli era tinikarua. 5A sa tala eso na cauravou maivei ira na Isireli, a ra sa vakacabora eso nai soro kama, ka vakamatea eso na pulumokau mei madrali ni veivinakati vei Jiova. 6A sa waseruataka na dra ko Mosese, ka livia ki na peseni; a sa kureitaka e dua na kena wase ni dra ki na dela ni cabocabo-ni-soro. 7A sa taura nai vola ni veiyalayalati, ka wilika ni ra sa rogoca tiko na tamata: a ra sa kaya, A ka kecega sa kaya ko Jiova keimami na cakava, ka talairawarawa. 8A sa taura na dra ko Mosese, ka kureitaka vei ira na tamata, ka kaya, Raica, na dra ni veiyalayalati, sa ia vei kemudou e na vosa kecega oqo ko Jiova.

9Sa ra qai cabe ko Mosese kei Eroni, ko Netapi kei Epaiu, ka le vitusagavulu vei ira na qase ni Isireli; 10a ra sa raica na Kalou nei Isireli; ia sa koto e ruku ni yavana na ka sa vaka na raravatu, ia na kena vatu na safaia, a sa vaka dina na lomalagi na kena mamare. 11A sa sega ni tarai ira na nodra turaga na Isireli ko koya; a ra sa raica na Kalou, ka ra kana ka gunu.

12A sa kaya vei Mosese ko Jiova, Mo cabe mai vei au ki na ulu-ni-vanua, ka tiko kina: ia ka'u na solia vei iko na vatu raraba, kei na vunau, kei na ka ka'u sa lesia, o koya ka'u sa vola oti; mo vakatavulica vei ira. 13A sa cavu tu ko Mosese, kei Josua na nona dauveivuke; a sa cabeta na ulu-ni-vanua ni Kalou ko Mosese. 14A sa kaya vei ira na qase ko koya, Dou waraki keirau mada eke, me keirau lako tale mada mai vei kemudou: ka raica, sa tiko kei kemudou ko Eroni kei Uri: na tamata sa dua na ka me lewai, me lako mai vei rau.

15A sa cabeta na ulu-ni-vanua ko Mosese, a sa ubia na ulu-ni-vanua na o. 16A sa tiko na serau i Jiova e na dela ni ulu-ni-vanua ko Saineai, a sa ubia na o ka bogi ono: ia e na kenai kavitu ni siga sa kacivi Mosese ko koya mai na loma ni o. 17Ia na serau i Jiova, sa vaka na bukawaqa sa caucaudre na kenai rairai e na dela ni ulu-ni-vanua, ni sa raica ko ira na Isireli. 18A sa curu ko Mosese ki loma ni o, a sa cabeta na ulu-ni-vanua: a sa tiko mai na ulu-ni-vanua ko Mosese ka siga vasagavulu ka bogi vasagavulu.

Vakavakadewa Makawa

©1974 Bible Society of the South Pacific

More Info | Version Index