Search form

NA LAKO YANI 25

Ai vakaro me caka na vale tabu, kei na kenai yaya.

1A sa vosa vei Mosese ko Jiova, ka kaya, 2Mo vosa vei ira na Isireli, me ra cakai solisoli vei au: dou taura nai solisoli me noqu mai vua na tamata yadua sa uqeti koya kina na lomana. 3Ia oqo nai solisoli mo dou taura maivei ira; a koula, kei na siliva, kei na parasa, 4kei na ka pelu, ka lokaloka, ka kulakula, kei na lineni matailalai, kei na vutika ni me, 5kei na kuli ni sipi-tagane sa somoti damudamu, kei na kuli ni babale, kei na kau sitimi, 6na waiwai ni cina, nai saluaki ni waiwai mei lumu, kei na kau boi vinaka me vakamai; 7na vatu onikisa, kei na vatu me vono kina na efoti, kei nai taube.

8Ia me ra cakava e dua na vale tabu me noqu, me'u tiko kina e na kedra maliwa. 9Me vaka na ka kecega ka'u sa vakatakila vei iko, me vaka nai vakatakarakara ni vale ni kalou, kei nai vakatakarakara ni kenai yaya kecega, dou cakava vakakina.

10Me ra cakava talega e dua na kato e na kau sitimi: me rua na kiupiti kei na afa kiupiti na kena balavu, ka dua na kiupiti kei na afa kiupiti na kena raraba, ka dua na kiupiti kei na afa kiupiti na kena cecere. 11Ia mo botana e na koula dina, mo botana eloma e taudaku talega, ia mo cakava e dua na batina e cake e na koula me volita. 12Ia mo vakawaicalataka na koula me caka kina e va na kena mama, ka vakota ki na kena tutuna e va; e rua na mama e na dua na yasana, ka rua na mama e na yasana kadua. 13Mo cakava talega eso nai vua ena kau sitimi, ka botana e na koula. 14Mo qai daramaka nai vua ki na mama e na yasa ni kato ruarua, me colati kina na kato. 15Me tiko ga nai vua e na mama ni kato: me kakua ni ucu tani maikina. 16Ia mo virinoca ki loma ni kato na vunau ka'u na solia vei iko.

17Mo cakava talega e dua nai cabocabo-ni-bulubulu e na koula dina: me rua na kiupiti kei na afa kiupiti na kena balavu, ka dua na kiupiti kei na afa kiupiti na kena raraba. 18Mo cakava e rua na jerupi koula, e na koula sa lautuki, me tu e na muana ruarua ni cabocabo-ni-bulubulu: 19Ia mo cakava e dua na jerupi me tu e na dua na muana kei na jerupi kadua e na muana kadua: ia na uma taucoko me caka kina nai cabocabo-ni-bulubulu kei na jerupi ruarua, e na muana ruarua. 20Ia na jerupi, me rau vakatetaba tiko e cake, me ubia nai cabocabo-ni-bulubulu e na tabadrau; ia me rau veiqaravi tu; me qarava talega nai cabocabo-ni-bulubulu na matadrau na jerupi. 21Mo qai vakataqara nai cabocabo-ni-bulubulu e na dela ni kato; ia mo virinoca ki loma ni kato na vunau ka'u na solia vei iko. 22Ia ka'u na tavaki iko maikeri, ka veivosaki kei iko mai na dela ni cabocabo-ni-bulubulu, mai na maliwa ni jerupi ruarua sa tu e dela ni kato ni vunau, e na ka kecega ka'u na vunautaka vei iko mo tukuna vei ira na Isireli.

23Mo cakava talega e dua na tepeli e na kau sitimi: me rua na kiupiti na kena balavu, ka dua na kiupiti na kena raraba, ka dua na kiupiti kei na afa kiupiti na kena cecere: 24ia mo botana e na koula dina, ka cakava kina e dua na batina koula e cake me volita. 25Mo cakava talega e dua na belena, me raba ni liga na kena raraba me volita, ia mo cakava ki na belena e dua na batina koula me volita. 26Ia mo cakava e va na kena mama koula, ka vakota na mama ki na tutuna vava sa tu e na yavana vava. 27Me ra donuya na belena na mama, mei daradara ni vua, me colati kina na tepeli. 28Ia mo cakava nai vua e na kau sitimi, ka botana e na koula, me colati kina na tepeli. 29Ia mo cakava na kena dari, kei na kenai taki, kei na kena bilo, kei na kena sedre, me livilivi kina; mo cakava e na koula dina. 30Ia mo tauca ki na tepeli na madrai dauraici me tu e mataqu e na veisiga.

31Mo cakava talega e dua nai tutu-ni-cina e na koula dina sa lautuki; na tolona, kei na tabana, na kena bilo lalai, na kena pomekaraneti, kei na kena se-ni-kau, ia me uma taucoko me caka kina: 32kei na tabana e ono me lako mai na yasana ruarua; e tolu na taba ni tutu-ni-cina mai na yasana e dua, ka tolu na taba ni tutu-ni-cina mai na yasana kadua: 33e tolu na bilo me vaka na se ni amodi, ka dua na pomekaraneti, ka dua na se-ni-kau, e na tabana e dua; ka tolu na bilo me vaka na amodi, ka dua na pomekaraneti, ka dua na se-ni-kau, e na tabana kadua: me vakakina e na tabana e ono sa tete yani mai nai tutu-ni-cina. 34Ia e nai tutu-ni-cina me va na bilo sa vaka na se ni amodi, na nodratou pomekaraneti, kei na nodratou se-ni-kau. 35Ia me dua na pomekaraneti e ruku ni tabana e rua, ka dua na pomekaraneti e ruku ni tabana e rua, ka dua na pomekaraneti e ruku ni tabana e rua, me rauta na tabana e ono sa tete yani mai nai tutu-ni-cina. 36Me caka e na ka e dua na kedrai ukuuku mokimokiti kei na tabadra: o koya taucoko ena dua bauga na tiki ni koula dina sa lautuki. 37Ia mo cakava na kena cina me vitu: ia me ra tutuvaka na kena cina, me vakararamataka na kena yasana. 38Kei na kenai koti-ni-cina, kei na kena dari ni de-ni-cina, me koula dina. 39Me caka oqo, kei nai yaya kecega oqo, e na dua na taledi koula dina.

40Ia mo cakava dina sara me vaka na kedrai vakatakarakara ka vakatakilai vei iko mai na ulu-ni-vanua.

Vakavakadewa Makawa

©1974 Bible Society of the South Pacific

More Info | Version Index