Search form

NA LAKO YANI 26

Sa tukuni tiko nai valavala ni vale ni kalou.

1Ia mo cakava na noqu vale e nai sulu lineni e tini sa caka e na lineni matailalai ni wa muloci, kei na ka pelu, ka lokaloka, ka kulakula: mo cakava kina eso na jerupi, na cakacaka ni dua na matai vuku. 2A kena balavu nai sulu yadua me ruasagavulu ka walu na kiupiti, kei na kena raraba nai sulu yadua me va na kiupiti: me tauvata na kedrai vakarau nai sulu kecega. 3Me cula vata nai sulu e lima, e dua ki na dua; ka cula vata nai sulu e lima, e dua ki na dua. 4Ia mo cakava eso nai vakamatavili e na ka pelu e na tutu ni sulu e dua, mai na tutuna sa cula; mo cakava vaka talega kina e na tutu ni sulu e saukana, e nai karua ni ka sa cula. 5E limasagavulu nai vakamatavili mo cakava e nai sulu e dua, ka limasagavulu nai vakamatavili mo cakava e na bele ni sulu e nai karua ni ka sa cula, me veitauri kina nai vakamatavili. 6Ia mo cakava e limasagavulu nai qila koula, ka veiqilaititaka nai sulu e nai qila; ka me dua bauga na vale ni kalou.

7Ia mo cakava eso nai sulu e na vutika ni me, mei ubi ni vale ni kalou: mo cakava me tinikadua nai sulu. 8A kena balavu nai sulu e dua me tolusagavulu na kiupiti, kei na kena raraba e dua nai sulu me va na kiupiti: me dua ga na kedrai vakarau nai sulu e tinikadua. 9Ia mo cula vata e lima nai sulu me dua, ka ono nai sulu me dua, ka lobia na kenai kaono ni sulu e na mata ni vale tabu. 10Ia mo cakava e limasagavulu nai vakamatavili e na tutu ni sulu e dua, e saukana e na ka sa cula, ka limasagavulu nai vakamatavili e na tutu ni sulu e nai karua ni ka sa cula. 11Ia mo cakava e limasagavulu nai qila parasa, ka veiqilaititaka ki nai vakamatavili, ka veiqilaititaka vata na vale tabu, me dua ga. 12Ia na kena vo ni sulu ni vale tabu, na tiki ni sulu sa vo, ena savu yani mai daku ni vale ni kalou. 13Ka dua na kiupiti e na yasana vaka, ka dua na kiupiti e na yasana vaka, na kena vo ni balavu ni sulu ni vale tabu, me savu yani e na yasa ni vale ni kalou ruarua ka me ubi kina.

14Ia mo cakava e dua nai ubi ni vale tabu e na kuli ni sipi tagane sa somoti damudamu; ka dua nai ubi e cake e na kuli ni babale.

15Ia mo cakava na veipapa ni vale tabu e na kau sitimi, me duri tu. 16A kena balavu e dua na papa me tini na kiupiti, ia na kena raraba na papa yadua me dua na kiupiti kei na afa kiupiti. 17Ia na mua ni papa yadua ki ra me basoga rua, ka me yatuni me veitaravi: mo cakava vakakina na papa kecega ni vale ni kalou. 18Ia me ruasagavulu na papa ki na yasa ni vale ni kalou sa donuya na ceva; 19ia mo cakava e vasagavulu na qara siliva e ruku ni papa e ruasagavulu; e rua na qara e ruku ni papa e dua, me dara kina na kena basoga ruarua; ka rua na qara e ruku ni papa e dua, me rau dara kina na kena basoga ruarua. 20Ia ki nai karua ni yasa ni vale ni kalou, ko ya sa donuya na tokalau, me ruasagavulu na papa; 21kei na kedra qara siliva e vasagavulu; e rua na qara e ruku ni papa e dua, ka rua na qara e ruku ni papa e dua. 22Ia ki na yasa ni vale ni kalou sa donuya na ra, mo cakava e ono na papa. 23Ka rua na papa mo cakava ki na tutu ni vale ni kalou e na yasana ruarua. 24Ia erau na vauci vata era, ka vauci vata e cake, ki na dua na mama: me rau vakakina ruarua; me rau tutuna ruarua. 25Ia ena walu na papa, kei na kedra veiqara siliva, e tinikaono na qara: e rua na qara e ruku ni papa e dua, ka rua na qara e ruku ni papa e dua.

26Mo cakava talega eso nai kolokolo e na kau sitimi; e lima ki na veipapa e na yasa e dua ni vale ni kalou; 27ka lima nai kolokolo ki na veipapa e nai karua ni yasa ni vale ni kalou, ka lima nai kolokolo ki na veipapa e na yasa ni vale ni kalou, ki na yasana sa donuya na ra. 28Ia nai kolokolo eloma, e na gau ni veipapa, mai na kubu e dua ki na kubu kadua. 29Ia mo botana na veipapa e na koula, ka cakava e na koula na kedra veimama mei daradara ni veikolokolo: mo botana talega na veikolokolo e na koula.

30Mo qai vakaduria cake na vale ni kalou me vaka na kenai vakatakarakara ka vakatakilai vei iko e na ulu-ni-vanua.

31Ia mo cakava e dua nai lati e na ka pelu, ka lokaloka, ka kulakula, kei na lineni matailalai ni wa muloci: me caka kina eso na jerupi, na cakacaka ni dua na matai vuku: 32ia mo vakarubeca e na duru sitimi e va sa botani e na koula: me koula ga na kedratou i ruberube, e na qara siliva e va. 33Ia mo vakarubeca nai lati e ruku ni veiqila, mo qai vakacuruma kina ki loma ni lati na kato ni vunau: ia nai lati ena wasea vei kemudou na tikina tabu mai na tikina tabu sara. 34Ia nai cabocabo-ni-bulubulu mo vakataqara ki dela ni kato ni vunau e na tikina tabu sara. 35Ia na tepeli me tu e taudaku ni lati, kei nai tutu-ni-cina me qarava na tepeli e na yasa ni vale ni kalou sa donuya na ceva: ia me tu na tepeli e na yasa sa donuya na tokalau.

36Ia mo cakava e dua nai sogo ni Vale tabu, e na ka pelu, ka lokaloka, ka kulakula, kei na lineni matailalai ni wa muloci, sa caka e na talitali sulu. 37Ia mo cakava e lima na duru sitimi ki nai sogo ko ya, ka botana e na koula, me koula talega na kedratou i ruberube: ia mo vakawaicalataka na parasa ka cakava kina e lima na kedra qara.

Vakavakadewa Makawa

©1974 Bible Society of the South Pacific

More Info | Version Index