Search form

NA LAKO YANI 28

Ai valavala ni nodratou i sulu ko Eroni kei na luvena.

1Ia mo kauti Eroni na tuakamu vei iko, kei iratou vata kaya na luvena tagane, maivei ira na Isireli, me bete vei au ko koya, io ko Eroni, ko Netapi kei Epaiu, ko Eliesa kei Icama, eratou luve i Eroni. 2Ia mo cakava eso nai sulu tabu me nei Eroni na tuakamu, me vakaiukuuku ka me rairai vinaka. 3Ia mo vosa vei ira kecega era sa lomavuku, ko ira ka'u sa vakasinaita e na lomavuku, me ra cakava nai sulu i Eroni me vakatabui kina ko koya, me bete vei au. 4Ia oqo nai sulu me ra cakava; e dua nai taube, kei na efoti, kei nai curucuru balavu, kei nai curucuru balavu sa cula kina nai ukuuku, nai sala, kei nai vau ni tolona; ia me ra cakava nai sulu tabu nei Eroni na tuakamu, kei iratou na luvena, me bete vei au ko koya. 5Ia ko ira, me ra kauta na koula, kei na ka pelu, ka lokaloka, ka kulakula, kei na lineni matailalai.

6Ia me ra cakava na efoti e na koula, e na ka pelu, ka lokaloka, e na ka kulakula, kei na lineni matailalai ni wa muloci, e na cakacaka ni matai vuku. 7Me rua na kena wa bale, me cula ki na tutuna e rua; ka cula vata kina. 8Ia nai vau talei ni efoti, sa tiko kina, me caka vakakina, me vaka na kenai valavala; me caka e na koula, e na ka pelu, ka lokaloka, ka kulakula, kei na lineni matailalai ni wa muloci.

9Ia mo kauta e rua na vatu onikisa, ka ceuta kina na yacadra na luve i Isireli: 10e ono na yacadratou e na vatu e dua, ka ono na yaca sa vo e na vatu kadua, me veitaravi me vaka na nodra sucu. 11E na nona cakacaka na matai dauceu vatu, me vaka sa ceu na mama, mo ceuta vakakina na yacadra na luve i Isireli e na vatu ruarua: mo cakava me vakadeitaki e na qara koula. 12Ia mo tokara na vatu ruarua ki na wa bale ni efoti, me vatu me ra nanumi kina na Isireli: ia ko Eroni ena kauta na yacadra e na mata i Jiova, e na tabana ruarua, me ra nanumi kina. 13Mo cakava talega eso na qara koula; 14ka rua na sinucodo e na koula dina; me tobe, me vaka na wa-qaliqali, ka bukia na sinucodo sa tobe ki na qara.

15Ia mo cakava nai taube ni veilewai e na cakacaka ni matai vuku; mo cakava me vaka nai cakacaka ni efoti; mo cakava e na koula, e na ka pelu, ka lokaloka, ka kulakula, kei na lineni matailalai ni wa muloci. 16Me takiveilevu e na yasana vava, ka me lobi rua; e dua na afa kiupiti na kena balavu, ka dua na afa kiupiti na kena raraba. 17Ia mo vonota kina na vatu sa vono, me va na yatu vatu: ai matai ni yatu na satiusi, na topasa, kei na kapuquli: 18ia nai karua ni yatu, na emeralita, na safaia, kei na taiamodi: 19ia nai katolu ni yatu, na laikure, na aketi, kei na amecisita: 20ia nai kava ni yatu, na perili, na onikisa, kei na jasipa: me koula ga na qara sa vono kina. 21Ia na vatu ena ceuti kina na yacadra na luve i Isireli, e tinikarua, me vaka nai ceuceu ni mama; io na yacadra yadua, me vaka na mataqali e tinikarua. 22Ia mo cakava ki nai taube e rua na sinucodo e na wa koula dina sa tobe. 23Mo cakava talega ki nai taube e rua na mama koula, ka vauca na mama ruarua ki na tutu ni taube ruarua. 24Mo qai daramaka na sinucodo ruarua sa tobe, ki na mama ruarua sa vauci ki na tutu ni taube ruarua. 25Ia na muana yadua sa vo ni sinucodo ruarua sa tobe mo bukia ki na qara ruarua, ka vauca ki na mata ni wa bale ni efoti. 26Ia mo cakava e rua na mama koula, ka bukia ki na mua ni taube ruarua, e na tutuna, e na yasana ki loma ni efoti: 27ka rua tale na mama koula mo cakava, ka vauca ki na kena wa bale ruarua ni efoti e rukuna, vaka ki na matana, me donuya na tikina kadua sa vauci kina, me toka e cake, ka toka era nai vau talei ni efoti. 28Ia me ra vauca na mama ni taube ki na mama ni efoti e na wa pelu, me toka e cake, ka toka era nai vau talei ni efoti, me kakua ni tasere mai na efoti. 29Ia ko Eroni ena kauta na yacadra na Isireli e nai taube ni veilewai me donuya na utona, ni sa la'ki curuma na tikina tabu, me ra nanumi tikoga kina e na mata i Jiova.

30Mo tokara talega na Urimi kei na Cumimi e loma ni taube ni veilewai; ia me donuya na uto i Eroni, ni sa curu ki na mata i Jiova: ia me colata tikoga me donuya na utona ko Eroni, e na mata i Jiova, na ka era lewai kina na Isireli.

31Ia mo cakava nai curucuru ni efoti ka me pelu taucoko ga. 32Ia eloma me dua na kena qara me curu kina na uluna: me vakabatina na qara e na ka sa tali, me vaka na qara ni sulu ni valu, me kakua ni kadresu. 33Ia e na belena mo cakava eso na pomekaraneti, e na wa pelu, ka lokaloka, ka kulakula, me volita na botona; kei na lali koula eso, me volita talega e na kedra maliwa: 34e dua na lali koula, ka dua na pomekaraneti; e dua na lali koula, ka dua na pomekaraneti, me volita na bele ni sulu ko ya. 35Ia me vakaisulu kina ko Eroni me ia kina na nonai tavi: ia ena rorogo na kena tataqiriqiri, ni sa curu ki na mata i Jiova ko koya e na tikina tabu, ka ni sa curu tale mai, me kakua ni mate ko koya.

36Mo cakava talega e dua na tiki ni koula dina me mamare, ka ceuta kina, SA TABU ME NEI JIOVA, me vaka nai ceuceu ni mama. 37Ia mo vauca e na wa pelu, me tu e na mata ni sala. 38Ia ena tu e na yadre i Eroni, me colata kina ko Eroni na kena cala ni ka tabu, era na vakatabuya na Isireli e na nodra i solisoli tabu kecega; ia ena tiko ga e yadrena, me ra vinakati kina e na mata i Jiova.

39Ia mo cula vakaiukuuku nai curucuru balavu lineni matailalai; ia mo cakava dua nai sala ena lineni matailalai; mo cakava talega e dua nai vau ni tolona e na cakacaka vakaiukuuku ni matai ni culacula.

40Mo cakava talega na nodratou i curucuru balavu na luve i Eroni, ia mo cakava nai vau ni tolodratou, ka cakava na nodratou i sala, me vakaiukuuku ka me rairai vinaka. 41Mo qai vakaisulutaki Eroni kina na tuakamu, kei iratou talega na luvena; ka lumuti iratou, ka buli iratou, ka vakatabui iratou, me ratou bete vei au. 42Mo cakava talega vei iratou na tarausese lekaleka lineni, me tabonaki kina na yagodratou, mai na tolodratou ka yacova na sagadratou; me ratou kakua ni luvawale. 43Ia ena vakaisulu kina ko Eroni kei iratou na luvena, ni ratou sa curuma na vale ni veitavaki, se ratou sa torova nai cabocabo-ni-soro me ia na cakacaka e na tikina tabu; de ratou sa cala, ka mate kina: oqo nai lesilesi vua, vei ira talega na nona kawa ka tawa mudu.

Vakavakadewa Makawa

©1974 Bible Society of the South Pacific

More Info | Version Index