Search form

NA LAKO YANI 29

Ai valavala ni veibuli i Eroni kei iratou na luvena, 1-37. Ai soro me ia tikoga; ka sa yalayala na Kalou me tiko kei ira, 38-46.

1Ia oqo na ka mo cakava vei iratou me vakatabui iratou, me ra bete vei au: Mo kauta e dua na pulumokau tagane sa gone, ka rua na sipi tagane sa sega na kena ca, 2kei na madrai sa sega ni vakaleveni, kei na keki sa sega ni vakaleveni sa veiwaki vata kei na waiwai, kei na keki mamare sara sa sega ni vakaleveni sa boro e na waiwai: mo cakava e na madrai droka ni witi vinaka: 3ia mo virinoca ki na dua na sova, ka kauta vata kei na pulumokau kei na sipi tagane ruarua. 4Mo qai kauti Eroni kei iratou na luvena ki na katuba ni vale ni veitavaki, ka vakasilimi iratou e na wai. 5Mo qai kauta nai sulu, ka vakaisulutaki Eroni e nai curucuru balavu, kei nai curucuru balavu ni efoti, kei na efoti, kei nai taube, ka vauci koya e nai vau talei ni efoti: 6ka vakaisalataka e nai sala, ka vauca nai sala tabu ki nai sala ko ya. 7Mo qai taura na waiwai mei lumu, ka livia ki na uluna, ka lumuti koya.

8Mo kauti iratou talega na luvena, ka vakaisulutaka e nai curucuru balavu; 9ka vauci iratou e nai vau ni tolodra, ko Eroni kei iratou na luvena, ka vakaisalataki iratou e nai sala: ia sa lesi me nodratou i tavi ga na cakacaka vakabete ka tawa mudu: ia mo buli Eroni kei iratou na luvena.

10Ia mo kauta na pulumokau ki na mata ni vale ni veitavaki: ia ko Eroni kei na luvena eratou na tabaka mada na ulu ni pulumokau e na ligadratou. 11Mo qai vakamatea na pulumokau e na mata i Jiova, mai na katuba ni vale ni veitavaki. 12Ia mo kauta e dua na dra ni pulumokau, ka boroya kina na tutuna vava sa balavu cake ni cabocabo-ni-soro e na nomu i qaqalo, ka livia na dra kecega ki na vu ni cabocabo-ni-soro. 13Mo qai kauta na uro kecega sa ubia na kena gacagaca, kei nai ubikoso sa toka e cake ka toka era na yate, kei na kena ivi ruarua, kei na uro sa ubia, ka vakama e dela ni cabocabo-ni-soro. 14Ia na lewe ni pulumokau, kei na kulina, kei na dena, mo vakama e na bukawaqa e taudaku ni tikotiko: oqo nai soro ni valavala ca.

15Ia mo kauta na sipi tagane; ka me ratou tabaka na ulu ni sipi tagane ko Eroni kei na luvena e na ligadratou. 16Mo qai vakamatea na sipi tagane, ka kauta na kena dra, ka kureitaka voli ki nai cabocabo-ni-soro. 17Ia mo tavalaka na sipi tagane, ka vuya na kena gacagaca kei na yavana, ka tuva na kena veitikina, kei na uluna. 18Ia mo qai vakama na sipi tagane taucoko e na dela ni cabocabo-ni-soro: sai soro kama vei Jiova: a ka boi vinaka, sa ka e vakacabori e na bukawaqa vei Jiova.

19Mo qai kauta na sipi tagane kadua, ka me ratou tabaka e na ligadratou na ulu ni sipi tagane ko Eroni kei na luvena. 20Mo qai vakamatea na sipi tagane, ka kauta e dua na kena dra, ka boroya kina na mua ni daliga i matau i Eroni, kei na mua ni daligadratou i matau na luvena, kei nai dovidovi-ni-kakana ni ligadratou i matau, kei nai qaqalo levu ni yavadratou i matau, ka volita nai cabocabo-ni-soro, ka kureitaka kina na kena dra. 21Ia mo kauta e dua na dra sa tu e dela ni cabocabo-ni-soro, kei nai lumu, ka kureitaka vei Eroni kei na nonai sulu, vei iratou talega na luvena kei na nodratou i sulu na luvena: ena qai vakatabui kina ko koya kei na nonai sulu, kei iratou na luvena kei na nodratou i sulu na luvena. 22Mo kauta talega eso na tiki ni sipi tagane, na uro kei na buina uro, kei na uro sa ubia na gacagaca, kei nai ubikoso sa voleka ki na yate, kei na ivi ruarua, kei na kena uro, kei na tabana i matau; oqo na sipi tagane ni veibuli: 23ka me dua nai buli madrai, ka dua na keki sa caka kei na waiwai, ka dua na keki mamare sara mai na sova madrai sa sega ni vakaleveni sa tu e na mata i Jiova: 24ia mo solia kecega ki na liga i Eroni, kei na ligadratou na luvena; ia mo yalovaka e na mata i Jiova mei soro e yalovaki. 25Mo qai kauta tani e ligadratou, ka vakama vata kei nai soro kama e na dela ni cabocabo-ni-soro, me ka boi vinaka e na mata i Jiova: sa ka e vakacabori e na bukawaqa vei Jiova. 26Mo qai kauta na serena na sipi tagane ni veibuli i Eroni, ka yalovaka e na mata i Jiova mei soro e yalovaki: ia ena kemu tikina oqori. 27Ia mo vakatabuya na serena sai soro e yalovaki, kei na tabana sai soro e lavelaveti, ni sipi tagane ni veibuli, ko ya sa na kei Eroni, kei na kedratou talega na luvena: 28ia sa lesi ka tawa mudu, me nei Eroni kei na luvena, maivei ira na Isireli: ni sai soro sa lavelaveti: sai soro lavelaveti maivei ira na Isireli, mai na nodra i soro ni veivinakati, io na nodra i soro sa lavelaveti vei Jiova.

29Ia nai sulu tabu nei Eroni ena nodra talega na luvena era taravi koya, me ra lumuti kina, ka buli kina. 30Na luvena sa bete me kenai sosomi, ena vakaisulu kina ka bogi vitu, ni sa curuma na vale ni veitavaki, me ia na cakacaka e na tikina tabu.

31Ia mo kauta na sipi tagane ni veibuli, ka vakasaqa na lewena e na tikina tabu. 32Ia ko Eroni kei na luvena eratou na kania na lewe ni sipi tagane, kei na madrai sa tu e na sova, ni ratou tu voleka ki na katuba ni vale ni veitavaki. 33Ia eratou na kania na ka oqo sa cabo mei bulubulu, eratou sa buli ka vakatabui kina: ia me kakua ni kana kina e dua sa mataqali tani, ni sa tabu. 34Ia kevaka sa vo eso na lewe-ni-manumanu ni veibuli, se na madrai, me yacova na mataka, mo qai vakama e na bukawaqa na kena vo: me kakua ni kani, ni sa tabu.

35Ia mo cakava vakaoqo vei Eroni kei iratou na luvena, me vaka na ka kecega ka'u sa vakarota vei iko: me bogi vitu ni ko sa ia tiko na nodratou veibuli. 36Ia mo vakacabora e dua na pulumokau e na veisiga kecega, mei soro ni valavala ca, mei bulubulu: ia mo vakasavasavataka nai cabocabo-ni-soro, ni ko sa vakacabora oti na kenai bulubulu; mo qai lumuta, me vakatabui kina. 37Me bogi vitu ko sa kitaka tiko kina nai bulubulu e na vuku ni cabocabo-ni-soro, ka vakatabuya: ena qai tabu sara nai cabocabo-ni-soro: na ka kece sa tara nai cabocabo-ni-soro, ena tabu.

38Ia oqo na ka mo vakacabora e na dela ni cabocabo-ni-soro; e rua na lami sa yabaki yadua ga na nodrau yabaki, e na veisiga kecega. 39E dua na lami mo vakacabora e na mataka, kei na kenai karua ni lami mo vakacabora e na yakavi: 40ia mo vakacabora vata kei na dua na lami e dua na omeri madrai droka vinaka sa waki vata kei na waiwai sa lauvutu e rua na paidi ka levu cake; kei na waini e rua na paidi ka levu cake, mei madrali liviraki. 41Ia na kenai karua ni lami mo vakacabora e na yakavi, ia mo cakava kina me vaka ki nai madrali laukana e na mataka, ka vaka na kenai madrali liviraki; me ka boi vinaka, a ka sa cabori e na bukawaqa vei Jiova. 42Sa na kenai soro kama tikoga e na nomudou veitabatamata, mai na katuba ni vale ni veitavaki, e na mata i Jiova; a tikina ka'u na veitavaki kina kei kemudou, me'u vosa kina vei iko. 43Ia ka'u na veitavaki maikea kei ira na Isireli, ia era na vakatabui talega e na noqu serau. 44Ia ka'u na vakatabuya na vale ni veitavaki, kei nai cabocabo-ni-soro: ka'u na vakatabui Eroni talega kei iratou na luvena, me ra bete vei au ko ira. 45Ia ka'u na tiko ga kei ira na Isireli, ia ka'u na nodra Kalou. 46Era na kila talega ko ira ni sai au ko Jiova na nodra Kalou, ko koya ka kauti ira tani mai na vanua ko Ijipita, me'u tiko vata kina kei ira: sai au ko Jiova na nodra Kalou.

Vakavakadewa Makawa

©1974 Bible Society of the South Pacific

More Info | Version Index