Search form

NA LAKO YANI 3

Sa rairai vei Mosese na Kalou, a sa talai koya me kauti ira na luve i Isireli mai Ijipita.

1Ia ko Mosese, sa vakania na sipi nei Jecoro na vugona, ko koya na bete mai Mitiani: a sa kauta na sipi ki daku ni lekutu, a sa yaco ki na ulu-ni-vanua ni Kalou, ki Orepi. 2A sa rairai vua ko koya na Agilose i Jiova e na yameyame ni bukawaqa mai na loma ni dua na kau: a sa raica ka sa kama tiko na kau e na bukawaqa, ka sa sega ni yavu na kau. 3A sa kaya ko Mosese, Au na lako vakatikitiki mada me'u dikeva na ka ka rairai dua tani oqo, se cava beka sa sega ni kama yavu kina na kau. 4Ia ni sa raica ko Jiova sa lako vakatikitiki me dikeva, sa qai kaci vua na Kalou mai na loma ni kau, ka kaya, I Mosese, I Mosese. A sa kaya ko koya, Raica, koi au saka. 5A sa kaya ko koya, Mo kakua ni toro voleka mai ki ke: mo luvata tani na nomu i vava mai na yavamu, ni sa qele tabu na tikina ko sa tu kina. 6Sa kaya talega, Koi au na Kalou ni nomu qase, na Kalou i Eparaama, na Kalou i Aisake, kei na Kalou i Jekope. A sa tabonaka na matana ko Mosese; ni sa rere ni raica na Kalou.

7A sa kaya ko Jiova, Au sa raica dina na nodra rarawa na noqu tamata, era sa tiko mai Ijipita, ka'u sa rogoca talega na nodra tagi e na vukudra era sa lesia vakabibi na nodra cakacaka; ni'u sa kila na nodra rarawa: 8ia ka'u sa lako sobu mai me'u vakabulai ira mai vei ira na kai Ijipita, ka me'u kauti ira cake mai na vanua ko ya ki na vanua vinaka ka levu sara, ki na vanua sa dave kina na wai-ni-sucu kei na oni; ki na nodra yasana na kai Kenani, kei na Itaiti, kei na Amoraiti, kei na Perisaiti, kei na Aivaiti, kei na Jepusaiti: 9ia oqo, sa rogo cake mai vei au na nodra tagi na Isireli: ka'u sa raica talega na veivakasaurarataki era sa vakasaurarataki ira kina ko ira na kai Ijipita: 10oqo, mo ia, au na talai iko vei Fero, mo kauti ira tani kina na noqu tamata na Isireli mai Ijipita.

11A sa kaya vua na Kalou ko Mosese, Ko cei koi au, me'u lako kivei Fero, me'u kauti ira talega na Isireli mai Ijipita? 12A sa kaya ko koya, Au na tiko vakaidina kei iko: ia oqo sa kenai vakatakilakila vei iko, ni'u sa talai iko: Ni ko sa kauti ira tani na tamata mai Ijipita, dou na qarava na Kalou e na ulu-ni-vanua oqo.

13A sa kaya vua na Kalou ko Mosese, Raica, ni'u sa lako vei ira na Isireli, ka kaya vei ira, A nodra Kalou na nomuni qase sa talai au vei kemuni? a ra sa kaya vei au, Ko cei na yacana? a cava me'u kaya vei ira?

14A sa kaya vei Mosese na Kalou, SA BULA KOI AU VAKAI AU: a sa kaya, Ko na vosa vakaoqo vei ira na Isireli, O koya sa yacana SA-BULA-KOI-AU sa talai au vei kemuni.

15A sa kaya talega vei Mosese na Kalou, Mo vosa vakaoqo vei ira na Isireli, Ko Jiova na Kalou ni nomuni qase, na Kalou i Eparaama, na Kalou i Aisake, na Kalou talega i Jekope, sa talai au vei kemuni. Oqo na yacaqu ka tawa mudu, ia oqo ka'u na nanumi kina e nai tabatamata kecega: 16Mo lako, ka vakasoqoni ira vata na qase ni Isireli, ka kaya vei ira, Ko Jiova na Kalou ni nomudou qase, na Kalou i Eparaama, kei Aisake, kei Jekope, sa rairai mai vei au, ka sa kaya, Ka'u sa vakaraici kemudou vakaidina, kei na ka sa caka vei kemudou mai Ijipita: 17ia ka'u sa kaya oti, Au na kauti kemudou cake mai na rarawa ni Ijipita, ki na nodra vanua na kai Kenani, kei na Itaiti, kei na Amoraiti, kei na Perisaiti, kei na Aivaiti, kei na Jepusaiti, ki na vanua sa dave kina na wai-ni-sucu kei na oni. 18Ia era na rogoca na domomu: ia ko na lako, ko iko, kei ira na qase ni Isireli, kivei koya na tui Ijipita, ia dou kaya vua, Ko Jiova na nodra Kalou na Iperiu sa veitavaki kei keitou: ia mo laivi keimami me keimami lako tu ka bogi tolu ki na loma ni vanua, me keimami vakacaboi soro vei Jiova na neimami Kalou. 19Ia ka'u sa kila ena sega ni soli kemudou na tui Ijipita mo dou lako, ena rawa e na liga kaukauwa ga: 20ia ka'u na dodoka yani na ligaqu, ka yaviti Ijipita e na noqu cakacaka e veivakidacalataki kecega, ka'u na cakava e na vanua ko ya: ka sa oti ena qai laivi kemudou mo dou lako. 21Ia ka'u na vakayalovinakataki ira na kai Ijipita vei ira na tamata oqo: ia ena yaco ni dou sa lako yani, dou na sega ni lako lala: 22ia na yalewa kecega ena taroga vua na nona lewe ni koro, vei koya talega sa tiko vulagi kaya, nai ukuuku siliva, kei nai ukuuku koula, kei nai sulu: ia dou na vakaisulutaki ira kina na nomudou gonetagane, kei na nomudou goneyalewa; ia dou na tokitaka na nodra i yau na kai Ijipita.

Vakavakadewa Makawa

©1974 Bible Society of the South Pacific

More Info | Version Index