Search form

NA LAKO YANI 30

Ai cabocabo ni ka boi vinaka me vakamai, 1-10. Ai voli ni bula, 11-16. Na taqi, 17-21. Ai lumu, 22-33. Ai saluaki tabu, 34-38.

1Mo cakava talega e dua nai cabocabo me vakamai kina na ka boi vinaka: mo cakava e na kau sitimi. 2Me dua na kiupiti na kena balavu, ka dua na kiupiti na kena raraba; me takiveilevu na yasana vava: ka rua na kiupiti na kena cecere: ena dua vata kei na kena kau na tutuna vava sa balavu cake. 3Ia mo botana e na koula dina, na delana, kei na veiyasana sa volita, kei na tutuna sa balavu cake; ia mo cakava kina e dua na batina koula e cake me volita. 4Ka rua na mama koula mo cakava kina me tu e ruku ni batina, e na tutuna ruarua, mo cakava e na yasana ruarua; ka me daramaki kina nai vua me colati kina. 5Ia mo cakava na veivua e na kau sitimi, ka botana e na koula. 6Ia mo vakatikora e na mata ni lati sa voleka ki na kato ni vunau, me donuya nai cabocabo-ni-bulubulu sa taqa e dela ni kato ni vunau, a tikina ka'u na veitavaki kina kei iko. 7Ia ko Eroni ena vakama na kau boi vinaka e na veimataka kecega: ni sa la'ki vakarautaka na veicina, me qai vakama e delana na ka boi vinaka. 8Ia ni sa tutuvaka na veicina e na yakavi ko Eroni, me qai vakama kina na ka boi vinaka, me boi vinaka tikoga e na mata i Jiova, e na nomudou i tabatamata kecega. 9Dou kakua ni vakacabora kina e dua na ka boi vinaka tani me vakamai, se nai soro kama, se nai madrali laukana; dou kakua talega ni livia ki delana nai madrali liviraki. 10Ia ko Eroni ena tau i bulubulu e na tutuna sa balavu cake vakadua e na veiyabaki, e na dra ni soro ni valavala ca sa ia kina nai bulubulu: me tau i bulubulu ko koya e delana vakadua e na veiyabaki, e na nomudou i tabatamata kecega: oqo na ka tabu sara me nei Jiova.

11A sa vosa vei Mosese ko Jiova, ka kaya, 12Ni ko sa wiliki ira na Isireli me vaka na kedrai wiliwili, me ra qai solia na tamata yadua nai voli ni nona bula vei Jiova, ni ra sa wili: me kakua kina ni tauvi ira na mate ca, ni ko sa wiliki ira. 13Sa vakaoqo na ka me ra solia, ko ira yadua sa lako kei ira era sa wili, e dua na wase ni sikeli ni sa wase rua, me vaka na sikeli ni vale tabu: (e ruasagavulu na kera sa rauta e dua na sikeli:) e dua na wase ni sikeli ni sa wase rua sa ka me cabo vei Jiova. 14Ko ira yadua sa lako kei ira era sa wili, ni sa ruasagavulu na nona yabaki, se levu cake, me solia na ka oqo me cabo vei Jiova. 15Me kakua ni levu cake na ka era solia na vutuniyau, me kakua talega ni lailai sobu na ka era solia na dravudravua, me dua ga na wase ni sikeli ni sa wase rua, ni ra sa cabora nai solisoli vei Jiova, me volia na nomudou bula. 16Ia mo kauta nai lavo ni veibuluti maivei ira na Isireli, ka vota ki na cakacaka ni vale ni veitavaki; me ra nanumi na Isireli e na mata i Jiova, mei voli ni nomudou bula.

17A sa vosa vei Mosese ko Jiova, ka kaya, 18Mo cakava talega e dua na taqi parasa, a kenai tutu talega me parasa, me dauvuivui kina: ia me viritu e na maliwa ni vale ni veitavaki kei nai cabocabo-ni-soro, mo qai sova kina na wai. 19A ratou na vuluvulu kina ka vuya talega na yavadratou ko Eroni kei na luvena: 20ni ratou sa curuma na vale ni veitavaki, eratou na qai vuluvulu ka vui e na wai, me ratou kakua ni mate: se ni ratou torova nai cabocabo-ni-soro me ia na cakacaka, me vakama na ka sa cabori vei Jiova e na bukawaqa: 21me ratou qai vuluvulu ka vuya talega na yavadratou, me ratou kakua ni mate: ia oqo sa lesi vei ira me ra cakava ka tawa mudu, vei koya kei na nona kawa e na nodra i tabatamata kecega.

22A sa vosa vei Mosese ko Jiova, ka kaya, 23Mo kauta talega vei iko na ka sa talei e nai saluaki, me lima na drau na sikeli mura dina, kei na sinamoni kamikamica me lailai sobu, me rua ga na drau ka limasagavulu, kei na kalamo boi vinaka e rua na drau ka limasagavulu, 24kei na kasia e lima na drau na sikeli, me vaka na sikeli ni vale tabu, kei na waiwai olive e tini na paidi: 25ia mo cakava me waiwai ni veilumuti tabu, na waiwai sa waki vata me vaka na kenai valavala ni matai sa daucakai saluaki: ena waiwai ni veilumuti tabu. 26Ia mo lumuta kina na vale ni veitavaki, kei na kato ni vunau, 27kei na tepeli kei na kenai yaya kecega, kei nai tutu-ni-cina kei na kenai yaya, kei nai cabocabo ni ka boi vinaka me vakamai, 28kei nai cabocabo-ni-soro kama kei na kenai yaya kecega, kei na taqi kei na kenai tutu. 29Ia mo vakatabuya, me ra tabu sara: na ka kece sa tarai ira, ena tabu. 30Mo qai lumuti Eroni kei na luvena, ka buli iratou, me ratou bete vei au. 31Ia mo vosa vei ira na Isireli, ka kaya, Oqo na noqu waiwai tabu ni lumu, e na nomudou i tabatamata kecega. 32Me kakua ni liviraki ki na yago ni tamata dou kakua talega ni cakava e dua me tautauvata kaya, me vaka na kenai wakiwaki: sa tabu oqo, ena tabu vei kemudou. 33Ko koya sa veiwakitaka e dua me tautauvata kaya, se livia e dua ki na tamata tani, ena muduki tani ko koya vei ira na kai nona.

34A sa kaya vei Mosese ko Jiova, Mo kauta vei iko na drega ni kau boi vinaka, na sitakite, kei na onika, kei na kalipeno; a drega ni kau boi vinaka vata kei na drega dina me vakamai: me tautauvata na kena bibi yadua: 35ia mo cakava me ka boi vinaka me vakamai, a ka sa waki vata me vaka na kenai valavala ni matai sa daucakai saluaki, sa vakamasimataki, sa savasava ka vakatabui: 36ia mo tukilaka eso, ka virikotora e na mata ni kato ni vunau e na vale ni veitavaki, a tikina ka'u na veitavaki kina kei iko: me sa ka tabu sara vei kemudou. 37Ia na ka boi vinaka me vakamai ko na cakava, dou kakua ni cakava vei kemudou e dua me vaka na kenai wakiwaki: ena nomu ka tabu vei kemudou ka me nei Jiova ga. 38O koya sa cakava e dua sa tauvata, me boica, ena muduki tani vei ira na kai nona.

Vakavakadewa Makawa

©1974 Bible Society of the South Pacific

More Info | Version Index