Search form

NA LAKO YANI 31

Sa cavuti ko Pisalieli kei Aoliapi me kitaka na vale kei na kenai yaya, 1-11. Sa vakaroti tale na siga tabu me vakatabui, 12-17. Sa soli na vatu ruarua ni vunau vei Mosese, 18.

1A sa vosa vei Mosese ko Jiova, ka kaya, 2Raica, ka'u sa cavuta na yaca i Pisalieli na luve i Urei, na luve i Uri, e na mataqali i Juta: 3ka'u sa vakasinaiti koya talega e na Yalo ni Kalou, e na vuku, kei na yalomatua, kei na daukila-ka, kei na cakacaka vakamatai kecega, 4me vakavuna nai vakatakarakara ni cakacaka vakavuku, eso, me cakacaka e na koula, kei na siliva, kei na parasa, 5kei na dauta vatu me vono, kei na dauceu kau, me dui caka vakamatai kecega. 6Ka raica, ka'u sa lesia vata kaya na luve i Eiisamaki, ko Aoliapi e na mataqali i Tani; ka'u sa vakavukui ira kece talega era yalomatua, me ra cakava na ka kecega ka'u sa vakarota vei iko; 7a vale ni veitavaki, kei na kato ni vunau, kei nai cabocabo-ni-bulubulu sa toka e delana, kei nai yaya kecega ni Vale tabu, 8kei na tepeli kei na kenai yaya, kei nai tutu-ni-cina savasava kei na kenai yaya kecega, kei nai cabocabo ni ka boi vinaka me vakamai, 9kei nai cabocabo-ni-soro kama kei na kenai yaya kecega, kei na taqi kei na kenai tutu, 10kei nai sulu ni cakacaka, kei nai sulu tabu me nei Eroni na bete, kei na nodratou i sulu na luvena, me ia kina na cakacaka vakabete, 11kei na waiwai mei lumu, kei na kau boi vinaka ni tikina tabu: me ra cakava me vaka na ka kecega ka'u sa vakarota vei iko.

12A sa vosa vei Mosese ko Jiova, ka kaya, 13Mo vosa tale vei ira na Isireli, ka kaya, Mo dou vakabauta vakaidina na noqu siga ni vakacecegu: ni sai vakatakilakila vei kemudou vei au talega e na nomudou i tabatamata kecega; mo dou kila kina ni sai au ko Jiova sa vakatabui kemudou. 14Mo dou vakabauta kina na siga ni vakacecegu; ni sa tabu vei kemudou: ko ira kecega sa vakacacana ena vakamatei vakaidina: ko ira kecega sa cakava kina e dua na cakacaka, ena muduki tani na tamata ko ya maivei ira na kai nona. 15E ono na siga me ia kina na cakacaka; ia e na kenai kavitu ni siga sa gauna ni vakacecegu me vakacegu kina, sa tabu me nei Jiova: ko ira kecega sa kitaka na cakacaka e na siga ni vakacecegu, ena vakamatei vakaidina. 16Ia me ra vakabauta na siga ni vakacecegu na Isireli, me vakatabuya na siga ni vakacecegu e na nodra i tabatamata kecega, me veiyalayalati e tawa mudu. 17Oqori nai vakatakilakila vei au kei ira na Isireli me tawa mudu: ni sa buli lomalagi kei vuravura ko Jiova e na siga e ono, ka sa vakacegu e na kenai kavitu ni siga, ka sa vakacegui.

18Ia ni sa tinia na nona vosa vei Mosese mai na dela ni ulu-ni-vanua ko Saineai, sa qai solia vua e rua na vatu ni vunau, a vatu raraba, sa volai e nai qaqalo ni liga ni Kalou.

Vakavakadewa Makawa

©1974 Bible Society of the South Pacific

More Info | Version Index