Search form

NA LAKO YANI 32

Era cakava na luve ni pulumokau kaukamea, ka soro kina, 1-6. Sa cudru kina ko Jiova, a sa vakamasuta ko Mosese, a ra sa sega ni rusa kina na tamata, 7-14. Sa sobu mai na ulu-ni-vanua ko Mosese, a sa viritaka sobu na vatu ruarua ka sa vorolaki, ni sa raica na nodra i valavala ca na tamata, 15-20. Sa vunauci Eroni, a sa vakamarimari ko Eroni, 21-24. Era moku ko ira sa soro ki na pulumokau, 25-29. Sa masulaki ira tale ko Mosese, 30-35.

1Ia ni ra sa raica na tamata sa berabera ni lako sobu mai na ulu-ni-vanua ko Mosese, sa ra soqoni vata vei Eroni na tamata, ka kaya vua, Mo ia, mo cakava vei keda na kalou, me liutaki keda; ko Mosese ko ya, na tamata ka kauti keda cake mai na vanua ko Ijipita, eda sa sega ni kila se cava beka sa yaco vua. 2A sa kaya vei ira ko Eroni, Mo dou ucuna tani na sau koula mai na daligadra na watimudou, kei na luvemudou tagane, kei na luvemudou yalewa, ka kauta mai vei au. 3Ia ko ira na tamata kecega era sa ucuna tani na sau koula mai na daligadra, ka kauta vei Eroni. 4A sa taura ko koya maivei ira, ka cakava e na veleko, ka vakawaicalataka, ka bulia kina e dua na luve ni pulumokau: a ra sa kaya, I Isireli, oqo na nomudou kalou, ka kauti kemudou cake mai na vanua ko Ijipita. 5Ia ni sa raica oqo ko Eroni, sa cakava e dua nai cabocabo-ni-soro me tu e matana; a sa kailavaka yani ko Eroni, ka vaka, Sa ia na soqoni levu vei Jiova e na mataka. 6A ra sa sou e na mataka, ka vakacabora nai soro kama, ka kauta mai nai madrali ni veivinakati; a ra sa tiko sobu na tamata me kana ka gunu, ka ra tu cake me ra qito.

7A sa kaya vei Mosese ko Jiova, Mo ia, mo lako sobu; ni ra sa vakasisilataki ira ko ira na nomu tamata, ko a kauta cake mai na vanua ko Ijipita: 8era sa lako tani vakatotolo mai na sala ka'u a vakarota vei ira: era sa bulia e dua na nodra luve ni pulumokau sa vakawaicalataki, a ra sa qarava, ka vakacabora kina nai soro, ka kaya, I Isireli, oqo na nomu kalou, sa kauti kemudou cake mai na vanua ko Ijipita. 9Sa kaya talega vei Mosese ko Jiova, Au sa raici ira oti na tamata oqo, ka raica, era sa tamata domoqa: 10ia oqo, mo laivi au mada, me waqawaqa vei ira na noqu cudru, ia me'u vakarusai ira: ia ka'u na vakamatanitulevutaki iko.

11A sa vakamasuti Jiova na nona Kalou ko Mosese, ka kaya, kemuni Jiova, a cava sa waqawaqa kina na nomuni cudru vei ira na nomuni tamata, ko a kauta tani mai na vanua ko Ijipita e na kaukauwa levu, kei na liga mana? 12e na cava me ra vosa kina na kai Ijipita, ka kaya, Sa kauti ira tani ko koya me ra ca ga, ka me vakamatei ira e na veiulu-ni-vanua, ka me vakarusai ira laivi mai na dela i vuravura? Me suka tani mada na nomuni cudru waqawaqa, ka mo ni veivutunitaka na nodra cudruvi na nomuni tamata. 13Ko ni nanumi Eparaama, kei Aisake, kei Isireli, na nomuni tamata, ko ni a bubului vei ira ka cavuti kemuni, ka kaya, Au na vakalewevuqataka na nomudou kawa me ra vaka na veikalokalo ni lomalagi, ia ka'u na solia vei ira na nomudou kawa na vanua taucoko oqo ka'u sa vosa kina, me ra kenai taukei ka sega ni mudu. 14A sa veivutunitaka ko Jiova na ca sa kaya ena vakayacora vei ira na nona tamata.

15A sa vuki ko Mosese, ka lako sobu mai na ulu-ni-vanua, a sa taura tiko e ligana na vatu raraba ruarua ni vunau: na vatu raraba sa volai e na yasana ruarua, sa volai e na dua na yasana kei na kenai karua. 16Ia na vatu raraba ko ya sa nona cakacaka na Kalou, na kedrau i volavola talega sa kenai volavola ni Kalou, sa ceuti e na vatu raraba. 17Ia ni sa rogoca ko Josua na domo ni tamata ni ra kaila, sa kaya vei Mosese, Sa dua na kaila ni valu mai nai tikotiko. 18A sa kaya ko koya, Sa sega ni nodra kaila era sa gumatua, sa sega talega ni nodra qoqolou ni ra guca: a domo ni sere ga ka'u sa rogoca. 19Ia ni sa toro voleka ki nai tikotiko, sa qai kunea na luve ni pulumokau, kei na meke: a sa waqa mai na cudru i Mosese, a sa biuta tani e ligana na vatu raraba, ka vorolaka e ruku ni ulu-ni-vanua. 20A sa taura ko koya na luve ni pulumokau era cakava, ka vakama e na bukawaqa, ka vakavurumemeataka, ka vakamiraka ki na wai, ka vagunuvi ira kina na Isireli.

21A sa kaya vei Eroni ko Mosese, A cava era cakava vei iko na tamata oqo, mo vakayacora kina vei ira nai valavala ca levu? 22A sa kaya ko Eroni, Me kakua mada ni waqawaqa mai na cudru ni noqu turaga: ko sa kilai ira na tamata oqo, ni ra sa guta tiko na ca. 23Ni ra sa kaya vei au, Mo cakava vei keda na kalou, me liutaki keda; ko Mosese ko ya, na tamata ka kauti keda cake mai na vanua ko Ijipita, eda sega ni kila se cava beka sa yaco vua. 24Au a qai kaya vei ira, Ko koya sa dua na nona ka koula, me ucuna mada. A ra sa solia mai vei au: ka'u a qai biuta ki loma ni bukawaqa, a sa dua kina na luve ni pulumokau oqo. 25A sa kunei ira na tamata ko Mosese ni ra sa sereki tu; (ni sa vakasereki ira ko Eroni, ka me ra vakamaduataki e na kedra maliwa na nodra meca): 26sa qai la'ki tu ko Mosese mai na matamata, ka kaya, Mada mai vei au, ko koya sa totaki Jiova! A ra sa soqoni vata vua ko ira kece na Livai. 27A sa kaya vei ira, Sa vosa vakaoqo ko Jiova na Kalou i Isireli, Dou vauca yadua na tamata na nonai seleiwau ki na dibina; ka lako voli e loma ni tikotiko mai na matamata-ni-koro e dua ki na matamata-ni-koro kadua, ka me vakamatea na wekana na tamata yadua, kei na tamata yadua na nonai tokani, kei na tamata yadua na kai nona. 28A ra sa kitaka me vaka na vosa i Mosese ko ira na Livai: a sa baleti ira na tamata e na siga ko ya e le tolu beka na udolu na tamata. 29A sa kaya ko Mosese, Dou vakatabui kemudou edaidai me nei Jiova, na tamata yadua e na nona vakamatea na luvena, kei na wekana; ka mo dou vakalougatataki kina edaidai.

30Ia e na mataka sa kaya vei ira na tamata ko Mosese, Dou sa kitaka e dua na ca levu: ia kau na qai cabe cake vei Jiova; ka'u na buluta rawa beka na nomudou i valavala ca. 31A sa lesu vei Jiova ko Mosese, ka sa kaya, Ulei na tamata oqo era sa kitaka nai valavala ca levu, ka cakava vei ira na kalou koula! 32ia oqo, ke sa rawa mo ni bokoca na nodra i valavala ca; ia kevaka sa sega, mo ni bokoci au laivi mada mai na nomuni vola ko ni sa vola. 33A sa kaya vei Mosese ko Jiova, Ko koya yadua sai valavala ca vei au ka'u na bokoca laivi mai na noqu i vola: 34ia mo lako mada, mo tuberi ira na tamata ki na vanua ka'u a vosa kina vei iko: raica, na noqu Agilose ena liutaki iko: ia e na siga ka'u sa talevi ira kina, ka'u na sauma kina vei ira na nodra i valavala ca.

35A sa yaviti ira na tamata ko Jiova, e na vuku ni luve ni pulumokau era a cakava, ia ko ya ka cakava ko Eroni.

Vakavakadewa Makawa

©1974 Bible Society of the South Pacific

More Info | Version Index