Search form

NA LAKO YANI 33

Sa bese ni lako vata kei ira na tamata ko Jiova, 1-3. Era sa tagi ka rere kina na tamata, 4-6. Sa kauta na Vale ni veitavaki ki nai bili ko Mosese, a sa rairai kina vei Mosese ko Jiova, ka veivosaki kaya, 7-16. Sa masuti Jiova ko Mosese me vakaraitaka vua na nonai serau, a sa vakaraitaka ko Jiova na nona vinaka, 17-23.

1A sa kaya vei Mosese ko Jiova, Mo ia, mo toki tani eke, ko iko kei ira na tamata ko a kauta cake mai na vanua ko Ijipita, ki na vanua ka'u a bubului kina vei Eparaama, vei Aisake, kei Jekope, ni'u a kaya, Ka'u na solia vei ira na nomu kawa: 2ia ka'u na tala e dua na agilose me liutaki iko; ia ka'u na vakasevi ira tani na kai Kenani, kei ira na Amoraiti, kei ira na Itaiti, kei ira na Perisaiti, kei ira na Aivaiti, kei ira na Jepusaiti: 3io, mo lako ki na vanua sa dave kina na wai-ni-sucu kei na oni: ni'u na sega ni lako cake e na kemudou maliwa; ni dou sa tamata domoqa: de'u vakarusai kemudou e na gaunisala.

4Ia ni ra sa rogoca na tamata nai rogorogo ca oqo, era sa tagi; a sa sega na tamata sa vakaiukuukutaki koya e nonai ukuuku. 5Ni sa kaya eliu vei Mosese ko Jiova, Mo kaya vei ira na Isireli, Dou sa tamata domoqa: kevaka ka'u na lako vakalekaleka ga ki na kemudou maliwa, ka'u na vakarusai kemudou: o koya oqo, mo dou luvata tani mada vei kemudou na nomudou i ukuuku; me'u kila kina na ka me'u kitaka vei kemudou. 6A ra sa luvata tani na nodra i ukuuku na Isireli, ni ra sa lako mai na ulu-ni-vanua ko Orepi.

7A sa kauta na Vale tabu ko Mosese, ka la'ki birika mai nai bili ni tikotiko, me veiyawaki kei nai tikotiko, ka sa vakayacana, Na Vale tabu ni Veitavaki. Ia ko ira kecega era sa via qaravi Jiova era sa lako ki nai bili ki na vale ni veitavaki, mai nai bili ni koro. 8Ia ni sa lako yani ki na Vale tabu ni Veitavaki ko Mosese, era sa qai tu cake na tamata kecega, ka tu yadua e na katuba ni nona vale laca, ka rai yani vei Mosese, ka me curu mada ko koya ki na Vale tabu.

9A sa yaco, ni sa curuma na Vale tabu ko Mosese, sa qai lako sobu na duru o, ka tu mai na katuba ni Vale tabu, a rau sa veivosaki kei Mosese ko Jiova. 10A ra sa raica na duru o na tamata kecega ni sa tu mai na katuba ni Vale tabu: a ra sa tu cake na tamata kecega ka lotu, na tamata yadua e na katuba ni nona vale laca. 11A sa vosa vei Mosese ko Jiova ni rau veirai mata, me vaka na nodrau veivosaki na tamata kei na wekana. A sa lesu ko koya ki nai tikotiko: ia na nona dauveivuke ko Josua, na luve i Nuni, a cauravou, sa sega ni lako tani mai na Vale tabu.

12A sa kaya vei Jiova ko Mosese, Raica, kemuni sa kaya vei au, Mo kauti ira cake na tamata oqo: ia kemuni sa sega ni vakatakila vei au se ko cei kemuni na talai keirau vata: ia kemuni a kaya ga, Au sa kila na yacamu, ia ka'u sa lomani iko talega. 13Au sa qai masuti kemuni mada, kevaka kemuni sa lomani au, mo ni vakatakila mai vei au na nomuni valavala, me'u kilai kemuni, mo ni lomani au kina: mo ni nanuma talega ni ra sa nomuni tamata na matanitu oqo. 14A sa kaya ko koya, Au na lako dina vata kei iko, ka'u na vakacegui iko. 15A sa kaya vua ko koya, Kevaka ko ni sa sega ni lako, mo ni kakua ni kauti keimami cake tani eke: 16ia ka cava na ka ena kilai kina eke ni kemuni sa lomani au kei ira na nomuni tamata? e sega li ni ka ga oqo, ni kemuni sa lako kei keimami? keimami na tawase tani kina, koi au kei ira na nomuni tamata, vei ira na tamata kecega sa tiko e dela i vuravura.

17A sa kaya vei Mosese ko Jiova, Au na cakava talega na ka oqo ko sa vosa kina: ni'u sa lomani iko, ka'u sa kila talega na yacamu. 18A sa kaya ko koya, Au masuti kemuni, mo ni vakaraitaka vei au na nomuni serau. 19A sa kaya ko koya, Au na cakava me lako e matamu na noqu vinaka kecega, ia ka'u na kacivaka na yaca i Jiova e matamu; ia ka'u na lomasoli vei ira ka'u via lomasoli kina, ka yalololoma vei ira ka'u via yalololoma kina. 20A sa kaya, E dredre mo raica na mataqu: ni sa sega na tamata me raici au, ka bula. 21Sa kaya talega ko Jiova, Raica, sa dua na tikina sa voleka vei au, ia ko na tu e na dela ni uluvatu: 22ia ena yaco, ni sa lako voli na noqu serau, ka'u na qai kauti iko ki na gusu ni uluvatu, ka tabonaki iko e ligaqu ni'u sa lako voli yani kina: 23ia ka'u na qai kauta tani na ligaqu, ko na raica kina na dakuqu: ia na mataqu ena sega ni raici.

Vakavakadewa Makawa

©1974 Bible Society of the South Pacific

More Info | Version Index