Search form

NA LAKO YANI 35

A siga tabu, 1-3. A ka sa vakacabori me caka kina vale ni Kalou, 4-19. Era yalovinaka na tamata ni ra cabora, 20-29. Sa kacivi ko Pisalieli kei Aoliapi me matai levu, 30-35.

1A sa vakasoqona vata nai soqosoqo taucoko ni Isireli ko Mosese, a sa kaya vei ira, Oqo na vosa sa vakarota ko Jiova, mo ni cakava: 2E ono na siga me ia kina na cakacaka, ia na kenai kavitu ni siga ena nomuni siga tabu, a siga tabu ni vakacecegu vei Jiova: ko koya yadua sa kitaka kina na cakacaka ena vakamatei. 3Mo ni kakua ni vakawaqa na buka e na nomuni veivale e na siga ni vakacecegu.

4Sa vosa talega ko Mosese ki nai soqosoqo taucoko ni Isireli, ka kaya, Oqo na ka sa vakarota ko Jiova, ka vaka, 5Mo ni taura maivei kemuni nai solisoli vei Jiova: ko koya sa lomasoli, me kauta ga mai ko koya nai solisoli vei Jiova; a koula, kei na siliva, kei na parasa, 6kei na ka pelu, ka lokaloka, ka kulakula, kei na lineni matailalai, kei na vutika ni me, 7kei na kuli ni sipi tagane sa somoti damudamu, kei na kuli ni babale, kei na kau sitimi, 8kei na waiwai ni cina, kei nai saluaki ni waiwai mei lumu, kei nai saluaki talega ni kau boi vinaka me vakamai, 9kei na vatu onikisa, kei na vatu me vono kina na efoti kei nai taube. 10Ia ko ira kecega sa lomavuku vei kemuni me lako mai, ka cakava na ka kecega sa vakarota ko Jiova: 11na vale ni Kalou kei na kenai ubi vutika ni me, kei na kenai ubi kuli ni sipi tagane, na kenai qila, kei na kena papa, na kenai kolokolo, na kena duru, kei na kena qara, 12na kato, kei na kenai vua, nai cabocabo-ni-bulubulu, kei nai lati me rube, 13na tepeli, kei na kenai vua, kei na kenai yaya kecega, kei na madrai dauraici, 14kei nai tutu-ni-cina, kei na kenai yaya, kei na kena cina, kei na waiwai ni cina, 15kei nai cabocabo ni ka boi vinaka me vakamai, kei na kenai vua, kei na waiwai mei lumu, kei na kau boi vinaka vakamai, kei nai sogo rube ni katuba era sa curu kina ki na vale ni Kalou, 16nai cabocabo-ni-soro kama, kei na kena bai parasa sa cicila, na kenai vua, kei na kenai yaya kecega, na taqi kei na kenai tutu, 17nai sulu ni rara, na kena duru, kei na kedra qara, kei nai sogo ni rara sa vakabai, 18nai vakadei ni vale ni Kalou, kei nai vakadei ni rara sa vakabai, kei na kedra dali, 19nai sulu sa caka vakamatai, me qaravi kina e na tikina tabu, nai sulu tabu i Eroni na bete, kei na nodratou i sulu na luvena, me ia kina na cakacaka vakabete.

20A ra sa lako tani e na mata i Mosese nai soqosoqo taucoko ni Isireli. 21A ra sa tale mai ko koya yadua sa uqeti koya na lomana, kei koya yadua sa marau kina na lomana, era sa kauta mai nai solisoli vei Jiova me caka kina na cakacaka ni vale ni veitavaki, kei na ka kecega sa yaga kina, kei nai sulu tabu. 22A ra sa lako mai na tagane kei na yalewa, ko ira kecega sa marau kina na lomadra, ka kauta mai na qato, kei na sau ni daliga, kei na mama, kei nai taube, nai yaya koula kecega; io na tamata kecega sa cabora e dua nai solisoli koula vei Jiova. 23Kei na tamata yadua sa kune vua na ka pelu, ka lokaloka, ka kulakula, kei na lineni matailalai, kei na vutika ni me, kei na kuli ni sipi tagane sa somoti damudamu, kei na kuli ni babale, sa kauta ga mai. 24Ko ira kecega sa cabora e dua nai solisoli siliva kei na parasa sa kauta nai solisoli vei Jiova: kei na tamata yadua sa kune vua na kau sitimi sa yaga e na dua na cakacaka, sa kauta ga mai. 25Kei ira na yalewa kecega sa lomavuku, era sa mulomulo e na ligadra, ka kauta mai na ka era muloca, io na ka pelu, ka lokaloka, na ka kulakula, kei na lineni matailalai. 26Kei ira na yalewa kecega sa uqeti ira na lomadra ni ra vuku, era sa muloca na vutika ni me. 27Ia ko ira na turaga, era sa kauta mai na vatu onikisa, kei na vatu me vono kina na efoti kei nai taube; 28kei na ka boi vinaka, kei na waiwai ni cina, kei na waiwai mei lumu, kei nai saluaki talega ni kau boi vinaka me vakamai. 29Era sa kauta mai vei Jiova na Isireli nai solisoli, ka ra sa marau kina, io, ko ira kecega na tagane kei na yalewa sa marautaka na yalodra me ra kauta mai me yaya e na cakacaka kecega, sa vakarota e na gusu i Mosese ko Jiova me caka.

30A sa kaya vei ira na Isireli ko Mosese, Raica, sa cavuta ko Jiova na yaca i Pisalieli na luve i Urei, na luve i Uri, e na mataqali i Juta; 31a sa vakasinaiti koya e na Yalo ni Kalou, e na vuku, e na yalomatua, kei na daukila-ka, kei na cakacaka vakamatai kecega; 32ka me vakavuna nai vakatakarakara ni cakacaka vakavuku eso, me cakacaka e na koula, kei na siliva, kei na parasa, 33kei na dauta vatu me vono, kei na dauceu kau, me kitaka na cakacaka vakavuku kecega. 34A sa vakatubura e lomana ko koya me viaivakavuvuli, io ko koya kei Aoliapi, na luve i Eiisamaki, e na mataqali i Tani. 35Sa vakasinaiti rau ko koya e na lomavuku, me kitaka na cakacaka kecega ni matai dauceuceu, kei na matai daukila na cakacaka vuku, kei na dau ni culai ukuuku ni sulu, e na wa pelu, ka lokaloka, ka kulakula, kei na lineni matailalai, kei na dau ni talitali, io na dau ni cakacaka kecega, kei ira era vakavuna na cakacaka vakavuku.

Vakavakadewa Makawa

©1974 Bible Society of the South Pacific

More Info | Version Index