Search form

NA LAKO YANI 36

Ai valavala ni vale ni Kalou, 2-38.

1Ia me ra kitaka na cakacaka ko Pisalieli kei Aoliapi, kei na tamata lomavuku kecega sa solia vei ira ko Jiova na lomavuku kei na yalomatua, me kila na cakacaka kecega sa yaga e na cakacaka ni vale tabu, me vaka na ka kecega sa vakarota ko Jiova.

2A sa kacivi Pisalieli kei Aoliapi ko Mosese, kei na tamata lomavuku kecega, sa vakavukuya na lomadra ko Jiova, io ko ira kecega sa uqeti ira na lomadra me lako mai ki na cakacaka me ra kitaka: 3a ra sa taura maivei Mosese nai solisoli kecega era sa kauta mai na Isireli me caka kina na cakacaka me yaga e na vale tabu. A ra sa kauta tiko vei koya nai solisoli era sa marau kina, e na veimataka kecega. 4Io ko ira kecega na tamata vuku, era sa kitaka na cakacaka kecega ni vale tabu, era sa lako mai ko ira na tamata yadua mai na cakacaka era sa oga kina; 5a ra sa vosa vei Mosese, ka kaya, Era sa kauta mai ko ira na tamata na ka sa rauta na cakacaka sa vakarota ko Jiova me caka, ka sa vo vakalevu. 6A sa vakarota ko Mosese, ka sa kacivaki voli e nai tikotiko, ka vaka, Me kakua na tagane se na yalewa me cakava tale e dua na cakacaka me soli ki na vale tabu. A ra sa vakadaroi na tamata me kakua ni kauta tiko mai. 7Ni sa rauta na cakacaka kece na ka sa kau mai, ka sa vo tu yani.

8Ia na tamata lomavuku kecega vei ira era sa kitaka na cakacaka ni vale ni Kalou, era sa cakava e tini nai sulu e na lineni ni wa muloci matailalai, kei na ka pelu, ka lokaloka, ka kulakula; sa cakava kina ko koya eso na jerupi, na cakacaka talei. 9A kena balavu nai sulu yadua sa ruasagavulu ka walu na kiupiti, kei na kena raraba nai sulu yadua e va na kiupiti: sa tauvata na kedrai vakarau nai sulu kecega. 10A sa tutuya vata ko koya e lima nai sulu: ka sa tutuya vata nai sulu e lima ka vo. 11A sa cakava eso nai vakamatavili e na ka pelu e na bati ni sulu e dua, mai na bele ni ka sa cula: sa cakava vakakina e na bati ni sulu e saukana, e nai karua sa tutui vata. 12Sa cakava e limasagavulu nai vakamatavili e nai sulu e dua, ka limasagavulu nai vakamatavili e na bati ni sulu sa cula vata kaya na kenai karua: sa veitauri nai vakamatavili. 13A sa cakava e limasagavulu nai qila koula, a sa veiqilaititaka vata nai sulu e dua ki na dua e nai qila: a sa dua kina na vale ni Kalou.

14A sa cakava ko koya nai ubi ni vale ni Kalou, e na vutika ni me: sa cakava ko koya e tinikadua nai sulu. 15A kena balavu nai sulu e dua sa tolusagavulu na kiupiti, kei na kena raraba nai sulu e dua sa va na kiupiti: sa tautauvata na kedrai vakarau nai sulu e tinikadua. 16A sa cula e lima nai sulu me dua, ka ono nai sulu me dua. 17A sa cakava e limasagavulu nai vakamatavili e na bele ni sulu, e saukana e na ka sa cula, ka limasagavulu nai vakamatavili e na bele ni sulu e nai karua ni ka sa cula. 18A sa cakava e limasagavulu nai qila parasa, me veiqilaititaka vata na vale tabu, me dua ga.

19A sa cakava ko koya e dua nai ubi ni vale tabu e na kuli ni sipi tagane sa somoti damudamu; kei na dua nai ubi e cake e na kuli ni babale.

20A sa cakava ko koya na kena papa ni vale ni Kalou e na kau sitimi, ka me duri tu. 21A kena balavu na papa yadua e tini na kiupiti, kei na kena raraba na papa yadua e dua na kiupiti ka afa kiupiti. 22Ki na papa e dua sa rua na kena basoga, sa veitaravi: sa vakarautaka vakakina ko koya na papa kecega ni vale ni Kalou. 23A sa vakarautaka na papa ni vale ni Kalou; e ruasagavulu na papa ki na yasa sa donuya na ceva: 24a sa cakava e vasagavulu na qara siliva e ruku ni papa e ruasagavulu; e rua na qara e ruku ni papa e dua, me rau dara kina na kena basoga ruarua; ka rua na qara e ruku ni papa e dua, me rau dara kina na kena basoga ruarua. 25Ia ki nai karua ni yasa ni vale ni Kalou, ko ya sa donuya na tokalau, sa cakava e ruasagavulu na papa; 26kei na kedra qara siliva e vasagavulu; e rua na qara e ruku ni papa e dua, ka rua na qara e ruku ni papa e dua. 27Ia ki na kubu ni vale ni Kalou sa donuya na ra, sa cakava e ono na papa. 28Ka rua na papa sa cakava ko koya ki na tutu ni vale ni Kalou e na yasana ruarua. 29Ia erau sa vauci vata era, ka vauci vata e cake, ki na mama e dua: sa cakava vakakina ko koya vei rau ruarua mai na tutuna ruarua. 30A sa walu na papa, a sa tinikaono na qara na kedra veiqara siliva, e rua na qara e ruku ni papa yadua.

31A sa cakava ko koya eso nai kolokolo e na kau sitimi: e lima ki na veipapa e na dua na yasa ni vale ni Kalou; 32ka lima nai kolokolo ki na veipapa e nai karua ni yasa ni vale ni Kalou, ka lima nai kolokolo ki na veipapa ni vale ni Kalou, ki na kubu sa donuya na ra. 33A sa cakava nai kolokolo eloma, me darabasika na gau ni veipapa, mai na kubu e dua ki na kubu kadua. 34A sa botana na veipapa e ka koula, a sa cakava e na koula na kedra veimama mei daradara ni veikolokolo, a sa botana na veikolokolo e na koula.

35A sa cakava ko koya nai lati e na ka pelu, ka lokaloka, ka kulakula, kei na lineni ni wa muloci matailalai: sa cakava kina eso na jerupi, me vaka na cakacaka ni matai vuku: 36a sa cakava kina e va na duru sitimi, ka botana e na koula: sa koula ga na kedratou i ruberube; a sa vakawaicalataka na siliva me mai va na kedra qara.

37A sa cakava ko koya e dua nai sogo ni Vale tabu, e na ka pelu, ka lokaloka, ka kulakula, kei na lineni ni wa muloci matailalai, sa cakava na matai ni dautalitali sulu; 38kei na kena duru e lima, kei na kedratou i ruberube: a sa botana na kedra domodomo kei na kedrai vau e na koula; a sa parasa ga na kedra qara e lima.

Vakavakadewa Makawa

©1974 Bible Society of the South Pacific

More Info | Version Index