Search form

NA LAKO YANI 38

Ai cabocabo-ni-soro kama, 1-7. Na taqi, 8. A rara, 9-20. Ai wiliwili ni ka era cabora na tamata, 21-31.

1A sa cakava ko koya nai cabocabo ni soro kama e na kau sitimi: e lima na kiupiti na kena balavu, ka lima na kiupiti na kena raraba; sa takiveilevu na veiyasana vava; ka tolu na kiupiti na kena cecere. 2A sa cakava na tutuna sa balavu cake e na tutuna vava; sa dua ga na kena kau kei na tutuna sa balavu cake: a sa botana e na parasa. 3A sa cakava nai yaya kecega ni cabocabo-ni-soro, na sedre, kei nai sivi me kau tani kina na dravusa, kei na peseni, kei nai qila ni lewe ni manumanu, kei na dari ni de-ni-bukawaqa: sa cakava na kenai yaya kecega e na parasa. 4A sa cakava ki nai cabocabo-ni-soro e dua na bai parasa sa cicila, me tu e ruku ni botani, me yaco ki na kena veimama. 5A sa vakawaicalataka na uma ka cakava kina e va na mama ki na tutuna vava ni bai parasa sa cicila, mei daradara ni veivua. 6A sa cakava nai vua e na kau sitimi, ka botana e na parasa. 7A sa daramaka ko koya nai vua ki na veimama e na yasa ni cabocabo-ni-soro, me colati kina; sa cakava ko koya e na papa me vakalomalomana.

8A sa cakava ko koya na taqi parasa, a kenai tutu talega e na parasa, io e na nodra i iloilo parasa na yalewa veivuke era soqoni vata e na katuba ni vale ni veitavaki.

9A sa cakava ko koya na rara sa vakabai: ki na yasana sa donuya na ceva sa so nai sulu me bai ni rara, me lineni ni wa muloci matailalai, e dua na drau na kiupiti: 10a kedra duru e ruasagavulu, kei na kedra qara parasa e ruasagavulu; ai ruberube e na duru, kei na kedrai vau, sa siliva. 11Ia e na yasana ki na tokalau e dua na drau na kiupiti, na kedra duru sa ruasagavulu, kei na kedra qara parasa e ruasagavulu; ai ruberube e na duru, kei na kedrai vau, sa siliva. 12Ia ki na kubu sa donuya na ra sa so nai sulu e limasagavulu na kiupiti, na kedra duru sa tini, ka tini na kedra qara; ai ruberube e na duru kei na kedrai vau, sa siliva. 13Ia ki na yasana vaka ki na tu-i-cake sa limasagavulu na kiupiti. 14Ai sulu ki na dua na yasa ni katuba sa tinikalima na kiupiti; na kedratou duru sa tolu, kei na kedratou qara sa tolu. 15Ia nai sulu ki na yasana kadua ni katuba ni rara sa vakabai, vaka ka vaka, sa tinikalima na kiupiti; e tolu na kedratou duru, ka tolu na kedratou qara. 16Ai sulu kecega sa volita na rara sa vakabai, sa lineni ni wa muloci matailalai. 17Ia na qara ni duru sa parasa: ai ruberube e na duru kei na kedrai vau sa siliva: a sa siliva nai botani ni kedra domodomo: a sa vakaivau siliva na duru kecega ni rara sa vakabai. 18Ia nai sogo ni rara sa vakabai sa cakava na dau ni culacula, e na ka pelu, ka lokaloka, ka kulakula, kei na lineni ni wa muloci matailalai: a sa ruasagavulu na kiupiti na kena balavu, kei na kena cecere ko ya na kena raraba e lima na kiupiti, me tauvata kei nai sulu ni rara sa vakabai. 19A sa va na kedratou duru, kei na kedratou qara parasa e va; sa siliva na kedrai ruberube, a sa siliva nai botani ni kedra domodomo kei na kedrai vau. 20Ia nai vakadei kecega ni vale ni Kalou, kei na rara e vakabai sa volita sa parasa.

21Oqo nai wiliwili ni yaya ni vale ni Kalou, ko ya na vale ni Kalou sa tu kina na vunau, ni sa wili, me vaka nai vakaro i Mosese, ni ra sa ia na cakacaka na Livai, ka sa lewai ira ko Icama, na luve i Eroni na bete. 22Ia ko Pisalieli na luve i Urei, na luve i Uri, e na mataqali i Juta, sa cakava na ka kecega sa vakarota ko Jiova vei Mosese. 23A sa cakacaka vata kaya ko Aoliapi, na luve i Eiisamaki, e na mataqali i Tani, na matai dauceuceu, kei na matai daucakacaka vakavuku, ka sa dauculai sulu e na ka pelu, ka lokaloka, ka kulakula, kei na lineni matailalai.

24Na koula kecega sa caka kina na cakacaka e na ka kecega sa caka e na vale tabu, io na koula sa cabori, sa ruasagavulu ka ciwa na taledi, ka vitu na drau ka tolusagavulu na sikeli, me vaka na sikeli ni vale tabu.

25Ia na nodra siliva era sa wili vei ira nai soqosoqo, sa dua na drau na taledi, ka dua na udolu ka vitu na drau ka vitusagavulu ka lima na sikeli, me vaka na sikeli ni vale tabu: 26sa dua na peka maivei ira na tamata yadua, oqo sa dua na wase ni sikeli ni sa wase rua, me vaka na sikeli ni vale tabu, maivei ira kecega era sa la'ki wili, ka sa ruasagavulu na nodra yabaki kei ira sa sivia na ruasagavulu, vei ira na lewe ono na drau ka tolu na udolu ka lima na drau ka limasagavulu. 27Ia na taledi siliva e dua na drau sa vakawaicalataki me caka kina na qara ni vale tabu, kei na qara ni lati; na taledi e dua na drau, me rauta na qara e dua na drau; sa dua na taledi ki na qara e dua. 28Ia na sikeli siliva e dua na udolu ka vitu na drau ka vitusagavulu ka lima, sa cakava kina ko koya nai ruberube e na duru, ka botana na kedra domodomo, ka cakava na kedrai vau.

29Ia na parasa sa cabori sa vitusagavulu na taledi, ka rua na udolu ka va na drau na sikeli. 30A sa cakava kina ko koya na veiqara ki na katuba ni vale ni veitavaki, kei nai cabocabo-ni-soro parasa, kei na kena bai parasa sa cicila, kei nai yaya kecega ni cabocabo-ni-soro; 31kei na veiqara ni rara e vakabai sa volita, kei na veiqara ni katuba ni rara sa vakabai, kei nai vakadei kecega ni vale ni Kalou, kei nai vakadei kecega ni rara e vakabai sa volita.

Vakavakadewa Makawa

©1974 Bible Society of the South Pacific

More Info | Version Index