Search form

NA LAKO YANI 39

Ai valavala ni nodratou i sulu ko Eroni kei na luvena.

1Ia na ka pelu, ka lokaloka, ka kulakula, era sa cakava kina nai sulu sa caka vakamatai, me ra cakacaka kina e na tikina tabu, era cakava talega nai sulu tabu nei Eroni; me vaka sa vakarota vei Mosese ko Jiova.

2A sa cakava ko koya na efoti e na koula, e na ka pelu, ka lokaloka, ka kulakula, kei na lineni ni wa muloci matailalai. 3A ra sa tukilaka na koula me mamare, ka tavatava me wa, me tali vata kaya na ka pelu, kei na ka lokaloka, kei na ka kulakula, kei na lineni matailalai, e na cakacaka ni matai vuku. 4Era sa cakava na kena wa bale, me vauci vata kina: sa vauci vata e na tutuna ruarua. 5Ia nai vau talei ni efoti, sa tiko kina, sa caka vakakina, me vaka na kenai valavala; e na koula, e na ka pelu, ka lokaloka, ka kulakula, kei na lineni ni wa muloci matailalai; me vaka sa vakarota vei Mosese ko Jiova.

6A ra sa cakava na vatu onikisa me vono e nai vakadei koula, sa ceu, me vaka sa ceu na mama, sa ceuti kina na yacadra na Isireli. 7A sa vakadeitaka ko koya ki na wa bale ni efoti, me vatu me ra nanumi kina na Isireli; me vaka sa vakarota vei Mosese ko Jiova.

8A sa cakava ko koya nai taube e na cakacaka ni matai vuku, me vaka nai valavala ni efoti; e na koula, e na ka pelu, ka lokaloka, ka kulakula, kei na lineni ni wa muloci matailalai. 9Sa takiveilevu e na yasana vava; era sa cakava nai taube me lobi rua: sa dua na afa kiupiti na kena balavu, ka dua na afa kiupiti na kena raraba, ni sa lobi rua. 10A ra sa vonota kina e na vatu ka va na kena yatu: nai matai ni yatu na saritiusi, na topasa, kei na kapuquli: 11ia nai karua ni yatu, na emeralita, na safaia, kei na taiamodi: 12ia nai katolu ni yatu, na laikure, na aketi, kei na amecisita: 13ia nai kava ni yatu, na perili, na onikisa, kei na jasipa; sa vono e nai vakadei koula e na qara era sa vono kina. 14Ia sa ceuti e na vatu me veitaravi vaka na yacadra na Isireli, e tinikarua, ka sa ceuti vaka na ceuceu ni mama na yacadra yadua, na mataqali e tinikarua. 15A ra sa cakava na sinucodo ni taube sa tobe me vaka na wa, e na koula dina. 16A ra sa cakava e rua na qara koula, ka rua na mama koula; a ra sa vauca na mama ruarua ki na tutu ni taube ruarua. 17Era sa qai daramaka na sinucodo koula e rua sa tobe, ki na mama ruarua sa vauci ki na tutu ni taube ruarua. 18Ia na muana ruarua ni sinucodo ruarua sa tobe era sa bukia ki na qara ruarua, ka vauca ki na mata ni wa bale ni efoti. 19A ra sa cakava e rua na mama koula, ka bukia ki na mua ni taube ruarua, e na tutuna, e na yasana ki loma ni efoti. 20A ra sa cakava e rua tale na mama koula, ka vauca ki na kena wa bale ruarua ni efoti e rukuna, vaka ki na matana, me donuya na tikina sa vauci kina, me toka e cake, ka toka era nai vau talei ni efoti. 21A ra sa vauca na mama ni taube ki na mama ni efoti e na wa pelu, me toka e cake, ka toka era nai vau talei ni efoti, ka me kakua ni tasere nai taube mai na efoti; me vaka ka vakarota vei Mosese ko Jiova.

22A sa cakava ko koya nai curucuru balavu ni efoti sa tali, e na wa pelu. 23Ia sa dua na qara, e na loma ni sulu, me vaka na qara, ni sulu ni valu; ka sa cula e dua na bati ni qara, me kakua ni kadresu. 24A ra sa cakava e na bele ni curucuru balavu eso na pomekaraneti, e na ka pelu, ka lokaloka, ka kulakula, sa muloci. 25A ra sa cakava eso na lali koula dina, ka vauca na lali e na maliwa ni pomekaraneti e na bele ni curucuru balavu, me volita e na maliwa ni pomekaraneti; 26e dua na lali ka dua na pomekaraneti, e dua na lali ka dua na pomekaraneti, me volita na bele ni curucuru balavu, me ia kina na cakacaka ni lotu; me vaka ka vakarota vei Mosese ko Jiova.

27A ra sa cakava nai curucuru balavu e na lineni matailalai sa tali, me nei Eroni kei iratou na luvena; 28kei nai sala e na lineni matailalai, kei nai sala vinaka e na lineni matailalai, kei na tarausese lekaleka lineni ni wa muloci matailalai, 29kei nai vau ni tolodra e na lineni ni wa muloci matailalai, kei na ka pelu, ka lokaloka, ka kulakula, sa cakava na dau ni culacula; me vaka ka vakarota vei Mosese ko Jiova.

30A ra sa cakava ki nai sala tabu na tiki ni koula dina sa raraba ka mamare, a ra sa volavola kina me vaka na ceuceu ni mama, SA TABU ME NEI JIOVA. 31A ra sa bukia kina e dua na wa pelu, me vauca kina ki nai sala ki cake; me vaka ka vakarota vei Mosese ko Jiova.

32A sa caka oti vakaoqo na cakacaka kecega ni vale ni Kalou na vale ni veitavaki: a ra sa cakava na Isireli me vaka ka vakarota vei Mosese ko Jiova, io era sa cakava vakakina.

33A ra sa kauta mai vei Mosese na vale ni Kalou, kei na kenai ubi, kei na kenai yaya kecega, na kenai qila, na kena papa, na kenai kolokolo, kei na kena duru, kei na kena qara, 34kei nai ubi kuli ni sipi tagane sa somoti damudamu, kei nai ubi kuli ni babale, kei nai lati me rube, 35na kato ni vunau, kei na kenai vua, kei nai cabocabo-ni-bulubulu, 36kei na tepeli, kei na kenai yaya kecega, kei na madrai dauraici, 37kei nai tutu-ni-cina koula dina, kei na kena cina, na cina me vakarautaki tiko, kei na kenai yaya kecega, kei na waiwai ni cina, 38kei nai cabocabo-ni-soro koula, kei na waiwai mei lumu, kei na kau boi vinaka me vakamai, kei nai sogo ni Vale tabu, 39kei nai cabocabo-ni-soro parasa, kei na kena bai parasa sa cicila, na kenai vua, kei na kenai yaya kecega, na taqi, kei na kenai tutu, 40nai sulu ni rara sa vakabai, na kena duru, kei na kena qara, kei nai sogo ni katuba ni rara sa vakabai, na kena dali, kei na kenai vakadei, kei nai yaya kecega me caka kina na cakacaka ni vale ni Kalou na vale ni veitavaki, 41nai sulu sa caka vakamatai me caka kina na lotu e na tikina tabu, kei nai sulu tabu nei Eroni na bete, kei na nodratou i sulu na luvena, me ia kina na cakacaka vakabete. 42Me vaka na ka kecega ka vakarota vei Mosese ko Jiova, era sa cakava vakakina na cakacaka kecega ko ira na Isireli. 43A sa dikeva na cakacaka kecega ko Mosese, ka raica, era sa cakava oti me vaka ka vakarota ko Jiova, io era sa cakava vakakina: a sa vosavakalougatataki ira ko Mosese.

Vakavakadewa Makawa

©1974 Bible Society of the South Pacific

More Info | Version Index