Search form

NA LAKO YANI 40

Sa vakaduri na vale ni Kalou, 1-8, ka sa lumuti, 9-11. Sa buli ko Eroni kei iratou na luvena, 12-15. Sa cakava vakadodonu na ka kecega ko Mosese, 16-33. Sa qai ubia na Vale tabu na o, 34-38.

1A sa vosa vei Mosese ko Jiova, ka kaya, 2E nai matai ni siga e nai matai ni vula mo vakaduria na vale ni Kalou na vale ni veitavaki. 3Ia mo kauta kina na kato ni vunau, ka tabonaka na kato e nai lati. 4Mo kauta talega na tepeli, ka vakatura vakavinaka na ka sa lesi me tu e delana; mo kauta talega nai tutu-ni-cina, ka tutuvaka na kena cina. 5Ia mo tokara nai cabocabo koula ni ka boi vinaka me vakamai e na mata ni kato ni vunau, ka rubeca nai sogo ni katuba ni vale ni Kalou. 6Ia mo vakatura nai cabocabo-ni-soro kama e na mata ni katuba ni vale ni Kalou na vale ni veitavaki. 7Ia mo vakatura na taqi e na maliwa ni vale ni veitavaki kei nai cabocabo-ni-soro, ka sova kina na wai. 8Ia mo viria na bai ni rara me volita, ka rubeca nai sogo ni katuba ni rara sa vakabai. 9Ia mo qai kauta na waiwai mei lumu, ka lumuta na vale ni Kalou, kei na ka kecega sa tu kina, ka vakatabuya, kei na kenai yaya kecega: ia ena qai tabu tikoga. 10Mo lumuta talega nai cabocabo-ni-soro kama, kei na kenai yaya kecega, ka vakatabuya nai cabocabo-ni-soro: ia ena qai tabu sara nai cabocabo-ni-soro. 11Ia mo lumuta na taqi kei na kenai tutu, ka vakatabuya.

12Ia mo kauti Eroni kei iratou na luvena ki na katuba ni vale ni veitavaki, ka vakasilimi iratou e na wai. 13Mo qai vakaisulutaki Eroni e nai sulu tabu, ka lumuti koya, ka buli koya, me bete vei au ko koya. 14Mo qai kauti iratou na luvena, ka vakaisulutaka e nai curucuru balavu: 15ia mo lumuti iratou, me vaka ko a lumuta na tamadratou, me ratou bete vei au: ia na nodra lumuti sa kenai vakadinadina ni ra na bete tawa mudu kina e na nodra veitabatamata.

16A sa cakava ko Mosese: io me vaka na ka kecega sa vakarota vua ko Jiova, sa cakacaka vakakina ko koya. 17A sa yaco e nai matai ni vula e na kenai karua ni yabaki, e nai matai ni siga ni vula, sa vakaduri cake na vale ni Kalou. 18A sa vakaduria na vale ni Kalou ko Mosese, ka vakataudeitaka e na kena qara, ka vakaduria na kena papa, ka daramaka na kenai kolokolo, ka vakaduria na kena duru. 19A sa tevuka yani nai ubi me ubia na vale ni Kalou, ka tevuka talega nai ubi e delana e cake; me vaka ka vakarota vei Mosese ko Jiova.

20A sa taura ko koya na vunau, ka virinoca ki na kato, ka vauca nai vua ki na kato, ka vakataqara nai cabocabo-ni-bulubulu me tu e dela ni kato: 21a sa kauta na kato ki loma ni vale ni Kalou, ka rubeca nai lati me rube, ka tabonaka na kato ni vunau; me vaka ka vakarota vei Mosese ko Jiova.

22A sa kauta ko koya na tepeli ki na vale ni veitavaki, ki na yasa ni vale ni Kalou sa donuya na tokalau, e taudaku ni lati. 23A sa vakatura vinaka na madrai e delana e na mata i Jiova; me vaka ka vakarota vei Mosese ko Jiova.

24A sa kauta ko koya nai tutu-ni-cina ki loma ni vale ni veitavaki, me donuya na tepeli, ki na yasa ni vale ni Kalou sa donuya na ceva. 25A sa tutuvaka na cina e na mata i Jiova; me vaka ka vakarota vei Mosese ko Jiova.

26A sa kauta ko koya nai cabocabo-ni-soro koula ki loma ni vale ni veitavaki e na mata ni lati: 27a sa vakama e delana na kau boi vinaka; me vaka ka vakarota vei Mosese ko Jiova.

28A sa rubeca ko koya nai sogo ni katuba ni vale ni Kalou. 29A sa vakatura nai cabocabo-ni-soro kama me voleka ki na katuba ni vale ni Kalou na vale ni veitavaki, ka cabora e delana nai soro kama kei nai madrali laukana; me vaka ka vakarota vei Mosese ko Jiova.

30A sa viritura ko koya na taqi me tu e na maliwa ni vale ni veitavaki kei nai cabocabo-ni-soro, ka sova kina na wai, me vuivui kina. 31Ia ko Mosese, kei Eroni, kei iratou na luvena, eratou a dauvuluvulu kina ka vuya kina na yavadratou: 32ni ratou sa curuma na vale ni veitavaki, se torova nai cabocabo-ni-soro, eratou sa qai vuluvulu ka vui; me vaka ka vakarota vei Mosese ko Jiova.

33A sa vakaduria ko koya na bai ni rara me volita na vale ni Kalou kei nai cabocabo-ni-soro, ka rubeca nai sogo ni katuba ni rara sa vakabai. A sa vakaotia na cakacaka ko Mosese.

34Sa qai ubia na vale ni veitavaki na o, a sa vakasinaita na vale ni Kalou na serau i Jiova. 35A sa sega ni curuma rawa na vale ni veitavaki, ko Mosese e na vuku ni sa tiko e delana na o, a sa vakasinaita na vale ni Kalou na serau i Jiova. 36Ia ni sa kau cake na o mai dela ni vale ni Kalou, era sa qai cavu tu me lako yani ko ira na Isireli: 37ia kevaka sa sega ni kau cake na o, era sa sega ni lako yani, ka yacova na siga sa kau cake kina. 38Ni sa tiko na o i Jiova e na dela ni vale ni Kalou e na siga, ka sa tiko kina na bukawaqa e na bogi, e na matadra kecega na Isireli, e na nodra i lakolako kecega.

Vakavakadewa Makawa

©1974 Bible Society of the South Pacific

More Info | Version Index