Search form

NA LAKO YANI 5

Erau sa lako ko Mosese kei Eroni me tukuna na vosa i Jiova vei Fero, 1-14. Era sa tagi vei Fero na Isireli, a sa cudruvi ira ga ko koya, 15-19. Era sa vosa kina vei Mosese, a sa masu kina ko koya vua na Kalou, 20-23.

1A sa oti erau qai lako ko Mosese kei Eroni, ka kaya vei Fero, Sa vosa vakaoqo ko Jiova na Kalou nei Isireli, Mo laivi ira na noqu tamata me ra la'ki vakacaboi soro vei au mai na lekutu. 2A sa kaya ko Fero, Ko cei ko Jiova, me'u vakarorogo ki na domona, me'u laivi ira kina na Isireli me ra lako? au sa sega ni kilai Jiova, au na sega talega ni laivi ira na Isireli me ra lako. 3A rau sa kaya, A nodra Kalou na Iperiu sa veitavaki kei keirau: me keimami lako tu ki na lekutu me bogi tolu, ka vakacaboi soro vei Jiova na neimami Kalou; de sa yaviti keimami e na mate dauveiveitauvi, se nai seleiwau. 4A sa kaya vei rau na tui Ijipita, Koi kemudrau, ko Mosese kei Eroni, a cava drau sa tarovi ira kina na tamata e na nodra cakacaka? dou lako ki na nomudou i lesilesi. 5Sa kaya talega ko Fero, Raica, era sa qai lewe vuqa mai na lewe ni vanua, ia drau sa vakacegui ira mai na nodra i tavi.

6Ia e na siga ko ya sa vakaroti ira ko Fero era sa lewa na nodra cakacaka na tamata, kei na nodra turaga, ka kaya, 7Dou kakua ni solia tale na co vei ira na tamata me ra bulia kina na vatu-buli, me vaka eliu: me ra lako ga ko ira ka kumuna mai na co; 8ia nai wiliwili ni vatu-buli, era sa daucakava eliu, dou lesia tiko vei ira; dou kakua ni vakalailaitaka: ni ra sa vucesa; o koya era sa tagi kina, ka kaya, Me keimami lako me vakacaboi soro vua na neimami Kalou. 9Me vakabibitaki vei ira na tamata na cakacaka, me ra cakacaka kina; ia me ra kakua ni goleva na vosa lasu.

10A ra sa lako yani ko ira era lewa na nodra cakacaka na tamata, kei na nodra turaga, a ra sa vosa vei ira na tamata, ka kaya, Sa vosa vakaoqo ko Fero, Au na sega ni solia tiko vei kemudou na co: 11dou lako yani, dou kumuna vei kemudou na co e na yasana dou kunea kina: ia ena sega ni vakalailaitaki vakalailai na nomudou cakacaka. 12A ra sa dui veilakoyaki kina na tamata e na vanua taucoko ko Ijipita, me ra kumuna vata na vu-ni-sila, mei sosomi ni co. 13A ra sa vakusakusataka ko ira era lavaka na nodra cakacaka, ka ra kaya, Dou vakaotia na nomudou cakacaka, na nomudou i tavi e na veisiga, me vaka ni sa rawa tiko na co. 14Ka ra sa vakanakuitataki ko ira na nodra ovisa na Isireli, ko ira era sa lesia na tamata nei Fero era daulavaka na cakacaka, ka ra sa tarogi, ka vaka. A cava dou sa sega ni vakaotia kina na nomudou i tavi vatu buli, e na noa, edaidai talega, me vaka eliu?

15Era sa qai lako mai ka tagi vei Fero ko ira na ovisa vei ira na Isireli, ka ra kaya, A cava ko ni sa kitaka kina vakaoqo vei keimami na nomuni tamata? 16Sa sega na co sa soli vei keimami na nomuni tamata? a ra sa kaya ga vei keimami, Dou cakava na vatu-buli: ka raica, keimami sa vakanakuitataki na nomuni tamata; ia sa cala ga ko ira na kai nomuni. 17Ia sa kaya ga ko koya, Dou sa vucesa, dou sa vucesa: o koya dou sa kaya kina, Me keimami lako ka vakacaboi soro vei Jiova. 18Ia oqo, dou la'ki cakacaka; ia ena sega ni soli vei kemudou na co, ia dou na solia ga mai na nomudou i tavi vatu-buli. 19Era sa qai kila ni ra vakaloloma ko ira na ovisa vei ira na Isireli, ni sa kainaki, Dou kakua sara ni vakalailaitaka na nomudou i tavi vatu-buli e na veisiga.

20A ra sa veisotaraki kei Mosese kei Eroni erau sa tu e na gaunisala, ni ra sa tale maivei Fero: 21a ra sa kaya vei rau, Me raici kemudrau ko Jiova, ka lewa; ni drau sa vakaboicataki keimami vei Fero, vei ira talega na nona tamata, ka me sa soli kina ki na ligadra nai seleiwau me ra vakamatei keimami.

22A sa lesu vei Jiova ko Mosese, ka sa kaya, Kemuni na Turaga, a cava ko ni sa vakararawataki ira kina na tamata oqo? a cava ko ni a talai au kina? 23Mai na gauna ka'u a lako kina vei Fero me vosa e na yacamuni, sa caka ca vei ira na tamata oqo ko koya; ia ko ni sa sega dina ni vakabulai ira na nomuni tamata.

Vakavakadewa Makawa

©1974 Bible Society of the South Pacific

More Info | Version Index