Search form

NA LAKO YANI 8

Sa lako mai na boto, 1-7. Sa veivutuni ko Fero, a sa mate na boto; ka qai vakaukauwataka na lomana ko Fero, 8-15. Sa lako mai na kutu, 16-19 kei na lago, 20-24. Sa kacivi Mosese ko Fero me masuta na Kalou me kau tani na lago, a sa kau tani e na masu i Mosese; ka qai vakaukauwataka tale na lomana ko Fero, 25-32.

1A sa kaya vei Mosese ko Jiova, Mo lako vei Fero, ka kaya vua, Sa vosa vakaoqo ko Jiova, Mo laivi ira na noqu tamata me ra lako, me ra qaravi au: 2Ia kevaka ko sa bese ni laivi ira me ra lako, raica, ka'u na yavita na nomu veiyasana kecega e na boto: 3ia ena vakatubura vakalevu na boto na uciwai, a ra na lade cake ka curuma na nomu vale, kei na nomu vale ni moce, ka lade ki na nomu i mocemoce, ka curuma na nodra vale era qaravi iko, kivei ira na nomu tamata, ki na nomu lovo, kei na nomu sedre sa natuki kina na madrai: 4ia na boto ena lakovi iko, kei ira na nomu tamata, kei ira kecega era qaravi iko.

5Sa kaya talega vei Mosese ko Jiova, Mo kaya vei Eroni, Mo dodoka na nomu i titoko ka tu e na ligamu vaka ki na uciwai lalai, kei na uciwai, kei na drano, ka vakayacora mai na boto me lakova na dela ni vanua ko Ijipita. 6A sa dodoka na ligana ko Eroni vaka ki na wai kecega mai Ijipita; a sa lako cake mai na boto, ka ubia na vanua ko Ijipita. 7A ra sa kitaka vakakina na daucaka-mana e na nodra i valavala vuni, a ra sa kauta cake mai na boto ki dela ni vanua ko Ijipita.

8Sa qai kacivi Mosese kei Eroni ko Fero, ka kaya, Drau vakamasuti Jiova me kauta tani vei au na boto, vei ira talega na noqu tamata; au na qai laivi ira na tamata me ra la'ki vakacaboi soro vei Jiova. 9A sa kaya vei Fero ko Mosese, Mo ni vakaroti au: ka me'u vakamamasu ninaica e na vukumuni, kei na vukudra era qaravi kemuni, kei ira na nomuni tamata, me kau tani na boto maivei kemuni kei na nomuni veivale, me ra tiko ga e na uciwai? 10A sa kaya ko koya, E na mataka. A sa kaya ko koya, Ena vaka na nomuni vosa: mo ni kila kina ni sa sega e tautauvata kei Jiova na neimami Kalou: 11Ia ena lako tani maivei kemuni na boto, mai na nomuni veivale, maivei ira talega era sa qaravi kemuni, kei ira na nomuni tamata; ka na tiko ga e na uciwai. 12A rau sa lako tani vei Fero ko Mosese kei Eroni: a sa tagi vei Jiova ko Mosese e na vuku ni boto ka kauta ko koya vei Fero. 13A sa kitaka ko Jiova me vaka na vosa i Mosese; a sa mate yani na boto mai na veivale, mai na veirara, mai na veiwere talega. 14A ra sa dui binibinia vata: a sa bona sara na vanua. 15Ia ni sa raica ko Fero era sa vakacegu, sa vakaukauwataka na lomana, ka sa sega ni vakarorogo vei rau; me vaka ka kaya ko Jiova.

16A sa vosa vei Mosese ko Jiova, Mo kaya vei Eroni, Mo dodoka na nomu i titoko, ka yavita na kuvu ni vanua, me vuki kina me kutu e na vanua taucoko ko Ijipita. 17A rau sa kitaka vakakina; ni sa dodoka ko Eroni na nonai titoko ka tu e na ligana, ka yavita na kuvu ni vanua, a sa tiko na kutu e na tamata, kei na manumanu; a kuvu ni vanua taucoko sa yaco me kutu e na vanua taucoko ko Ijipita. 18A ra sa kitaka vakakina na daucaka-mana e na nodra i valavala vuni, ka me vakatubura na kutu, a ra sa sega ni rawata: a sa tiko na kutu e na tamata, kei na manumanu. 19A ra sa qai kaya vei Fero na daucaka-mana, Oqo nai qaqalo ni Kalou: a sa kaukauwa na loma i Fero, ka sa sega ni vakarorogo vei rau ko koya; me vaka ka kaya ko Jiova.

20A sa kaya vei Mosese ko Jiova, Mo sou e na mataka, ka la'ki tu e na mata i Fero; raica, sa lako mai ki na wai; ia mo kaya vua, Sa kaya vakaoqo ko Jiova, Mo laivi ira na noqu tamata me ra lako, me ra qaravi au: 21ia kevaka ko sa bese ni laivi ira na noqu tamata me ra lako, raica, ka'u na tala na yavusa lago, vei iko, kei ira era qaravi iko, kei ira na nomu tamata, ki na nomu veivale talega: ia ena oso na nodra veivale na kai Ijipita e na yavusa lago, kei na qele talega era tiko kina: 22Ia e na siga ko ya ka'u na wasea na vanua ko Koseni, era tiko kina na noqu tamata, me kakua ni tiko kina na yavusa lago; mo kila kina ni sa au ko Jiova e vuravura; 23ia ka'u na vakatakilakilataki ira na noqu tamata kei na nomu tamata: ena caka e na mataka nai vakatakilakila oqo. 24A sa cakacaka vakakina ko Jiova; a sa lako mai na yavusa lago, na ka levu, ki na vale i Fero, kei na nodra vale na nona tamata: a sa ca na vanua e na veiyasana kecega mai Ijipita, ni sa ka levu na yavusa lago.

25A sa kacivi Mosese kei Eroni ko Fero, ka sa kaya, Dou lako, mo dou vakacaboi soro vua na nomudou Kalou e na vanua oqo. 26A sa kaya ko Mosese, Sa sega ni dodonu me keimami kitaka vakaoqori: ni keimami na vakacabora vei Jiova na neimami Kalou na ka era vakatabuya na kai Ijipita: raica, kevaka keimami sa vakacabora e matadra na ka era vakatabuya ko ira na kai Ijipita, era na sega beka ni vakaviriki keimami e na vatu? 27Keimami na lako ga ka bogi tolu ki na lekutu, ka vakacaboi soro vei Jiova na neimami Kalou, me vaka ena vakarota vei keimami ko koya. 28A sa kaya ko Fero, Au na laivi kemudou mo dou lako me vakacaboi soro vei Jiova na nomudou Kalou e na lekutu: ia dou na kakua ga ni lako vakayawa: drau masulaki au. 29A sa kaya ko Mosese, Raica, ka'u sa lako tani vei kemuni, ia ka'u na vakamasuti Jiova me lako tani na yavusa lago vei Fero, vei ira era qaravi koya, kei ira na nona tamata, e na mataka: ia me kakua ni lasu tale ko Fero, ni sa sega ni laivi ira na tamata me ra la'ki vakacaboi soro vei Jiova.

30A sa lako tani vei Fero ko Mosese, ka masuti Jiova. 31A sa cakava ko Jiova me vaka na vosa i Mosese; a sa kauta tani na yavusa lago vei Fero, vei ira era qaravi koya, kei ira na nona tamata: sa sega ni vo e dua. 32A sa vakaukauwataka na lomana ko Fero e na siga talega oqo, ka sa bese ni laivi ira na tamata me ra lako.

Vakavakadewa Makawa

©1974 Bible Society of the South Pacific

More Info | Version Index