Search form

NA LAKO YANI 9

Sa tauva na manumanu na mate levu, 1-7, kei na bo, 8-12. A uca-cevata, 13-26. Sa rere ko Fero, a sa kacivi Mosese me masulaki koya, a sa mudu kina na uca-cevata kei na kurukuru; ka qai kaukauwa tale na loma i Fero, 27-35.

1A sa kaya vei Mosese ko Jiova, Mo la'ki curu vei Fero, ka kaya vua, Sa vosa vakaoqo ko Jiova na nodra Kalou na Iperiu, Mo laivi ira na noqu tamata me ra lako, me ra qaravi au: 2ia kevaka ko sa bese tiko ni laivi ira me ra lako, ka ko sa tauri ira tiko, 3raica, sa na tara na nomu manumanu sa tiko mai na veico na liga i Jiova, io, na ose, na asa, na kameli, na pulumokau, kei na sipi: ka na tauvi ira e dua na mate dauveiveitauvi ka rerevaki sara: 4ia ena vakatakilakilataka ko Jiova na nodra manumanu na Isireli, kei na nodra manumanu na kai Ijipita: ena sega sara ni mate e dua na nodra manumanu na Isireli. 5A sa lokuca na kena siga ko Jiova, ka kaya, E na mataka, ena kitaka na ka oqo ko Jiova e na vanua.

6A sa cakava na ka ko ya ko Jiova e na mataka, a sa mate na manumanu kecega ni Ijipita: ia sa sega ni mate e dua na nodra manumanu na Isireli. 7A sa talaki ko Fero, ka raica, sa sega sara ni mate e dua na nodra manumanu na Isireli. A sa kaukauwa tiko na loma i Fero, a sa sega ni laivi ira na tamata me ra lako.

8A sa kaya vei Mosese kei Eroni ko Jiova, Drau yakuta eso na dravusa mai na matadravu, ia me kaburaka ko Mosese vaka ki lomalagi e na mata i Fero: 9ia ena vuki me kuvu-ni-soso matailalai, e na vanua taucoko ko Ijipita, ia ena vuki me bo, sa tetela ka vidikoso mai, e na tamata, kei na manumanu, e na vanua taucoko ko Ijipita.

10A rau a kauta na dravusa mai na matadravu, ka tu e na mata i Fero; a sa kaburaka ko Mosese vaka ki lomalagi; a sa vuki me bo, sa tetela ka vidikoso mai, e na tamata, kei na manumanu. 11A ra sa sega ni tu rawa e na mata i Mosese ko ira na daucaka-mana, e na vuku ni bo; ni sa tauvi ira era daucaka-mana na bo, kei ira kecega na kai Ijipita. 12A sa vakaukauwataka na loma i Fero ko Jiova, a sa sega ni vakarorogo vei rau; me vaka ka kaya vei Mosese ko Jiova.

13A sa kaya vei Mosese ko Jiova, Mo sou e na mataka, ka la'ki tu e na mata i Fero, ka kaya vua, Sa vosa vakaoqo ko Jiova na nodra Kalou na Iperiu, Mo laivi ira na noqu tamata me ra lako, me ra qaravi au: 14Ni'u na tala e na gauna oqo na noqu mate veiveitauvi kecega ki na yalomu, vei ira talega era qaravi iko, kei ira na nomu tamata; mo kila kina ni sa sega e dua me tautauvata kei au e vuravura taucoko. 15Ia kevaka ka'u a dodoka oti na ligaqu, ka yaviti iko, kei ira na nomu tamata, e na mate dauveiveitauvi; ko a qai muduki tani mai vuravura: 16ia e na vuku dina ni ka ga oqo ka'u sa vakabulai iko tiko, me'u vakatakila vei iko na noqu kaukauwa, me kuruvaki talega na yacaqu e vuravura taucoko. 17Ia ko sa vakalevulevui iko tiko li vei ira na noqu tamata, mo kakua ni laivi ira me ra lako? 18raica e na mataka e na tiki-ni-siga oqo ka'u na vakatauca mai na uca-cevata, a ka rerevaki sara, sa sega e tautauvata kaya e Ijipita mai na gauna sa tauyavutaki kina ka yacova na gauna oqo: 19ia oqo mo talatala, mo maroroya na nomu manumanu, kei na nomu ka kecega e na were; ni na tau na uca-cevata ki na tamata kecega, kei na manumanu, sa tiko e na were, ka sega ni kau ki vale, a ra na mate kina.

20Ia ko koya vei ira na tamata i Fero sa rerevaka na vosa i Jiova, sa kauti ira na nona tamata kei na nona manumanu ki na veivale: 21ia ko koya sa sega ni vakadinata na vosa i Jiova, sa laivi ira na nona tamata kei na nona manumanu e na were.

22A sa kaya vei Mosese ko Jiova, Mo dodoka na ligamu vaka ki lomalagi, me tau na uca-cevata e na vanua taucoko ko Ijipita, ki na tamata, kei na manumanu, kei na co kecega ni vanua, e na vanua ko Ijipita. 23A sa dodoka na nonai titoko ko Mosese vaka ki lomalagi, a sa vakayacora na kurukuru ko Jiova kei na uca-cevata, a sa cici voli e dela ni vanua na bukawaqa; a sa vakatauca ko Jiova na uca-cevata e dela ni vanua mai Ijipita. 24A sa tau vata mai na uca-cevata, kei na bukawaqa, a ka rerevaki sara, sa sega e tautauvata kaya e na vanua ko Ijipita mai na gauna sa matanitu kina. 25Ia na uca-cevata sa vakacataka na ka kecega sa tiko e na were, a tamata kei na manumanu, e na vanua taucoko ko Ijipita; ia na uca-cevata sa yavita na co kecega ni vanua, ka sa musumusuki na kau kecega ni vanua. 26Ia e na yasana ga ko Koseni, era tiko kina na Isireli, sa sega kina na uca-cevata.

27A sa talatala ko Fero, ka kacivi Mosese kei Eroni, ka kaya vei rau, Au sai valavala ca oqo: sa dodonu ko Jiova, ia koi au kei ira na noqu tamata, keimami sai valavala ca: 28mo vakamasuti Jiova, me kakua tale na kurukuru maivei koya na Kalou, se na uca-cevata, ni sa qai levu; ia ka'u na qai laivi kemuni mo ni lako, ia kemuni na sega ni tiko tale. 29A sa kaya vua ko Mosese, Ni'u sa yaco ki nai bili ni koro, au na dodoka yani na ligaqu vei Jiova; ena qai mudu na kurukuru, ka sega tale ni tau na uca-cevata; mo ni kila kina ni sa nei Jiova ko vuravura: 30ia koi kemuni kei ira na nomuni tamata, au sa kila sa bera tiko na nomuni rerevaki Jiova na Kalou.

31A sa vakacataki na laino kei na parile, ni sa vakasola mai na parile, a sa vaqana na laino. 32Ia na witi kei na sila vuti, sa sega ni vakacataki: ni sa sega ni tubu cake.

33A sa lako tani vei Fero ki nai bili ni koro ko Mosese, a sa dodoka yani na ligana vei Jiova: a sa mudu na kurukuru kei na uca-cevata, a sa sega ni tau tiko mai ki vuravura na uca. 34Ia ni sa raica ko Fero sa mudu na uca, kei na uca-cevata, kei na kurukuru, sa qai kuria tale na nonai valavala ca, ka vakaukauwataka na lomana, ko koya kei ira na nona tamata. 35A sa kaukauwa na loma i Fero, a sa bese ni laivi ira na Isireli me ra lako; me vaka ka vosa ko Jiova e na gusu i Mosese.

Vakavakadewa Makawa

©1974 Bible Society of the South Pacific

More Info | Version Index