Search form

NAI VAKATEKIVU 14

Erai valu na turaga lelevu, a sa gu ca ko tui Sotoma kei ira na nonai to, a sa vakabobulataki ko Loti, 1-12. Sa cici muri ira ko Eparama, ka kauti ira tale mai, 13-16. Sa la'ki tavaki Eparama ko Melikiseteki, 18-20. Sa vakasuka vei tui Sotoma ko Eparama na nona ka, 21-24.

1A sa yaco e na gauna i Amirafeli na tui Saina, ko Arioki na tui Elasari, ko Kitoleoma na tui Ilama, kei Titali na tui ni veivanua eso; 2eratou a veivaluti ko iratou oqo kei Pira na tui Sotoma, kei Pirisa na tui Komora, kei Sinapa na tui Atima, kei Semeperi na tui Sepoimi, kei tui Pela, (ko ya ko Soa). 3Eratou sa soqoni vata ko iratou kecega oqo mai na buca mai Sitimi, ko ya na Wasa Tuituina. 4E tinikarua na yabaki a ratou qaravi Kitoleoma tiko, ia e na kenai katinikatolu ni yabaki eratou bese. 5Ia e na kenai katinikava ni yabaki sa lako mai ko Kitoleoma, kei iratou na tui eratou tiko kaya, a ratou sa mokuti ira na luve i Refei mai Aseteroci Karineimi, kei ira na luve i Susi mai Ame, kei ira na luve i Emimi mai Save-kiriaceimi; 6kei ira na luve i Ori mai na nodra ulu-ni-vanua ko Sira, ka yacovi Eli-perani, ka voleka ki na vanua liwa. 7A ra sa lesu, ka lako mai ki Eni-misipata, (ko ya ko Ketesa,) ka samuta na nodra vanua kecega na Amalekaiti, kei na Amoraiti, era tiko mai Asesoni-tamari.

8A sa lako yani ko tui Sotoma, kei tui Komora, kei tui Atima, kei tui Sepoimi, kei tui Pela, (ko ya ko Soa); a ra sa tuvai valu vei ira e na buca mai Sitimi; 9io vei Kitoleoma na tui Ilama, kei Titali na tui ni veivanua eso, kei Amirafeli na tui Saina, kei Erioki na tui Elasari; e le va na tui e na dua nai taba, ka le lima na tui e na dua nai taba. 10A sa vuqa nai keli qele dregadregata e na buca mai Sitimi; a rau a dro na tui Sotoma kei Komora, a rau a bale maikina: ia ko ira na kena vo, era a dro ki na ulu-ni-vanua. 11A ra tokia nai yau kecega ni Sotoma kei Komora, kei na kedra kakana kecega, ka lako yani: 12a ra sa tauri Loti, na luve ni tuaka i Eparama, ko koya ka tiko mai Sotoma, kei na nonai yau, ka ra sa lako tani.

13Ia e dua vei ira sa bula, sa lako mai ka tukuna vei Eparama na Iperiu; sa tiko ko koya mai na kau eso nei Mamire na Amoraiti, a taci i Esikoli, kei na taci i Aneri: a ratou sa tovata kei Eparama ko iratou oqo. 14Ia ni sa rogoca ko Eparama sa kau vakabobula na luve ni tuakana, sa vakaiyaragitaki ira na nona tamata sa vakavulici, ko ira era sa sucu e nona vale, e le tolu na drau ka tinikawalu, ka vakasavi ira ki Tani: 15a sa wasei ira na nona tamata me sikiti ira e na bogi, a sa mokuti ira, ka vakasavi ira ki Opa, ko ya ki nai mawi kei Tamasiko: 16a sa kauta tale mai nai yau kecega; kei Loti talega na luve ni tuakana, kei na nonai yau, kei ira talega na yalewa, kei ira na tamata.

17Ia ko tui Sotoma sa la'ki tavaki koya ni sa lesu mai ni sa mokuti Kitoleoma, kei iratou na turaga eratou a tiko kaya, mai na buca mai Seve, (ko ya na Buca nei koya na Tui). 18A sa kauta yani na madrai kei na waini ko Melikiseteki na tui Selemi: ia ko koya na bete ni Kalou Cecere Sara. 19A sa vosavakalougatataki koya, ka kaya, Sa kalougata ko Eparama vua na Kalou Cecere Sara, ko koya sai taukei kei lomalagi kei vuravura; 20me vakavinavinakataki talega na Kalou Cecere Sara, ko koya sa soli ira na nomu meca ki na ligamu. A sa solia vua ko Eparama nai katini ni ka kecega.

21A sa kaya vei Eparama ko tui Sotoma, Mo soli ira mada mai vei au na tamata, ka kauta nai toki me nomu. 22A sa kaya vei tui Sotoma ko Eparama, Au sa dulaka oti na ligaqu vei Jiova, na Kalou Cecere Sara, ko koya sai taukei kei lomalagi kei vuravura, 23me'u kakua ni kauta e dua na vulovulo se dua na wa ni vava, se dua na ka sa nomu, de ko kaya, Au sa vakavutuniyautaki Eparama: 24a ka ga era sa kania na cauravou, kei na nodra i votavota na tamata keitou a lako vata, ko Aneri, ko Esikoli, kei Mamire; me ratou kauta ga na nodratou i votavota.

Vakavakadewa Makawa

©1974 Bible Society of the South Pacific

More Info | Version Index